“Makinnotsa tlayekankej”

1. ¿Kenijki yokiteititi Jehová ika kintlasojtla nochimej iborreguitos?

JEHOVÁ melak kintlasojtla nochimej iborreguitos. Yejua okitemakak iKoneuj inpampa iborreguitos niman okintlajtlanili tlayekankej makintlajpiyakan (Hech. 20:28). ToTajtsin okitekitlali Jesús niman ijkon yejua matlayekana ipan tlanechikoltin, niman yejuamej kinekij ika tlayekankej makimititikan iborreguitos ika kintlasojtlaj. Tlayekankej kichiuaj ijkon ken Jesús okiminauati niman kinpaleuiyaj borreguitos kuajli manouikakan iuan toTajtsin Jehová (Is. 32:​1, 2).

2. ¿Akinomej más kinpaleuiya Jehová? (Ezequiel 34:​15, 16).

² Jehová najmana inpampa nochimej iborreguitos, san ika, más kineki kinpaleuis akin xok chikauak kipiyaj intlaneltok. Yejua kintekitiltia tlayekankej niman ijkon kinpaleuis akin yokichiujkej se tlajtlakojli (xpoua Ezequiel 34:​15, 16). Kuakon, ¿tlenon noneki tikchiuaskej tla noneki matechpaleuikan? ToTajtsin kineki matikchiuakan teoyotl, san ika, noijki techijlia matikinnotsakan tlajpixkej niman “temachtijkej” itech tlanechikojli (Efes. 4:​11, 12).

3. ¿Tleka yejuin tlamachtijli tinochimej techpaleuis?

³ Ipan yejuin tlamachtijli tiueliskej kenijki Jehová kintekitiltia tlayekankej niman ijkon kinpaleuis akin xok más chikauak kipiyaj intlaneltok. Noijki tiknankiliskej yejuin: ¿kemanon noneki tikinnotsaskej tlayekankej?, ¿tleka noneki ijkon tikchiuaskej? niman ¿kenijki techpaleuiskej? Yejuin tlamachtijli noijki kinpaleuis akin chikajtok intlaneltok, pampa kichiuas ika tinochimej matikpatiojkaitakan tlapaleuilistli tlen Jehová techmaka intechkopa tlayekankej, niman techmachtis tlenon uelis tikchiuaskej tla ika tlayekapan noneki tikinnotsaskej tlayekankej.

¿KEMANON NONEKI TIKINNOTSASKEJ TLAYEKANKEJ?

4. ¿Kenijki tikmatij ika ipan Santiago 5:​14-16, 19, 20 tlajtojtika itech yakaj akin xok chikauak kipiya itlaneltok? (Noijki xkimita tlaixkopinaltin).

⁴ Santiago techijlia kenijki techpaleuiya Jehová intechkopa tlayekankej. Yejua okijkuilo: “¿Nemi yakaj akin kualo? Makinnotsa tlayekankej akin nemij ipan tlanechikojli” (xpoua Santiago 5:​14-16, 19, 20). Nikan Santiago tlajtojtoya itech yakaj akin xok kipiya chikauak itlaneltok. ¿Kenijki tikmatij? Ipampa tlen sakin kijtoua tlaxelojli. Kachtopa, xkijlia akin kualo makimitati tlapajtijkej, yej kijlia makimitati tlayekankej. Ika ome, kijlia akin kualo ika pajtis ijkuak kitlapopoluiskej itlajtlakoluan. Yakaj akin kualo noneki konitas tlapajtijketl niman ijkon pajtis, kijlis tlen kokolistli kipiya niman sakin kichiuas ijkon ken kijliaj. Noijki ijkon, tla tiknekij tlapaleuilistli niman ijkon oksejpa kuajli touikaskej iuan Jehová, noneki titlajtoskej imiuan tlayekankej, tikimijliskej tlenon tikpiyaj niman tikchiuaskej ijkon ken yejuamej techijliskej tlen kisa itech Biblia.

5. ¿Kenijki uelis tikitaskej tla ok kuajli touikaj iuan Jehová?

