TLAMACHTIJLI 18

Makimatikan ika itlaj okseki okixmatkej

1 Corintios 9:19-23

TLEN TIUELIS: Xkintlanemililti akin mitskaktokej; makimachilikan ika ouelkej itlaj tlen kinpaleuis.

Xkilnamikto tlen ikimatij akin mitskakiskej. Maka san xkimijli tlen ikimatij noso tlen yokinkakiltijkaj, xkinpaleui makitakan ika yejon tlamachtijli uelis itlaj okse kinmachtis.

Xtekitilti san achijtsin tiempo itech tlen ikixmatij akin mitskakiskej, niman xuejkaui ijkuak titlajtos itech tlen yenkuik tikinmachtis.
Xkaua tiempo tlen ika timomachtis niman titlanemilis. Tla tiueli, xtetomili tlen ueyi kijtosneki ika itlaj tlen miyekej xkixmatij noso ika itlaj tlen kemach onochiuj. Kuajli xtlanemili itech tlen noneki tiktetomilis niman kenon notlajtolnamiki iuan okseki tlen tijkuis ipan motlamachtil.

Ijkuak timomachtis itech tlen titlajtos, xmotlajtolti yejuin: ¿tlenon?, ¿tleka?, ¿kemanon?, ¿kanon?, ¿akinon? niman ¿kenon? Xkualtsintili motlamachtil, niman tikchiuas yejuin tla titetlajtoltia niman tiknankilia tlen yotikonteneujkej ijkuak titemachtis.
Xteititi kenon uelis nochiuas tlen tikimijlia. Xkintomili akin mitskaktokej kenon uelis kinpaleuis itlajtolyekanalisuan Biblia ipan innemilis. Xteneua tlen nochiujtika ipan innemilis, ken tlanemiliaj miyekej niman tlen kixmatij akin mitskakiskej.