TLAMACHTIJLI 20
¿Akinon kinyekana iteixpantijkauan Jehová?
Jehová kineki ika nochi kuajli manochiua (1 Corintios 14:33, 40). Yejua ika, yakaj yokitlali niman ijkon makiyekana ikalpan. ¿Akinon kiyekana ikalpan? ¿Kenijki uelis titlapaleuiskej ipan ikalpan?
1. ¿Akinon kinyekana iteixpantijkauan Jehová?
Biblia kijtoua: “Cristo yejua tlayekanki intech on yejuan kineltokaj” (Efesios 5:23). Desde ne iluikak, Jesús kuajyekantika tlen kichiua ikalpan toTajtsin. San ika, xsan yejua kichiua yejuin tekitl. Yejua yokitlali se “tekitketl” yolmelauak niman tlamachilise niman ijkon makipaleui. ¿Akinon yejon “tekitketl”? Ijkin noixmati se grupo kampa nemij sekimej tokniuan akin youejkaujkej ika kitekichiuiliaj Jehová. Yejuin grupo noijki noixmati ken Grupo akin Tlayekana ipan nochi tlanechikoltin (xkita Mateo 24:45-47). Yejuin tokniuan kiyekanaj tekitl tlen nochiua ipan tlanechikoltin, ijkon ken kichiuayaj apóstoles niman oksekimej tokniuan de Jerusalén akin yeuejkaui onenkej (Hechos 15:2). Yejuin tokniuan xtikimitaj ken totlayekankauan noso ken akin uejueyixtokej. Yejuamej nochipa kitlajtlaniliaj Jehová makinpaleui, kuajli kitaj tlen kijtoua Biblia niman kinokauiliaj makinyekana Jesús.
2. ¿Tlenon kichiuaj tlayekankej?
Ipan tlanechikojli nemij sekimej tokniuan akin kimixmatij ken tlayekankej. Yejuamej techmachtiaj itech Biblia, techyolchikauaj niman techpaleuiyaj. Yejuamej xkintlaxtlauiliaj. Yejuin tokniuan tekitij para toTajtsin niman kichiuaj ika nochi inyojlo (1 Pedro 5:1, 2). Ipan tlanechikojli noijki nemij sekimej tokniuan akin kimixmatij ken tlapaleuijkej noso siervos ministeriales. Yejuamej kinpaleuiyaj tlayekankej niman, tla yejuamej kuajli tekitij, satepan noijki uelis nochiuaskej tlayekankej.
Grupo akin Tlayekana kintlapejpenia sekimej tlayekankej niman ijkon manochiuakan tlayekankej ipan circuito. Yejuin tokniuan kintlajpalojtinemij miyek tlanechikoltin niman ijkon kinyolchikauaskej niman kinpaleuiskej. Yejuamej noijki kitaj akinomej uelis nochiuaskej tlayekankej noso tlapaleuijkej. Ijkuak kichiuaj yejuin, kuajli kitaj tlen kijtoua Biblia (1 Timoteo 3:1-10, 12; Tito 1:5-9).
3. ¿Kenijki tlapaleuiya cada se iteixpantijkauj Jehová ipan tlanechikojli?
Nochimej akin nemij ipan tlanechikojli kiueyiteneuaj itoka Jehová. Ijkon kichiuaj ijkuak tenojnotsaj, ijkuak tlanankiliaj ipan tlanechikoltin niman ijkuak kichiuaj okse tekitl ipan ikalpan toTajtsin (xkita Salmo 148:12, 13).
OKSEKI XKASIKAMATI
Matikitakan kenijki tlayekana Jesús niman kenijki tlayekankej nokojtiliaj kichiuaskej ken yejua. Noijki matikitakan tlenon uelis tikchiuaskej niman ijkon tikpaleuiskej Jesús niman tlayekankej.
4. Jesús melak kuajli ken tlayekana
Jesús kineki techyekanas pampa kineki kuajli matinemikan. Xkitakan Mateo 11:28-30 niman xtlajtokan itech yejuin:
¿Kenijki tomachiliskej tla tokauiliaj matechyekana niman matechpaleui Jesús?