⁵ Ipan capítulo 5 de Santiago techijlia matikintlajtlanilikan tlayekankej matechpaleuikan ijkuak tikitaskej ika totlaneltok xok más chikajtok. San ika, melak noneki matiktlajtlanikan matechpaleuikan achto ika ijtlakauis ken touikaj iuan Jehová. Niman noneki totlajpiyaskej, pampa Biblia techijlia ika uelis tokajkayauaskej niman tiknemiliskej ika kuajli touikaj iuan Jehová (Sant. 1:22). Yejuin tlen okinpanok sekimej tokniuan akin chantiyaj Sardis: kinemiliayaj ika kuajli nouikayaj iuan Jehová, san ika, Jesús okimijli ika xijkon katka (Apoc. 3:​1, 2). ¿Kenijki uelis tikitaskej tla ok kuajli touikaj iuan Jehová? Matikitakan tla ok melak tiyolpakij ijkuak titenojnotsaj ken ijkuak kemach otitoapolaktijkej (Apoc. 2:​4, 5). Uelis ijkin totlajtoltiskej: “¿Ok niyolpaki nikpouas Biblia niman itech nitlanemilis? ¿Ok ninokojtilia nochipa nias tlanechikojli niman ninoyektlalis achto nias? ¿Ok nikpatiojkaita nitenojnotsas? ¿Más nitlanemilia itech kenijki ninoyolpaktis niman niktlanis tomin?”. Ken tiknankiliskej yejuin techititis tla yemelak ok kuajli touikaj iuan Jehová, yejuin uelis techijtlakos tla xtlaj tikchiuaj. Tla xtiuelij san toselti tikchikauaj totlaneltok noso tla yotikchiujkej itlaj tlen xkuelita Jehová, noneki tikintlajtlaniliskej tlayekankej matechpaleuikan.

6. ¿Tlenon noneki kichiuas yakaj akin yokichiuj se ueyi tlajtlakojli?

⁶ Ken yotikitakej, tla yakaj yokichiuj se ueyi tlajtlakojli tlen ueliskia kichiuas makikixtikan itech tlanechikojli, noneki kimijlis tlayekankej (1 Cor. 5:​11-13). Yejua noneki makipaleuikan niman ijkon uelis oksejpa nouikas iuan toTajtsin. Jehová san uelis techtlapopoluis tla tikteititiaj ika tlen tikchiuaj ika yemelauak yotoyolkuepkej (Hech. 26:20). Niman uelis tikteititiskej ika yemelauak yotoyolkuepkej tla tikimijliaj tlayekankej ika yotikchiujkej se ueyi tlajtlakojli.

7. ¿Akinomej noijki noneki makinpaleuikan tlayekankej?

⁷ Tlayekankej xsan kinpaleuiyaj akin yokichiujkej se ueyi tlajtlakojli, noijki kinpaleuiyaj akin xok chikauak kipiyaj intlaneltok (Hech. 20:35). Matikonnemilikan ika timoxijxikojtika iuan itlaj tlen xkuajli tikileuiya niman tikmachilia ika xtitlaxikos. Kanaj ijkuak xetimomachtiaya Biblia tikinkuiya drogas, tikitaya pornografía noso tiauilnemiya, niman yejuin kichiua más ouijtika xkita tikxikos tlen xkuajli tikileuiya. San ika, melak kuajli pampa xmoselti tinemi. Uelis titlajtos iuan se tlayekanketl akin tikitas ika kuajli mitskakis. Kuajli tikmatstokej ika yejua mitsijlis tlenon uelis tikchiuas niman mitsilnamiktis ika ok uelis tikyolpaktis Jehová tla tejua xtikchiua tlen xkuajli tikileuiya (Ecl. 4:12). Tla xkuajli timomachilia pampa ok tikileuiya tlen xkuajli, tlayekankej uelis mitsilnamiktiskej ika yejon kiteititia ika tikpatiojkaita timouikas iuan Jehová niman ika xsan motech titlaneltoka (1 Cor. 10:12).

8. ¿Tlenon xnoneki nimantsin tikimijliskej tlayekankej?

