¿Akinomej otetlakamatkej ipan Apachiuilistli niman akinomej ka?

Ipan tonaltin ijkuak Noé onen, onochiuj tlen melak xkuajli (Génesis 6:5)

Adán iuan Eva okinpixkej inkoneuan, niman ipan tlaltikpaktli melak omiyekiyakej tlaltikpakchanejkej. Sakin, sekimej iluikaktekitkej noijki xokitlakamatkej toTajtsin, ken Satanás.

Yejuamej ouajlakej ipan tlaltikpaktli niman onochiujkej ken tlakamej niman ijkon ouelkej ononamiktijkej iuan siuamej. Yejuin siuamej okinpixkej inkoneuan melak uejkapamej, tlauelejkej niman kojtikej katkaj.

Ipan tlaltikpaktli omiyekiyakej tlaltikpakchanejkej akin okichiujkej tlemach tlen xkuajli. Biblia kijtoua ika tlaltikpakchanejkej melak xkuakualtin katkaj niman nochi tlen kinemiliayaj, katka san tlen xkuajli.

Noé okikak toTajtsin niman okichijchiuj se akajli (Génesis 6:​13, 14, 18, 19, 22)

Noé se kuajli tlakatl katka. Jehová okijli Noé ika kinpopoloskia tlaltikpakchanejkej xkuakualtin ika se apachiuilistli.

ToTajtsin okijli Noé makichijchiua se ueyi caja, itoka akajli, niman ompa makinuika ichanejkauan niman miyekej tlatlamantikej noso sejsenekamej yolkamej.

Noé okimijli tlaltikpakchanejkej ika uajlaskia se apachiuilistli, san ika, yejuamej xokineltokakej. Sekimej san okiuejuetskilijkej Noé niman oksekimej okitlauelitakej.

Ijkuak otlan kichijchiua akajli, Noé okinuikak yolkamej ijtik akajli.