Akajli tlen Noé okichijchiuj

Sakin, tlaltikpakchanejkej onomiyekilijkej ipan tlaltikpaktli. Miyekej xkuakualtin katkaj. Hasta sekimej iluikaktekitkej onochiujkej xkuakualtin. Yejuamej okikaujkej iluikak kampa chantiyaj niman ouajtemokej. ¿Tikmati tleka okichiujkej? Ijkon ueliskiaj nochiuaskej ken tlakamej niman nonamiktiskej iuan siuamej.

Iluikaktekitkej inuan insiuauan okinpixkej inkoneuan, akin melak kojtikej niman tlauelejkej katkaj. Yejuamej melak tetlajyouiltiayaj. Jehová xok kinkauiliskia ijkon makichiuakan. Kuakon yejua okijto kinpopolos akin xkuakualtin ika se apachiuilistli.

San ika, nemiya se tlakatl akin xijkon katka. Yejua okitlasojtlak Jehová. Itoka katka Noé. Yejua kipiaya isiuauj niman yeyi ikoneuan: Sem, Cam niman Jafet akin ikipiayaj insiuauan. Jehová okijli Noé makichijchiua se ueyi akajli kampa yejua niman ichanejkauan makisaskiaj itech Apachiuilistli. Yejuin akajli yeskia kentla se caja melak ueyi tlen yaskia ixko atl. Jehová noijki okijli Noé makinkalakti miyekej yolkamej ijtik akajli, ijkon noijki makisaskiaj.

Noé nimantsin opeuj kichijchiua akajli imiuan ichanejkauan. Ouekaujkej kanaj 50 xiuitl. Okichiujkej ken Jehová okinnauati. Itech nochi yejon xiuitl kech ouejkaujkej, Noé okiteijli ika uajlaskia se apachiuilistli. San ika, nion se xokikakisnek.

Oyejkok tonajli ijkuak okalajkej ijtik akajli. Tikitaskej tlenon opanok.