Kenon tiktekitiltis tomin

Tinochimej tikitaj ika noneki tomin niman ijkon tikinmakaskej tochanejkauan tlen kinpoloua (Proverbios 30:8). Yejuin ijkon pampa “tomin tepaleuiya” (Eclesiastés 7:​12). Kemantika ouijtika titlajtos itech tomin, san ika, maka xkauili ika yejuin makichiua xpiya tlauejli iuan moixnamik (Efesios 4:​32). Noneki xmoneltokakan niman san sekan xnemilikan kenon nenkitekitiltiskej tomin.

1 KUAJLI XNEMILI TLEN TIKCHIUAS

TLEN BIBLIA KIJTOUA: “Cada semej nemejuamej yejuan kineki kichijchiuas se torre, achtopa notlalia para kixtlaloua itomin tla kaxilis” (Lucas 14:​28). Noneki san sekan xnemilikan kenon nenkitekitiltiskej nemotomin (Amós 3:⁠3). Xkitakan tlenon noneki nenkikouaskej niman san kech tomin uelis nenkipopoloskej (Proverbios 31:​16). Maka xtlakokouakan san pampa nenkipiyaj tomin. Xyejyekokan maka xmotlaneuikan, san xpopolokan tomin tlen nenkipiyaj (Proverbios 21:5; 22:⁠7).

TLEN UELIS TIKCHIUAS:

• Tla nokaua seki tomin ijkuak ontlami metstli, xkita iuan moixnamik kenon nenkitekitiltiskej

• Tla xmechajxilia nemotomin, xnemilikan kenon xueyi nenkipopoloskej. Uelis nenkichiuaskej yejuin: maka xkouakan tlemach tlen xnoneki

2 XKIJTO TLEN MELAUAK NIMAN XKITA TLEN TIKPIYA

TLEN BIBLIA KIJTOUA: Melajki xmoyekana, “xsan ixpan toTeko, yej no imixpan on tlakamej” (2 Corintios 8:​21). Xkijli moixnamik tlen melauak, kech tiktlani niman kech tikpopoloua.

Ijkuak tiktlapejpenis ken tiktekitiltis tomin, nochipa kachtopa iuan xtlajto moixnamik (Proverbios 13:​10). Tla kuajli nentlajtouaj itech yejuin, mechpaleuis maka xpiyakan tlauejli ipan nemonamiktilis. Xkita tlen tiktlani ken nemotomin niman maka kentla san tejua motomin (1 Timoteo 5:8).

TLEN UELIS TIKCHIUAS:

• Xtlajto iuan moixnamik kech uelis nenkipopoloskej niman xnonekis nemotlajtoltiskej

• Xtlajtokan itech tomin ijkuak ok xnenkipiyaj tlaueltin