Kenijki kimititiaj tlasojtlalistli niman teiknelilistli akin yokichiujkej se ueyi tlajtlakojli

1. Ijkuak yakaj kichiua se ueyi tlajtlakojli, ¿tlenon uelis panos tla kipaleuiyaj?

IPAN tlamachtijli tlen youajpanok, otikitakej ika apóstol Pablo okimijli tokniuan corintios tlenon nonekiya kichiuaskej ijkuak se tlakatl kichiujtoya se ueyi tlajtlakojli. Pampa xnoyolkuepaya, ononek kikixtiskej itech tlanechikojli. San ika, ijkon ken kijtoua texto kampa onokixti yejuin tlamachtijli, ueliskia kipaleuiskej makipatla iyojlo, noso, manoyolkuepa (Rom. 2:4). ¿Kenijki Jehová kintekitiltia tlayekankej niman ijkon kipaleuis manoyolkuepa akin otlajtlako?

2, 3. ¿Tlenon noneki tikchiuaskej tla tikmatij ika se tokniuj okichiuj se ueyi tlajtlakojli, niman tleka?

² Tlayekankej noneki kimatiskej tla yakaj okichiuj se tlajtlakojli niman ijkon uelis kipaleuiskej. Kuakon, ¿tlenon uelis tikchiuaskej tla tikmatij ika se tokniuj okichiuj se ueyi tlajtlakojli tlen ueliskia kichiuas makikixtikan itech tlanechikojli? Noneki tikyolchikauaskej makimijli tlayekankej makipaleuikan (Is. 1:18; Hech. 20:28; 1 Ped. 5:2).

³ San ika ¿tlenon noneki tikchiuaskej tla akin otlajtlako xkineki tlajtos imiuan tlayekankej? Noneki tejuamej tikimijliskej tlayekankej ika tokniuj yotlajtlako pampa tiknekij makipaleuikan. Tla ijkon tikchiuaj, tikititijtoskej tokniuj ika tiktlasojtlaj pampa xtiknekij makitlalkaui Jehová. Tla yejua xnopatla, más kijtlakos ken nouika iuan Jehová niman noijki ueliskia kichiuas ika oksekimej xkuajli makitakan tlanechikojli. Ika yejon, maski ouijtika yes, noneki toyolchikauaskej niman tikimijliskej tlayekankej pampa tiktlasojtlaj Jehová niman tokniuj (Sal. 27:14).

KENIJKI TLAYEKANKEJ KIPALEUIYAJ AKIN YOKICHIUJ SE UEYI TLAJTLAKOJLI

4. ¿Tlenon kinekij kichiuaskej tlayekankej ijkuak tlajtouaj iuan akin otlajtlako?

⁴ Ijkuak se tokniuj kichiua se ueyi tlajtlakojli, nochimej tlayekankej ipan tlanechikojli nosentlaliaj niman kintlapejpeniaj yeyimej tlayekankej para manemikan ipan se comité.a Yejuin tlayekankej yekimatij tlenon noneki nochiuas ijkuak yakaj tlajtlakoua. Yejuin comité nosentlalia niman tlajtoua iuan akin otlajtlako. Yejuin tlayekankej noneki kimatstoskej ika xnochi ueli kichiuaj niman noyolyemaniliskej. Noijki noneki kilnamikiskej ika maski nokojtiliskej kipaleuiskej akin otlajtlako, xuelis kichiualtiskej manoyolkuepa (Deut. 30:19). Kajsikamatij ika xnochimej akin tlajtlakouaj kinekij noyolkuepaskej, ijkon ken onoyolkuep tekiuaj David (2 Sam. 12:13). Sekimej xkinekij kikakiskej tlen Jehová kimijlia (Gén. 4:​6-8). Maski ijkon, tlayekankej nokojtiliaj kipaleuiskej akin otlajtlako manoyolkuepa. ¿Katlejua tlaxeloltin ipan Biblia kipaleuiya comité itech tlayekankej ijkuak tlajtouaj iuan akin otlajtlako?

5. ¿Tlenon noneki kilnamikiskej tlayekankej ijkuak tlajtouaj iuan akin otlajtlako? (2 Timoteo 2:​24-26; noijki xkita tlaixkopinajli).

⁵ Tlayekankej kitaj akin otlajtlako ken se iborreguito Jehová akin yopoliuj (Luc. 15:​4, 6). Ijkuak tlayekankej tlajtouaj iuan akin otlajtlako, xkitlauelnotsaj, yejuamej kititiaj ika kikneliaj. Noijki xkinemiliaj ika iuan nosentlaliaj san pampa noneki ijkon nochiuas noso pampa noneki miyek kitlatlajtoltiskej. Yejuamej kinteititiaj kualneskayomej tlen noteneuaj ipan 2 Timoteo 2:​24-26 (xpoua). Tlayekankej nochipa kuajli tenotsaj, teikneliaj niman xnimantsin kualanij ijkuak tlajtouaj iuan akin otlajtlako pampa kinekij kipaleuiskej manoyolkuepa.