⁸ Xnoneki nochipa tikimijliskej tlayekankej ijkuak topopolouaj. Matikonnemilikan ika otikijli itlaj se tokniuj tlen okiyolkoko niman hasta otikualan. Xnoneki nimantsin tikijlijtiuetsis se tlayekanketl, yej, más kuajli tla tikyektlalia yejon tlauejli iuan tokniuj ijkon ken Jesús okijto (Mat. 5:​23, 24). Noijki uelis tiktejtemos ipan toamatlajkuiloluan kenijki uelis más tiyolseujki yes, titeijyouis niman san moselti timoteltis. San ika, tla maski ijkon xueli tikyektlalia yejon tlauejli, kanaj uelis tikijlis se tlayekanketl mamitspaleui. Ipan carta tlen okimijkuilouili Filipenses, apóstol Pablo okitlajtlanili se tokniuj ipan tlanechikojli makipaleui Evodia niman Síntique manoyolseuikan. Se tlayekanketl ipan motlanechikol noijki uelis ijkon mitspaleuis (Filip. 4:​2, 3).

¿TLEKA NONEKI TIKINNOTSASKEJ TLAYEKANKEJ?

9. ¿Tleka noneki titlajtoskej iuan tlayekankej maski tla kanaj tipinauij ipampa tlen xkuajli otikchiujkej? (Proverbios 28:13).

⁹ Noneki titlaneltokaskej niman titoyolchikauaskej para uelis titlajtoskej iuan tlayekankej tla tikmachiliaj ika xuelis tikxikoskej tlen xkuajli tikileuiyaj noso tla yotikchiujkej se ueyi tlajtlakojli. San ika ¿tleka noneki tikimijliskej tlayekankej tlen xkuajli yotikchiujkej maski tla tipinauij? Matikilnamikikan ika Jehová yotechinmakak tlayekankej niman ijkon matechpaleuikan machikaujto totlaneltok. Kuakon, tla tikintlajtlaniliaj tlayekankej matechpaleuikan, tikteititiskej ika titlaneltokaj itech toTajtsin niman itech itlanauatiluan. Kuajli tikmatstokej ika Jehová techpaleuis ika tlen toxijxikouaj (Sal. 94:18). Niman kuajli tikmatstokej ika tla tikteijliaj tlen xkuajli otikchiujkej niman xok tikchiuaj, Jehová techiknelis niman techtlapopoluis (xpoua Proverbios 28:13).

10. ¿Tlenon ueliskia panos tla tikimiyanaj totlajtlakoluan?

¹⁰ Ken yotikitakej, tla tikimijliaj tlayekankej ijkuak itlaj xkuajli yotikchiujkej melak techpaleuiya. San ika, tla tikimiyanaj totlajtlakoluan uelis melak xkuajli tonkisaskej. Matontlanemilikan itech tekiuaj David. Ijkuak yejua xkiteijliaya tlen xkuajli yokichiujka, melak tlajyouiaya, najmanaya niman melak noyolkokouaya pampa kimatstoya ika xok nouikaya iuan Jehová (Sal. 32:​3-5). Tla xnimantsin titopajtiaj ijkuak tikualoj, más titlanauiskej. Noijki ijkon, tla yotikchiujkej se ueyi tlajtlakojli niman xtikintlajtlaniliaj tlayekankej matechpaleuikan, uelis hasta xok touikaskej iuan Jehová. Yejua xkineki ijkon topan manochiua, ika yejon, techijlia matikinnotsakan tlayekankej niman ijkon matechpaleuikan oksejpa kuajli iuan matouikakan (Is. 1:​5, 6, 18).

11. ¿Tlenon uelis más panos tla yakaj xkiteijlia tla yokichiuj se ueyi tlajtlakojli?

¹¹ Tla yotikchiujkej se ueyi tlajtlakojli niman xtlaj tikteijliaj, noijki uelis kimijtlakos oksekimej. Uelis kichiuas ika iespíritu santo toTajtsin maka kuajli matekiti ipan tlanechikojli niman ika tokniuan maka kuajli manomachilikan (Efes. 4:30). Niman tla tikmatij ika se tokniuj ipan tlanechikojli yokichiuj se ueyi tlajtlakojli, noneki tikijliskej makimijli tlayekankej.a Maka matikilkauakan ika tla xtlaj tikteijliaj kentla tejuamej noijki tikpiyaskiaj tlajtlakojli (Lev. 5:1). Pampa tiktlasojtlaj Jehová, tikimijliskej tlayekankej tla yakaj yokichiuj se ueyi tlajtlakojli. Ijkuak ijkon tikchiuaj, tikintlajpiyaj tokniuan ipan tlanechikojli niman tikpaleuiyaj akin yotlajtlako oksejpa kuajli manouika iuan Jehová.

