Tlen techpaleuis matipakikan san ika tlen tikpiyaj
Tinochimej tiknekij tiyolpakiskej maski tla titelpokamej, maski tla yotiueuentsintiakej noso maski tla yotonamiktijkej noso ka. Niman toTajtsin noijki kineki ijkon matomachilikan. Ika yejon, yejua techijlia tlenon uelis techpaleuis.
Chikauak xtekiti
“Ma kichiua sen tekitl yejuan kuajli para ma kipiya tlinon kinmakas on yejuan mayankej” (EFESIOS 4:28).
ToTajtsin kineki chikauak matitekitikan. ¿Tleka? Pampa akin kuelita tekitis uelis kimakas ifamilia tlen kipoloua, niman yejon kiyolpaktis. Noijki, hasta uelis kinpaleuis oksekimej. Akin tetlakeuaj más kinpatiojkaitaj akin chikauak tekitij, ika yejon, akin kuelitaj tekitiskej nochipa kipiyaj tekitl. Biblia kijtoua ika, akin chikauak tekiti, toTajtsin kiteochiua (Eclesiastés 3:13).
Maka xtekajkayaua
“Tejuamej tikmatstokej ipan tochipajkatlamachilis, ika tiknekij nochi tlajtlamach tikchiuaskej kuajli” (HEBREOS 13:18).
Tla xtitekajkayauaj, kuajli tomachiliskej, ika toyojlo tinemiskej niman kuajli tikochiskej. Noijki, oksekimej techtlakaitaskej niman totech tlaneltokaskej. Akin tekajkayauaj, xnemij ika inyojlo niman san nomojtitokej pampa kinemiliaj ika yakaj uelis kimatis tlen yokichiujkej.
Maka melak tiknekis tikpiyas tomin
“Maka sanoyej xnekikan nenkipiyaskej tomin. Yej xpakikan san ika on tlen nenkipiyaj” (HEBREOS 13:5).
Noneki tikpiyaskej tomin niman ijkon tijkouaskej tlen tijkuaskej niman okseki tlemach, san ika, melak xkuajli tla tiknekij tikpiyaskej miyek tlemach. Yakaj akin melak kuelita kipiyas miyek tlemach chikauak tekiti, san ika, akin ijkon kichiua uelis kijtlakos ifamilia pampa xmiyek tiempo iuan nemis niman hasta uelis kualos (1 Timoteo 6:9, 10). Kemantika akin melak kineki kipiyas miyek tomin uelis tekajkayauas niman tlachtekis. Se tlakatl akin melak tlamachilise katka okijto: “Sen tlakatl yejuan kipiya tlakaitalistli kiselis iueyitlaxtlauil, pero yejuan sanoyej kineki ricojtis kiselis icastigo” (Proverbios 28:20).
Kuajli xtlapejpeni tlen más mitspaleuis
“Nochipa xkejeua motlamachilis niman mokajsikamatilis” (PROVERBIOS 3:21).
Ijkuak techiskaltiaj, techmachtiaj kenon tikchiuaskej tlen kuajli niman kenon tiktlajpiyaskej tofamilia. San ika, maski ijkon techmachtiaj, xkijtosneki ika nochipa tiyolpakiskej noso tla xkeman itlaj techpolos. San ika, tla tiknekij tiyolpakiskej noneki tokauiliskej matechmachti toTajtsin. Biblia kijtoua ika nochimej akin kitlakamatij toTajtsin kuajli onkisaj (Salmo 1:1-3).