Inomachtijkauan Cristo okiselijkej espíritu santo

Ijkuak yopanoka majtlaktli tonajli ika Jesús onokuep iluikak, inomachtijkauan okiselijkej espíritu santo. Ipan Pentecostés xiuitl 33, miyekej akin oksekan ualeuayaj onosentlalijkej Jerusalén oiluipanotoj. Ipan se kajli onosentlalijkej kanaj 120 inomachtijkauan Jesús. Kuakon, opanok itlaj tlen melak temojkatlachialti. Itlaj tlen nesiya kentla se tlitl ouajnonexti inkuatipan sesentetl inomachtijkauj Cristo, niman nochimej opeuj tlajtouaj ika miyekej tlajtoltin. Niman ipan kajli, okakistik kentla se chikauak ajakatl.

Akin oksekan ualeuayaj niman oyajkaj Jerusalén, okikakej tlen okakistik niman onotlalojkej okitatoj tlenon opanok ipan kajli. Melak otlamojkaitakej ijkuak okinkakej inomachtijkauan Cristo tlajtojtoyaj ika miyek tlajtoltin. Yejuamej kijtouayaj: “¿Kenijki tlajtouaj ika totlajtol ijkuak yejuamej ualeuaj Galilea?”.

Kuakon Pedro niman oksekimej tlatitlankej onotelketskej imixpan nochimej. Pedro okimijli akin ompa nemiyaj kenon okimiktijkej Jesús niman kenon Jehová okiyoliti. Yejua okijto: “Aman Jesús nemi iluikak iyekmakopa toTajtsin niman yotechmakak espíritu santo tlen otechijli techmakas. Yejua ika yonenkitakej niman yonenkikakej yejuin milagros”.

Itlajtoluan Pedro oajsik ipan inyojlo tlaltikpakchanejkej. Yejuamej okitlajtoltijkej: “¿Tlenon noneki tikchiuaskej?”. Pedro okimijli: “Xmoyolkuepakan itech nemotlajtlakoluan niman xmoapolaktikan ika itokayo Jesús. Noijki nenkiseliskej ken tetlayokolijli espíritu santo”. Ipan yejon tonajli, kanaj 3,000 onoapolaktijkej. Yejon tonajli ika tlayekapan opeujkej miyekiyaj inomachtijkauan Cristo ipan Jerusalén. Pampa kipiayaj espíritu santo, tlatitlankej opeujkej tlapaleuiyaj manochijchiuakan tlanechikoltin. Ijkon yejuamej ueliskiaj kinmachtiskej inomachtijkauan Cristo nochi tlen yejua yokinnauatijka.