6. ¿Kenijki tlayekankej kiyektlaliaj inyojlo achto tlajtoskej iuan akin otlajtlako? (Romanos 2:4).

⁶ Tlayekankej kiyektlaliaj inyojlo. Yejuamej kilnamiktokej tlen okijto Pablo: “Dios kijyouilia ikan itetlajsojtlalis pampa kineki kimakas tiempo para ma kipatla iyojlo” (xpoua Romanos 2:4). Yejuamej nokojtiliaj kiteititiskej ika kikneliaj akin otlajtlako, ijkon ken Jehová kichiua. Noneki kilnamikiskej ika yejuamej tlajpixkej niman ika noneki kichiuaskej ijkon ken Cristo okichiuj niman tlen okinnauati (Is. 11:​3, 4; Mat. 18:​18-20). Achto tlajtoskej iuan akin otlajtlako, tlayekankej kitlajtlaniliaj Jehová makinpaleui makipaleuikan manoyolkuepa. Noijki kitejtemouaj ipan Biblia niman ipan toamatlajkuiloluan tlen kinpaleuis, niman kitlajtlaniliaj Jehová makinmaka tlamachilistli niman ijkon kajsikamatiskej akin otlajtlako niman kajsikamatiskej tlen opanok. Noijki kijtouaj tlenon noneki kimatiskej niman ijkon kajsikamatiskej kanaj tleka akin otlajtlako opeuj xkuajli tlanemilia niman opeuj kichiua tlen xkuajli (Prov. 20:5).

7, 8. ¿Kenijki tlayekankej uelis kimijyouiskej akin yotlajtlakojkej ijkon ken Jehová kichiua?

⁷ Tlayekankej teijyouiyaj ijkon ken Jehová kichiua. Yejuamej kilnamikij kenijki yeuejkaui Jehová okinpaleui akin otlajtlakojkej. San matikonteneuakan Caín, Jehová okinots Caín niman okijli ika ueliskia oksejpa iuan nouikas niman noijki okijli tlenon panoskia tla xnopatlaya (Gén. 4:​6, 7). Niman sejpa katka, Jehová okititlan Natán para makiyektlali tekiuaj David, niman Natán okijli se neskayotl David niman ijkon kipaleuis (2 Sam. 12:​1-7). Noijki, Jehová miyekpa okintitlanili israelitas teotlajtojkej niman ijkon kinpaleuis israelitas manoyolkuepakan (Jer. 7:​24, 25). Yejua xokichiak ika itekipanojkauan kachtopa manoyolkuepakan niman ijkon kinpaleuis, yej nimantsin okitak kenijki kinpaleuis niman okimijli manoyolkuepakan ijkuak ok tlajtlakojtoyaj.

⁸ Jehová kimijyouiya akin kichiuaj se ueyi tlajtlakojli. ¿Kenijki tlayekankej uelis noijki ijkon kichiuaskej? Ijkon ken kijtoua 2 Timoteo 4:​2, yejuamej noneki kinotsaskej “ikan nochi ijyouilistli” akin otlajtlako. Yejuin kijtosneki ika noneki kualtsin kinotsaskej niman xsan totoka itlaj kijtojtiuetsiskej para uelis kiyolchikauaskej makichiua tlen kuajli. Tla tlayekankej nosiaujkauaj noso kualanij, akin otlajtlako kanaj xok kinkakis noso hasta xkinekis noyolkuepas.

9, 10. ¿Tlenon uelis kichiuaskej tlayekankej niman ijkon kipaleuiskej tokniuj akin otlajtlako?

⁹ Tlayekankej kitaj kanaj tlenon okichiuj ika tokniuj makichiua se tlajtlakojli. ¿Xok chikaujtok itlaneltok pampa xok más nomachtia noso xok más tenojnotsa? ¿Xok ika iyojlo kinotsa Jehová niman xok miyekpa kinotsa? ¿Okikauili tlen xkuajli kileuiya manoskalti ipan iyojlo? ¿Opeuj nouika imiuan akin xkitlakamatij Jehová noso opeuj noyolpaktia ika tlen xkuajli? ¿Kajsikamati ika tlen okichiuj okiyolkoko iTaj, Jehová?

