¿Xkuajli on tomin?

Tlen Biblia kijtoua

Biblia xkijtoua tla on tomin xkuajli. Noijki xkijtoua tla tlen xkuajli panoua, ualeujtika itech tomin. Miyekej kijtouanij ika tomin kichiua xpiya tlauejli niman kinemiliaj ika Biblia noijki ijkon kijtoua. San ika, Biblia ijkin kijtoua: “Ijkuak se sanoyej kixtlajsojtla tomin, ompa peua nochi tlajtlamach tlen xkuajli” (1 Timoteo 6:10).

¿Tlenon kijtoua Biblia itech tomin?

Biblia kijtoua ika tla kuajli tiktekitiltiaj tomintsin, uelis techpaleuis niman uelis ika totlajpiyaskej (Eclesiastés 7:12). Noijki kuajli tlajtoua intech akin kuelitaj kitemakaskej tlen kipiyaj niman tepaleuiskej ika intomintsin (Proverbios 11:25).

San ika, Biblia techijlia ika xnoneki kachtopa tiktejtemoskej tomintsin. Hebreos 13:5 kijtoua: “Maka sanoyej xnekikan nenkipiyaskej tomin. Yej xpakikan san ika on tlen nenkipiyaj”. ¿Tlenon techmachtia? Ika noneki tikitaskej tomintsin san ken kinamiki. Ika yejon, matipakikan tla tikpiyaj tlen tijkuaskej, tlen ika totlakentiskej niman kampa tichantiskej (1 Timoteo 6:8).

**¿Tleka melak teijtlako tla tiktlasojtlaj tomin?**

Akin kinekij kipiyaskej miyek tlemach xuelis nemiskej para nochipa (Efesios 5:5). ¿Tleka? Kachtopa, pampa akin kinekij kipiyaskej miyek tlemach kentla kiueyichiujtoskiaj yakaj akin xmelauak (Colosenses 3:5). Ika ome, pampa akin kinekij kipiyaskej miyek tlemach hasta kichiuaj tlen xkuajli san para kipiyaskej. Kanaj kinekiskej tekajkayauaskej, tlachtekiskej noso hasta kinekiskej temiktiskej. Ika yejon, Proverbios 28:20 kijtoua ika on “yejuan sanoyej kineki ricojtis kiselis icastigo”.

Niman, maski xtikchiuaskiaj tlen xkuajli, uelis tikinpiyaskej okseki tlaueltin tla melak tiktlasojtlaj tomin. Biblia techijlia: “On yejuan kinekij ricojtiskej, xkixikouaj on tetlatlatalistli yejuan kintlajkali ipan tlajtlakojli” (1 Timoteo 6:9).

Melak tepaleui tla tikchiuaj tlen kijtoua Biblia

Tla nochipa tiktlakaitaj ken tlanemilia toTajtsin niman xtikchiuaj tlen xkuajli san para totomintiskej, tinemiskej ika toyojlo niman tikyolpaktiskej toTajtsin. Tla tokojtiliaj tikchiuaskej tlen toTajtsin techijlia, yejua xkeman techkauas nion techtlalkauis (Hebreos 13:5, 6). Noijki kijtoua: “Sen tlakatl yejuan kipiya tlakaitalistli kiselis iueyitlaxtlauil” (Proverbios 28:20).

Biblia kijtoua kenon noneki tikitaskej tomin

Eclesiastés 7:12: “Tomin tepaleuiya”.

Tlen kijtosneki: Tla kuajli tiktekitiltiaj tomintsin, uelis techpaleuis niman uelis ika totlajpiyaskej.

Lucas 12:15: “Inemilis sen tlakatl xualejtikaj itech on tlen miyek kipiya”.

Tlen kijtosneki: Tomintsin xueyi kijtosneki niman xuelis techmakixtis.

1 Timoteo 6:10: “Ijkuak se sanoyej kixtlajsojtla tomin, ompa peua nochi tlajtlamach tlen xkuajli. Niman sekimej yejuan okeleuijkej tomin, okipolojkej intlaneltok, niman kipiyaj miyek ajmantli ipan innemilis”.

Tlen kijtosneki: Biblia xkijtoua tla tomintsin xkuajli. San ika, akin melak kitlasojtlaj tomintsin noso kitaj ika yejon más ueyi kijtosneki ipan innemilis, melak kipiyaj ajmantli. Xkuajli nemij imiuan inchanejkauan niman kualoj pampa melak tekitij.

Hebreos 13:5: “Maka sanoyej xnekikan nenkipiyaskej tomin. Yej xpakikan san ika on tlen nenkipiyaj”.

Tlen kijtosneki: Maka melak matiknekikan tikpiyaskej tomintsin, matipakikan san ika tlen tikpiyaj.

Mateo 19:24: “Ika mas ouijtikaj para sen rico kalakis ne kampa Dios tlamandaroua xken para sen camello panos ipan on kampa tlakoyoniaj ikan aguja”.

Tlen kijtosneki: Jesús kinekiya ika se telpochtli akin kipiaya tomintsin manochiua inomachtijkauj. San ika, yejon telpochtli xokinek pampa melak kitlasojtlaya tlen kipiaya. Tlen okijto Jesús kijtosneki ika tla más tiktlasojtlaj tomintsin xken toTajtsin, xuelis tikseliskej nemilistli tlen xkeman tlamis.