SECCIÓN 2
Okinkixtijkej itech Xochitlalpan
Se iluikaktekitketl akin xotetlakamat okichiuj ika Adán iuan Eva maka makitlakamatikan toTajtsin. Peua tlajtlakojli niman mikilistli ipan tlaltikpaktli
MIYEK xiujtin ijkuak xkichijchiuayaj tlaltikpakchane, toTajtsin okinchijchiuj iluikaktekitkej, espíritus akin xuelij tikimitaj. Semej yejuamej —akin okitokayotijkej Satanás noso Diablo— xotetlakamat niman okikajkayauj Eva, kuakon Eva okikua itlakilyo kojtli tlen toTajtsin okimijlika maka makikuakan.
Satanás okinots Eva ika se kouatl niman okijli ika ipampa toTajtsin yejua niman iueuentsin nopolouilijtoyaj tlen kuajli. Noijki okijli ika tla kikuaskiaj yejon tlakilyotl xmikiskiaj; ijkon okijtosnek ika toTajtsin okiminkajkayauj. Diablo melak kualtsin okitlajtlatouili, pampa okijli ika tla xtetlakamatiyaj kipiyaskiaj kuajli tlaixmatijli niman ueliskiaj kichiuaskiaj tlen yejuamej kinekiskiaj. San ika yejon katka se tlakajkayaualistli tlen kachtopa onoijto ipan yejuin tlaltikpaktli. Yejon tlakajkayaujketl yejuin tlen melak kinekiya kijtos: ¿Kimelaua toTajtsin matekiuajti ipan nochi tlen onka? ¿Melajkej itlanauatiluan? ¿Techpaleuiyaj matikintlakamatikan?
Eva okikajkayaujkej. Opeuj kileuiya yejon tlakilyotl, niman okikua. Sakin okimakak iueuentsin, niman noijki okikua. Maski manesi ika xtlaj tlen okichiujkej, okiteititijkej ika xotetlakamatkej, niman yejon se tlajtlakojli. Yejuamej kuajli kimatstoyaj tlen kichiujtoyaj: xkiselijtoyaj makinyekana akin okinchijchiuj, akin okiminmakaka nochi tlen kipiayaj, tlen noijki okiminmakaka nemilistli tlen xkipiaya tlajtlakojli.
“Yejua mitspaxouilis motsontekon niman tejua tiktlanpaxouilis ikxi.” (Génesis 3:15)
Ika tlen okichiujkej, toTajtsin okimijli yejon xtetlakamatkej tlenon iminpan nochiuaskia. Kachtopa okijto ika kuajtitlaniskia se Temakixtijketl akin kipopoloskia kouatl, kijtosneki Satanás. Niman okimijli Adán iuan Eva ika mikiskiaj, san ika okimikneli iminkoneuan tlen kipiyaskiaj, ika yejon xnimantsin omijkej. ¿Tlenon tlamachialistli kipiyaskiaj? Jehová okijto ika akin kuajtitlaniskia kipopoloskia nochi xkuajli tlen opeuj ne Edén. ¿Akinon yeskia yejuin Temakixtijketl, niman kenon kichiuaskia tlen ika toTajtsin kuajtitlaniskia? Yejuin ononankilijtia, ijkon ken okijkuilojtiajkej Biblia.
Kuakon toTajtsin okinkixti Adán iuan Eva itech Xochitlalpan. Pampa xok nemiyaj ipan xochitlalpan, aman nonekiya tekitiskej chikauak niman ijkon kipiyaskiaj tlen kikuaskej. Kuakon Eva okipix kachtopa ikoneuj, Caín. Sakin, Adán iuan Eva okipixkej oksekimej inkoneuan tlakamej niman siuamej, semej yejuamej Abel, niman Set iuejkachanejkauj Noé.
(Onokixti itech Génesis itlaxeloluan uejueyimej 3 ontlami 5 niman Apocalipsis 12:9.)