¹⁰ Tlayekankej noneki kuajli kinemiliskej tlen kitlajtoltiskej tokniuj, niman xnoneki kitlajtoltiskej tlen xok noneki kimatiskej. Tla yejuamej kualtsin kitlatlajtoltiaj, akin otlajtlako kinektos kimijlis tlen opanok niman kenijki nomachilia, niman noijki kipaleuiskej makita tlenon okichiuj matlajtlako (Prov. 20:5). Niman ijkon ken Natán okipaleui David, tokniuan noijki uelis kijliskej se neskayotl akin otlajtlako niman ijkon kajsikamachiltiskej tleka xkuajli tlen okichiuj. Ijkuak kachtopa iuan nosentlaliskej, kanaj yejon tokniuj peuas melak noyolkokos ipampa tlen okichiuj noso kanaj hasta nimantsin noyolkuepas.

11. ¿Tlenon okichiuj Jesús inpampa akin otlajtlakojkej?

¹¹ Tlayekankej nokojtiliaj kichiuaskej ken Jesús. Sejpa, Jesús ijkin okitlajtolti Saulo de Tarso: “Saulo, Saulo, ¿tline tinechtlaueltotokatinemi?”. Yejua ijkin okitlajtolti pampa kinekiya kajsikamachiltis ika xkuajli tlen kichiujtoya (Hech. 9:​3-6). Niman ipan Apocalipsis 2:​20, 21 okiteneuj se siuatl akin itoka katka “Jezabel” niman ijkin okijto: “Onikmakak tiempo para ma noyolpatla”.

12, 13. ¿Tlenon uelis kichiuaskej tlayekankej niman ijkon kimakaskej tiempo akin otlajtlako para manoyolkuepa? (Noijki xkimita tlaixkopinaltin).

¹² Ijkon ken Jesús, tlayekankej xnimantsin kinemilijtiuetsij ika akin otlajtlako xkineki noyolkuepas. Sekimej ijkuak kemach imiuan nosentlaliaj nimantsin noyolkuepaj, san ika, sekimej más uejkauij ika noyolkuepaj. Kuakon, tlayekankej xsan sejpa noneki imiuan tlajtoskej. Kanaj akin otlajtlako peuas tlanemilis itech nochi tlen okijlijkej ijkuak kemach iuan onosentlalijkej niman kanaj peuas noyolyemanilis niman kinekis kitlajtlanilis Jehová makitlapojpolui (Sal. 32:5; 38:18). Niman ijkuak tlayekankej oksejpa iuan tlajtoskej, kanaj yejua kuajli yonopatlak.

¹³ Tlayekankej noneki kikneliskej niman kajsikamatiskej akin otlajtlako niman ijkon uelis kipaleuiskej manoyolkuepa. Yejuamej kichiaj ika akin otlajtlako kuajli matlanemili niman makineki noyolkuepas, ika yejon, kitlajtlaniliaj Jehová makiteochiua nochi tlen kichiujtokej para kipaleuiskej (2 Tim. 2:​25, 26).

14. ¿Akinon noneki tikueyiteneuaskej ijkuak yakaj noyolkuepa, niman tleka?

¹⁴ Melak tiyolpakij ijkuak akin otlajtlako noyolkuepa (Luc. 15:​7, 10). San ika ¿akinon noneki tikueyiteneuaskej tla yakaj noyolkuepa? ¿Tlayekankej? Matikilnamikikan ika Pablo okijto ika toTajtsin uelis kichiuas manoyolpatlakan akin otlajtlakojkej (2 Tim. 2:25). Kuakon, ijkuak yakaj kipatla ken tlanemilia niman xok kichiua tlen xkuajli, xse tlaltikpakchane okipaleui, yej okipaleui Jehová. Sakin, Pablo okijto tlenon panoua ijkuak yakaj noyolkuepa: más kuajli kajsikamati tlen melauak, oksejpa kuajli tlanemilia niman xnokauilia ika Satanás makikajkayaua (2 Tim. 2:26).

15. ¿Kenijki tlayekankej uelis kipaleuijtiaskej akin yonoyolkuep?

¹⁵ Tla akin otlajtlako noyolkuepa, tlayekankej ok noneki kontlajpalojtiaskej niman ijkon kipaleuiskej makichikaua itlaneltok, makinxiko itlatlatalisuan Satanás niman makichiua tlen kuajli (Heb. 12:​12, 13). Tlayekankej xnoneki kiteijlijtinemiskej tlen okichiuj yejon tokniuj. San ika ¿kanaj tlenon nonekis kimatiskej tokniuan ipan tlanechikojli?

MANOCHIUA CENSURA “IMIXPAN NOCHIMEJ”

16. ¿Akinomej kinteneujtoya Pablo ipan 1 Timoteo 5:20 ijkuak okijto “imixpan nochimej”?

