Torre tlen onochijchiuj ipan Babel

Ijkuak yopanoka Apachiuilistli, ikoneuan Noé iuan insiuauan okinpixkej miyekej inkoneuan. Inchanejkauan onomiyekilijkej niman ochantitoj miyekan ijkon ken Jehová okiminauatijka.

San ika, sekimej xokitlakamatkej Jehová. Yejuamej okijtokej: “Matikchijchiuakan se ueyikalpan niman ompa matokauakan. Matikchijchiuakan se torre melak uejkapan tlen maajsi iluikak. Kuakon nochimej techixmatiskej”.

Jehová xokuelitak tlen kichiujtoyaj, ika yejon okintelti. ¿Tikmati kenon okichiuj? Nimantsin yejua okichiuj ika maka sa noijki tlajtoltin matlajtokan. Pampa xok nasikamatiyaj, okiteltijkej tlen kichijchiujtoyaj. Yejon ueyikalpan onoixmat ken Babel, tlen kijtosneki “xnasikamatilo”. Tlaltikpakchanejkej opeuj kisaj niman ochantitoj ipan nochi tlaltikpaktli. San ika, ok kichiujtoyaj tlen xkuajli kampa oyajkej. ¿Nemiskia yakaj akin kitlasojtlaskia Jehová? Tikitaskej ipan okse tlamachtijli.