¿Kenijki tlayekankej kichiuaj ijkon ken Jesús? Xkitakan VIDEO.
Biblia kijtoua kenijki noneki tlapaleuiskej tlayekankej.
Xkitakan Isaías 32:2 niman 1 Pedro 5:1-3, niman xtlajtokan itech yejuin:
Jesús tepaleuiaya niman teyolseuiaya. Tlayekankej noijki nokojtiliaj ijkon kichiuaskej. ¿Tlenon tiknemilia itech yejuin?
¿Tlenon okseki kichiuaj tlayekankej niman ijkon kiteititiskej ika yejuamej kichiuaj ken Jesús?
5. Tlayekankej kichiuaj tlen temachtiaj
Jesús kineki ika tlayekankej kuajli makichiuakan intekiyo. Xkitakan VIDEO.
Jesús okijto tlenon noneki kichiuaskej tlayekankej niman tlenon xnoneki kichiuaskej. Xkitakan Mateo 23:8-12 niman xtlajtokan itech yejuin:
Ijkon ken otikitakej ipan yejuin textos, ¿tlenon xnoneki kichiuaskej tlayekankej? ¿Tiknemilia ika teopixkej niman oksekimej akin tlayekanaj ipan religiones kichiuaj tlen okijto Jesús?
Tlayekankej inselti nomachtiaj Biblia niman nomachtiaj imiuan infamilia.
Tlayekankej kinpaleuiyaj akin nemij ipan tlanechikojli.
Tlayekankej nochipa tenojnotsaj.
Tlayekankej temachtiaj. Noijki tlapaleuiyaj ijkuak tlachipauaj ipan tlanechikojli.
6. Tikinpaleuiyaj tlayekankej
Biblia techijlia ika noneki tikinpaleuiskej tlayekankej. Xkitakan Hebreos 13:17 niman xtlajtokan itech yejuin:
¿Tiknemilia ika techpaleuis tla tikintlakamatij tlayekankej ijkon ken kijtoua Biblia? ¿Tleka ijkon tiknemilia?
Xkitakan Lucas 16:10 niman xtlajtokan itech yejuin:
¿Tleka melak noneki matikchiuakan tlen techijliskej tlayekankej maski kanaj tikitaskej ika xueyi kijtosneki?
SEKIMEJ KIJTOUAJ: “Xnoneki ninosentlalis imiuan oksekimej para nikueyichiuas toTajtsin”.
¿Tleka melak kuajli tla tejuamej tosentlaliaj imiuan oksekimej niman ijkon tikueyichiuaskej toTajtsin?
TLEN OTIUEL
Jesús kiyekana ikalpan toTajtsin, niman yokintlali tlayekankej niman ijkon makipaleuikan. Tejuamej ika toyojlo tikintlakamatij yejuin tokniuan pampa melak techpaleuiyaj niman pampa kichiuaj tlen techmachtiaj.
¿Kenon titlanankiliskia?
¿Akinon kinyekana iteixpantijkauan Jehová?
¿Tlenon kichiuaj tlayekankej ipan tlanechikojli?
¿Kenijki tlapaleuiya cada se iteixpantijkauj Jehová ipan tlanechikojli?
OKSEKI XKITA
Xkita kenijki Grupo akin Tlayekana niman tlayekankej melak kintlasojtlaj nochimej tokniuan.
Xkita tlenon kichiuaj tlayekankej ipan circuito.
Inemilis se tlayekanketl ipan circuito ipan uejka kalpamej (4:51)
Xkita kenijki tepaleuiyaj siuamej ipan tlanechikojli.
Xkita kenijki tlayekankej melak nokojtiliaj niman ijkon kinyolchikauaskej imikniuan.
“Tlayekankej techpaleuiyaj matipakikan” (Amatl Tekakistilijketl, 15 de enero de 2013)