¹⁶ (Xpoua 1 Timoteo 5:20). Pablo okijli Timoteo, akin noijki tlayekanketl katka, makinyektlali “imixpan nochimej” akin yotlajtlakojkej, noso, makinchiuili censura. ¿Akinomej kinteneujtoya ijkuak okijto “imixpan nochimej”? Xkinteneujtoya nochimej akin nemij ipan tlanechikojli, san kinteneujtoya tokniuan akin kimatstoyaj tlenon kichiujtinemiya akin otlajtlako, kanaj pampa okitakej noso kanaj pampa akin otlajtlako okimijli tlen okichiuj. Kuakon, tlayekankej noneki san kimijliskej ika akin otlajtlako yokimelajkatlalijkej tokniuan akin kimatstoyaj tlen kichiujtinemiya.

17. Tla miyekej okimatkej ipan tlanechikojli tlen okichiuj akin otlajtlako noso kanaj miyekej kimatiskej, ¿tlen anuncio notemakas ipan tlanechikojli, niman tleka?

¹⁷ Kemantika miyekej ipan tlanechikojli kimatij tlen okichiuj akin otlajtlako noso kanaj kimatiskej. Tla ijkon panoua, nonekis kijliskej nochi tlanechikojli. Se tlayekanketl kitemakas se anuncio ipan tlanechikojli niman kijtos ika tokniuj censurado noso censurada. Niman, ¿tleka ijkon nochiua? Pablo okijto: “Para ijkon on oksekimej ikoneuan Dios ma nomojtikan” niman maka makichiuakan se ueyi tlajtlakojli.

18. ¿Tlenon kichiuaj tlayekankej ijkuak yakaj akin yonoapolakti kichiua se ueyi tlajtlakojli, san ika, xekajxiltia 18 xiuitl? (Noijki xkita tlaixkopinajli).

¹⁸ ¿Tlenon panoua tla yakaj akin yonoapolakti kichiua se ueyi tlajtlakojli, san ika, xekajxiltia 18 xiuitl? Tlayekankej ipan tlanechikojli kintlapejpeniskej omemej tlayekankej niman ijkon matlajtokan iuan akin otlajtlako niman imiuan itajuan akin iteixpantijkauan Jehová.b Yejuin tlayekankej kitaskej tlenon kichiujtokej tajtin niman ijkon kipaleuiskej inkoneuj manopatla niman manoyolkuepa. Tla akin otlajtlako kinektika ika itajuan makipaleuikan niman nesi ika kineki nopatlas, yejon omemej tlayekankej uelis kijtoskej ika xnonekis ika se comité itech tlayekankej imiuan manosentlali. Niman ijkon nochiua pampa toTajtsin yokinnauati tatajtin yejuamej makinyektlalikan inkoneuan ika tlasojtlalistli (Deut. 6:​6, 7; Prov. 6:20; 22:6; Efes. 6:​2-4). Sakin, tlayekankej tlajtojtiaskej imiuan tajtin niman ijkon kimatiskej tla ok kipaleuijtokej inkoneuj. Aman tej, ¿tlenon nochiuas tla akin otlajtlako xnoyolkuepa niman xkineki nopatlas? Se comité itech tlayekankej tlajtos iuan akin otlajtlako niman imiuan itajuan akin iteixpantijkauan Jehová.

JEHOVÁ “SANOYEJ TENOTSKI NIMAN TEIKNELIANI”

19. ¿Kenijki tlayekankej kichiuaj ken Jehová ijkuak tlajtouaj iuan akin yokichiuj se ueyi tlajtlakojli?

¹⁹ Tlayekankej akin teuamej itech se comité kinekij ika tlanechikojli machipaujkaonia pampa Jehová ijkon yokinnauati (1 Cor. 5:7). San ika, noijki kinekij nokojtiliskej kipaleuiskej akin otlajtlako manoyolkuepa. Ika yejon, kuajli kinotsaj niman xkinemilijtiuetsij ika xkineki noyolkuepas. Ijkuak ijkon kichiuaj, kichiujtokej ken Jehová, akin “sanoyej tenotski niman teikneliani” (Sant. 5:11). Matikitakan tlen okijkuilo apóstol Juan ijkuak youeuentsintiaka: “Notlajsojkakoneuan, nemechtlajkuiluiya yejua in tlajtlamach para maka nentlajtlakoskej. Pero tla yakaj tlajtlakoua, tikpiyaj totepantlajtojkau yejuan techpaleuis para tikseliskej tetlapojpoluilistli itech toTajtsin Dios. In totepantlajtojkau yejua JesuCristo yejuan yolmelajki” (1 Juan 2:1).

20. ¿Tlenon tikitaskej ipan okse tlamachtijli?

²⁰ Teajman ika kemantika akin okichiuj se ueyi tlajtlakojli xkineki noyolkuepas. Ijkuak ijkon panoua, noneki kikixtiskej itech tlanechikojli. ¿Tlenon kichiuaj tlayekankej ijkuak ijkin panoua? Ipan okse tlamachtijli tiknankiliskej yejuin.