SECCIÓN 24

Iamatlajkuiloluan Pablo tlen kintitlanilia tlanechikoltin

Pablo kititlani amatlajkuiloltin tlen ika kinyolchikaua akin kichiuaj ken Cristo

TLANECHIKOJLI tlen opeuj, kichiuaskia miyek tlemach tlen tlapaleuiskia manochiua tlen toTajtsin kineki mapano. Akin ompa nosentlaliayaj okixikojkej ika kintlaueltokayaj niman okixnamijkej nochi tlen xkuajli nochiuaya ipan tlanechikojli. ¿Kenon ouelkej oyolmelaujkanenkej? Veintiún amatlajkuiloltin tlen nonextiaj ipan Tlajkuiloltin Griegas Cristianas okinyolchikauj niman itlajkuiloluan melak okimpaleui.

Itech yejon amatlajkuiloltin Pablo okijkuilo majtlaktli iuan naui, peua ika tlen okimijkuilouili Romanos niman ontlami ika tlen okimijkuilouili Hebreos. Nochi yejuin amatlajkuiloltin kijtouaya akinon kititlaniliayaj: tla se tlanechikojli noso se tlaltikpakchane. Matikitakan san seki itech tlen okijkuilo Pablo.

Nemilistli chipauak niman kenon touikaskej. Akin auilnemij, ixnamikpajpatlaj, noso akin melak tlajtlakolchiuaj niman xnoyolkuepaj “xkiseliskej itekiuajyo toTajtsin” (Gálatas 5:19-21; 1 Corintios 6:9-11). Itekipanojkauan Jehová xtechikoitaskej noso xtetlauelitaskej pampa oksekimej ualeuaj oksekan (Romanos 2:11; Efesios 4:1-6). Kipiya ika kuelitaskej temakaskej tlen kuajli niman kimpaleuiskej akin iuan nonechikouaj (2 Corintios 9:7). Pablo kinyoleua makijlikan Jehová nochi tlen kimachiliaj niman kimijlia: “Nochipa xchiuakan oración” (1 Tesalonicenses 5:17; 2 Tesalonicenses 3:1; Filipenses 4:6, 7). Tla kinekij makinkaki toTajtsin ijkuak kichiuiliskej teoyotl, noneki makineltokakan ika toTajtsin kiminkakis (Hebreos 11:6).

¿Tlen tlajtolpaleuilistin okiminmakak Pablo nochi familias? Teueuentsitsintin kipiyaj ika kintlasojtlaskej insiuauan ijkon ken yejuamej notlasojtlaj. Niman nochi akin tesiuauj kipiya ika kitlakaitas iueuentsin ika nochi iyojlo. ToTajtsin noijki kichia ika tekoneuan makintlakamatikan intajuan, niman tajtin makinmachtikan inkoneuan ika tlasojtlalistli ijkon ken iTlajtol toTajtsin tlanauatia (Efesios 5:22–6:4; Colosenses 3:18-21).

Mapa kampa Pablo okinchijchiuj amatlajkuiloltin

Tlen toTajtsin kineki manochiua. Tlanauatijli tlen okimakakej Moisés okintlajpix niman okinyekan israelitas hasta ijkuak yejkoskia Mesías akin yonoijtoka uajlaskia, san ika akin kichiuayaj ken Cristo xok nonekiya makitlakamatikan Tlanauatijli tlen okimakakej Moisés (Gálatas 3:24). Ipan amatlajkuilojli tlen okimijkuilouili Hebreos —akin katkaj judíos—, Pablo oteasikamachilti tlenon okichiuj Tlanauatijli niman Cristo itech tlen toTajtsin kineki manochiua. Okijto ika miyek tlen onoijkuilo ipan Tlanauatijli nochiuaskia ika tlayekapan. Itech yolkamej tlen nouentlaliayaj kijtosnekiya ika Jesús kiuentlaliskia inemilis niman ijkon ueliskia popoliuiskej totlajtlakoluan (Hebreos 10:1-4). Ika imikilis Cristo okichiuj maka sa manotekitilti Tlanauatijli tlen okimakakej Moisés (Colosenses 2:13-17; Hebreos 8:13).

