TLAMACHTIJLI 6
Chikueyimej makisaj
Noé, ichanejkauan niman yolkamej okalajkej ijtik akajli. Jehová okitsak puerta niman opeuj kiyaui. Pampa melak chikauak okiyauj, akajli onokauj ixko atl. Ika yolik, nochi tlaltikpaktli oten ika atl. Kiyauak itech akajli tlaltikpakchanejkej xkuakualtin omijkej. San ika, Noé niman ichanejkauan xtlaj inpan onochiuj. ¿Tiknemilia kenon melak opajkej ika okitlakamatkej Jehová?
Melak chikauak okiyauj 40 tonajli niman 40 yeuajli, sakin onotelti. Ika yolik atl opeuj temoua. Sakin, akajli osaliuj ipan tepemej. San ika, Noé iuan ichanejkauan xnimantsin ouel okiskej itech akajli pampa nochiuiyan onkatka atl.
Yolik otemotia atl. Noé iuan ichanejkauan kanaj ouejkaujkej ijtik akajli ipantsin se xiuitl. Kuakon, Jehová okimijli ika ueliskiaj kisaskiaj, nesiya kentla se yenkuik tlaltikpaktli. Melak okitlasojkamachilijkej Jehová ika okinmakixti niman okititijkej ika se uentli.
Jehová okiyolpakti yejon uentli. Yejua okijto ika xok keman kipopoloskia tlen onka ipan tlaltikpaktli ika se apachiuilistli. Pampa imiuan onotlajtolkauj, okichiuj ika ipan iluikak manesi kachtopa akosamalotl. ¿Kemantika yotikitak se?
Kuakon, Jehová okijli Noé iuan ichanejkauan makinpiyakan inkoneuan niman makitemiltikan tlaltikpaktli.
“Noé okalak ipan barco. Niman yejuamej xokichiuilijkej cuenta on tlen nochijtikatka, yej hasta ijkuak opeu kiaui niman on atl nochimej okinmiktij” (Mateo 24:38, 39).