¿KENIJKI TECHPALEUIYAJ TLAYEKANKEJ?

12. ¿Kenijki kinpaleuiyaj tokniuan akin xok kuajli nouikaj iuan Jehová?

¹² Biblia kintlajtlanilia tlayekankej makinpaleuikan tokniuan akin xok kuajli nouikaj iuan Jehová (1 Tes. 5:14). Tla yotikchiuj se ueyi tlajtlakojli, tlayekankej kitaskej tlenon mitstlajtoltiskej niman ijkon mitspaleuiskej xkijto tlenon tikmachilia niman tlenon tiknemilia (Prov. 20:5). Kanaj ouijtika tikitas titlajtos iuan tlayekankej, kanaj tipinaui tikimijlis tlen xkuajli yotikchiuj, san ika, tla nochi kuajli tikimijlia, tikinpaleuis kuajli makichiuakan intekiyo. Maka xmajmana tla itlaj xkuajli otikijto (Job 6:3). Tlayekankej xnimantsin itlaj kinemilijtiuetsiskej, yejuamej nokojtiliskej kuajli mitskakiskej niman kuajli kimatiskej tlenon opanok achto mitsijliskej tlenon noneki tikchiuas (Prov. 18:13). Tlayekankej kuajli kimatstokej ika noneki tiempo para uelis kipaleuiskej se tokniuj niman ika kemantika noneki miyekpa iuan tlajtoskej.

13. ¿Tlenon más kichiuaskej tlayekankej niman ijkon techpaleuiskej? (Noijki xkimita tlaixkopinaltin).

¹³ Tlayekankej nokojtiliskej xkijtoskej itlaj tlen makichiua más xmotlajtlakolti. Yejuamej mopampa kichiuaskej teoyotl niman Jehová kinkakis inteoyouan. Tikitas ika yejon teoyomej tlen “kipiya poder” kichiuas melak kuajli xmomachili. Yejuamej noijki mitspaleuiskej ijkuak mitstekiliskej “aceite ijkon ken Jehová kineki” (Sant. 5:​14-16). Yejuin “aceite” kijtosneki iTlajtol toTajtsin. Yejuamej kuajli kitekitiltiskej Biblia niman ijkon mitsyolseuiskej, mitsyolchikauaskej niman mitspaleuiskej oksejpa kuajli xmouika iuan Jehová (Is. 57:18). Tlaxeloltin tlen mitsinpouiliskej mitspaleuiskej xpiya kojtilistli para tikchiuas ken Jehová kineki. Jehová kintekitiltia tlayekankej, yejuamej mitsyekanaskej niman mitspaleuiskej para tikmatis tlenon noneki tikchiuas (Is. 30:21).

14. Ken kijtoua Gálatas 6:​1, ¿kenijki kinpaleuiyaj tlayekankej akin yokichiujkej tlen xkuajli? (Noijki xkimita tlaixkopinaltin).

¹⁴ (Xpoua Gálatas 6:1). Ijkuak ipan yejuin versículo kijtoua “itlaj tlen xkuajli”, kijtosneki ijkuak yakaj xkuajli tlen okitlapejpeni noso ijkuak yakaj okichiuj se ueyi tlajtlakojli. Tlasojtlalistli kichiuas ika tlayekankej maka makichikajkanotsakan tokniuj ijkuak kiyektlaliskej. Tlajtojli “nenkipaleuiskej”, ika griego noijki kijtosneki ijkuak yakaj kiyektlaliliaj noso kimelauiliaj kampa yopeton iomiyo para xnochipa kikokojtinemis. Se kuajli tlapajtijketl san kualtsin kiyektlalilia iomiyo akin onokoko para maka melak kikokos. Noijki ijkon, ijkuak tlayekankej kimelajkatlaliaj se tokniuj akin yokichiuj se tlajtlakojli, san kualtsin kijliaj tlenon noneki kichiuas pampa xkinekij más matlajyoui. Ijkuak tlayekankej kipaleuiyaj yakaj ika Biblia para makitlapejpeni tlen kuajli, nochipa kilnamikij ika yejuamej noijki nopopolouaj. Ika yejon, noneki nokojtiliskej xkinemiliskej ika yejuamej más kuajli kipiyaj inyojlo xken akin kipaleuijtokej. Yejuamej noneki yolyemankej yeskej niman kiteititiskej ika teikneliaj (1 Ped. 3:8).