Inomachtijkauan Cristo ipan se tlanechikojli kikaktokej tlen Pablo okintitlanili ipan se amatlajkuilojli

Kenon noyekana tlanechikojli. Tlakamej akin kiminmakaj tekitl ipan tlanechikojli noneki makipiyakan iminemilis chipauak niman makichiuakan nochi tlen kintlajtlanilia iTlajtol toTajtsin (1 Timoteo 3:1-10, 12, 13; Tito 1:5-9). Noijki melak noneki ika nochi akin kitekichiuiliaj toTajtsin manosentlalikan nochipa, niman ijkon kiseliskej kuajli tlamachtijli itech iTlajtol toTajtsin niman manoyolchikauakan semej iuan oksekimej (1 Corintios 14:26, 31; Hebreos 10:24, 25).

Ijkuak Pablo okijkuilo amatlajkuilojli tlen sa ika otlamito —tlen ika okpa okijkuilouili Timoteo— oksejpa nemiya Roma, tsaujtoya niman kichiatoya mapeua ijkuak kiyolkuitiskiaj. Sekimej maski kimatstoyaj ika ueliskia itlaj tlen xkuajli kinchiuiliskiaj, oyajkej okitlajpalotoj. Pablo kimatstoya ika achijtsin poliuiya ijkuak mikiskia, kuakon okijkuilo: “Ye kuajli yonikchiu kanika ipan itekiu Dios ken se tlakatl ijkuak teuan notlatlani ipan se tlaksalistli. Aman notlatlalouilis yonitlan, niman xonikpoloj notlaneltok” (2 Timoteo 4:7). Ijkuak Pablo okijkuilo yejuin sa xouejkauj opanok niman okimiktijkej. Okimpaleui iamatlajkuiloluan Pablo akin kichiuaj ken Cristo mayolmelaujkanemikan, niman aman noijki kimpaleuijtika.

(Onokixti itech Romanos, 1 Corintios, 2 Corintios, Gálatas, Efesios, Filipenses, Colosenses, 1 Tesalonicenses, 2 Tesalonicenses, 1 Timoteo, 2 Timoteo, Tito, Filemón niman Hebreos.)

¿AKINON TEKONEUJ ITECH AKIN YONOIJTOKA UAJLASKIA?

Ijkuak Adán iuan Eva yotlajtlakojkaj, toTajtsin otlajto iuan kouatl niman okitekitilti yejuin tlajtoltin: “Nikchiuas maka xmouikakan tejua iuan yejon siuatl, niman maka manouikakan mokoneuj iuan yejua ikoneuj. Yejua mitspaxouilis motsontekon niman tejua tiktlanpaxouilis ikxi” (Génesis 3:15). Ipan Apocalipsis 12:9, kijtoua ika Diablo “sa no yejua on yeuejkaui kouatl”. Niman, yejon Tekoneuj akin kipaxouiliskia itsontekon xakaj kimatiya akinon yeskia niman ken opanotia melak miyek xiujtin Biblia oteasikamachiltijtia ika yolik.

Opanok kanaj dos mil xiujtin ijkuak Adán niman Eva otlajtlakojkej, Jehová okijto ika Temakixtijketl akin yonoijtoka uajlaskia, ualeuaskia itech ikoneuan Abrahán (Génesis 22:17, 18). Opanok okseki melak miyek xiujtin, niman Pablo okijto ika ikoneuj siuatl akin melak ueyixtika, oualeuj itech ikoneuan Abrahán yejua katka Mesías, kijtosneki, Jesús (Gálatas 3:16). Ijkuak omik Cristo okijtosnek kentla okikokojkej ipan “ikxi” tlen yonoijtoka ipan Génesis 3:15. San ika, toTajtsin okiyoliti Jesús niman “oyoliuj kentla espíritu” (1 Pedro 3:18, NM).

Noijki toTajtsin okinek ika 144,000 tlaltikpakchanejkej —ikoneuan yejon siuatl— akin tekitiskej iuan Jesús, noijki kiseliskiaj Tekiuajyotl tlen yonoijtoka kiminmakaskiaj (Gálatas 3:29; Apocalipsis 14:1). Ijkuak mikiskiaj, kiminyolitiskiaj kentla espíritus niman yaskej iluikak tekiuajtiskej iuan Cristo (Romanos 8:16, 17).

Kentla Tekiuaj ipan iluikak, Jesús kipopolos Diablo iuan ikoneuj, yejuin kijtosneki kimpopolos xkuakualtin espíritus niman tlaltikpakchanejkej xkuakualtin akin kipaleuiyaj Diablo (Juan 8:44; Efesios 6:12). Itekiuajyo kichiuas makipiyakan yolseuilistli niman pakilistli akin yolmelaujkanemij itech toTajtsin. Niman ijkon ontlamis, Jesús kipaxouilis “itsontekon” kouatl, kijtosneki kipopolos (Hebreos 2:14).