Matiuelikan itech tlen yeuejkaui opanok

Jehová xkinkauilis tlaltikpakchanejkej makijtlakokan Xochitlalpan. San akin imiuan nouika ompa chantiskej. ¿Tlenon impan nochiuas tlaltikpakchanejkej xkuakualtin? Matikitakan tlenon opanok ipan itonaluan Noé uan ijkon tikmatiskej. Noé sajnoye yeuejkaui onen. Se kuajli tlakatl katka akin nochipa okiyejyeko kichiuas tlen Jehová kineki. San ika oksekimej kichiuayaj tlen xkuajli. Ika on, Jehová okijli Noé kuajkuis se apachiuilistli kampa kimpopolos nochi tlaltikpakchanejkej xkuakualtin. Noijki okinauati makichijchiua se akajli niman ijkon maka mamiki yejua iuan ichanejkauan ijkuak uajlaskia apachiuilistli (Hebreos 11:7).

Noé niman ichanejkauan okichichijkej akajli. Noé okinmachilti oksekimej tlaltikpakchanejkej ika uajlaskia se apachiuilistli, san ika xakaj okikak. Ok kichiuayaj tlen xkuajli. Ijkuak Noé otlan kichijchiua akajli, ompa okinkalakti yolkamej, niman sakin yejua okalak iuan ichanejkauan. Kuakon, Jehová okuajkuik se kiaujtli temojti chikauak. Okiyauj cuarenta tonaltin niman cuarenta youajli, niman atl okitlapacho nochi tlaltikpaktli (Mateo 24:37-39).

Tlaltikpakchanejkej xkuakualtin omijkej, Noé niman ichanejkauan omakiskej. Jehová okintlapili ipan Apachiuilistli niman okinuikak ipan tlaltikpaktli kampa xnochiuaya tlen xkuajli (1 Pedro 3:20). Biblia kijtoa ika oksepa yejkos on tonajli, ijkuak Jehová kimpopolos nochi akinon xkineki kichiuaskej tlen melaktik. Tlaltikpakchanejkej kuakualtin xkimpopoloskej. Nemiskej nochipa ipan se Xochitlalpan (2 Pedro 2:5, 6, 9).

Aman tonaltin, miyekej kichiuaj tlen xkuajli. Tlaltikpaktli tentika ika tlauejli. Jehová kintitlani iTeixpantijkauan miyekpa makinmachiltitij tlaltikpakchanejkej, san ika miyekej xkinekij kikakiskej itlajtoluan Jehová. Xkinekij kipatlaskej iminemilis niman xkinekij toTajtsin makimijli tlen kuajli niman tlen xkuajli. ¿Tlen impan nochiuas in tlaltikpakchanejkej? ¿Nopatlaskej kemantika? Miyekej xkeman nopatlaskej. Inonisiuiya on tonajli kampa nochi akin xkuakualtin kimpopoloskej iyeka (Salmo 92:7).

Tlaltikpaktli xpopoliuis; kikuepaskej se xochitlalpan. Akin iuan nouikaj toTajtsin nemiskej nochipa ipan Xochitlalpan nikan ipan tlaltikpaktli (Salmo 37:29).