15. ¿Tlenon uelis tikchiuaskej tla itlaj tikixnamiktokej?

¹⁵ Uelis titlaneltokaskej itech tlayekankej akin nemij ipan totlanechikol. Jehová yokinmachti tlayekankej ika xnoneki kiteijlitinemiskej tlen tikimijliaj. Noijki, yokinmachtijkej ika tlen techijliskej noneki kikixtiskej ipan Biblia niman xnoneki techijliskej tlen san yejuamej kinemiliaj ika kuajli, niman ika noneki ok techpaleuijtoskej ika tlen tikixnamikij (Prov. 11:13; Gál. 6:2). Yemelak, nochimej tlayekankej tlatlamantikej niman sekimej más youejkaujkej xken oksekimej, san ika, uelis san katlejua tlayekanketl tiktlajtlaniliskej matechpaleui. Kema, xnoneki nochimej tlayekankej tikimilijtinemiskej tlenon tikixnamikij pampa tiknekij matechijlikan tlen tiknekij tijkakiskej. Xtiknekij tiyeskej ken akin xkinekij kimatiskej “tlen tepaleui” niman san kinekij makimijlikan tlen yejuamej “kinekij kikakiskej” (2 Tim. 4:3). Ijkuak tikijliaj se tlayekanketl tlen tikixnamiktokej, kanaj techtlajtoltis tla yotitlajtokaj imiuan oksekimej tlayekankej niman kanaj noijki techtlajtoltis tlenon otechijlikej matikchiuakan. Niman pampa yejua kimatstika ika xnochi kimati, kanaj kinekis kitlajtoltis okse tlayekanketl tlenon uelis nochiuas (Prov. 13:10).

¿TLENON NONEKI TOSESELTI TIKCHIUASKEJ?

16. ¿Tlenon noneki toseselti tikchiuaskej?

¹⁶ Tlayekankej techtlajpiyaj niman techijliaj tlen techpaleuis, san ika, xtechijliaj tlenon noneki tikchiuaskej. Toseselti noneki tikitaskej tla tlen tikchiuaj niman tlen tikijtouaj kiteititia ika tiktlasojtlaj Jehová niman ika tiknekij tikyolpaktiskej (Rom. 14:12). Niman kuajli matikmatstokan ika Jehová techpaleuis matiktlapejpenikan tlen kuajli niman itech matimelajkanemikan. Ika yejon, tlayekankej xtechijliskej tlenon tikchiuaskej, yej, kitekitiltiskej Biblia niman ijkon techpaleuiskej matikasikamatikan kenijki tlanemilia Jehová niman sakin techkauiliskej tejuamej matiktlapejpenikan tlenon tikchiuaskej. Ijkuak tikchiuaj tlen kijtoua Biblia, tomajmachtiaj titlanemiliskej ken Jehová (Heb. 5:14).

17. ¿Tlenon tiknektokej tikchiuaskej?

¹⁷ ¡Melak kualtsin ika tiiborreguitos Jehová! Yejua okuajtitlan Jesús, “kuajli tlajpixketl”, para matechmakixtiki niman para matiuelikan matikpiyakan nemilistli tlen xkeman tlamis (Juan 10:11). Noijki, itechkopa tlayekankej, Jehová yokichiuj yejuin: “Nimechmakas akin mechtlajpiyas, yejuamej kichiuaskej tlen nejua nikneki. Niman mechpaleuiskej xpiyakan tlamachilistli niman tlamatkilistli” (Jer. 3:15). Ika yejon, tla xok chikauak tikpiyaj totlaneltok noso xok kuajli touikaj iuan Jehová, matikintlajtlanilikan tlayekankej matechpaleuikan. Matiknektokan matitopaleuikan ika tlen Jehová yotechtlayokoli.