TLAMACHTIJLI 23
Melak kuajli tla tiknemilia timoapolaktis
Jesús okijto ika tla tiknekij tikchiuaskej ken yejua, noneki toapolaktiskej (xkita Mateo 28:19, 20, TNM). ¿Tlenon kijtosneki timoapolaktis? ¿Tlenon noneki kichiuas akin kineki noapolaktis?
1. ¿Tlenon kijtosneki timoapolaktis?
Biblia kijtoua ika Jesús okiapolaktijkej ipan atentli Jordán. Ijkuak ijkon okichiuj, yejua kuajli oapolak niman, satepan, ouajkis ijtik atl (Marcos 1:9, 10, TNM). Nochimej akin melauak kichiuaj ken Cristo noijki noneki noapolaktiskej ijkon ken Jesús okichiuj, noneki kuajli polakiskej ijtik atl.
2. ¿Tlenon kiteititia akin noapolaktia?
Ijkuak yakaj noapolaktia, kiteititia ika yonosentemakak itech Jehová. ¿Niman tlenon noneki kichiuas akin kineki nosentemakas itech Jehová? Noneki kichiuas se teoyotl kampa kijlis Jehová ika kineki nochipa kitekichiuilis, ika nochipa san yejua kiueyichiuas niman ika san yejua kitlakamatis. Noijki peua kichiua tlen Jesús otemachti niman “kelkaua nochi on tlen más kitlajsojtla” (Mateo 16:24). Melak kuajli ijkuak yakaj nosentemaka itech Jehová niman noapolaktia. Akin ijkon kichiua más kuajli nouika iuan Jehová niman imiuan oksekimej akin noijki kitekichiuiliaj Jehová.
3. ¿Tlenon noneki kichiuas akin kineki noapolaktis?
Tla tejua tikneki timoapolaktis, kachtopa noneki kuajli timomachtis itech Jehová niman itech titlaneltokas (xkita Hebreos 11:6). Tla tejua más tikixmati Jehová niman más itech titlaneltoka, más tiktlasojtlas. Niman tla más tiktlasojtla, tiknekis titenojnotsas niman tikchiuas tlen kijtoua Biblia (2 Timoteo 4:2; 1 Juan 5:3). Ijkuak yakaj yopeuj kichiua tlen Jehová kuelita, melak kinekis nosentemakas itech toTajtsin niman kinekis noapolaktis (Colosenses 1:9, 10).a
OKSEKI XKASIKAMATI
Matikitakan kenijki okiapolaktijkej Jesús niman tlenon uelis tikchiuaskej tla tiknekij toapolaktiskej.
4. Tlen tiuelij itech ken okiapolaktijkej Jesús
Biblia kijtoua kenijki okiapolaktijkej Jesús. Xkitakan Mateo 3:13-17 (TNM), niman xtlajtokan itech yejuin:
Ijkon ken otikitakej ipan textos, ¿okikuatekijkej Jesús noso okiapolaktijkej?
¿Okiapolaktijkej Jesús ijkuak konetsintli katka?
Ijkuak Jesús yokiapolaktijkaj, opeuj kichiua se tekitl tlen Jehová yokinauatijka. Xkitakan Lucas 3:21-23 (TNM) niman Juan 6:38, niman xtlajtokan itech yejuin:
¿Tlenon opeuj kichiua Jesús sakin ika yokiapolaktijkaj?
5. Tejua noijki uelis timoapolaktis
Kanaj timomojtia timosentemakas itech Jehová niman timoapolaktis. San ika, onka seki tlemach tlen uelis mitspaleuis ijkon xchiua. Kuajli xkita tlenon yokinpaleui oksekimej. Xkitakan VIDEO.
Xkitakan Juan 17:3 niman Santiago 1:5, niman xtlajtokan itech yejuin:
¿Tlenon uelis techpaleuis matoapolaktikan?
Tosentemakaj itech Jehová ijkuak tikijliaj ika tiknekij nochipa tiktekichiuiliskej.
Ijkuak toapolaktiaj, tikimititiaj oksekimej ika yotosentemakakej itech Jehová.
6. Ijkuak yakaj noapolaktia peua noixmati ken iteixpantijkauj Jehová
Ijkuak toapolaktiaj, peua tikueyichiuaj Jehová imiuan oksekimej akin noijki kitekichiuiliaj. Maski tlatlamantik kampa tiualeuaj niman maski xsan noijki tlen yotikixnamijkej, tinochimej san no yejua tlen tikneltokaj niman tinochimej tikchiuaj tlen kijtoua Biblia. Xkitakan Salmo 25:14 niman 1 Pedro 2:17, niman xtlajtokan itech yejuin:
Ijkon ken kijtouaj yejuin textos, ¿tlenon panos tla toapolaktiaj?
SEKIMEJ KIJTOUAJ: “Niknemilia ika ok nechpoloua para ninoapolaktis”.
Maski tla tejua noijki ijkon timomachilia, ¿tiknemilia ika kuajli tla tikchiua tlen noneki niman ijkon uelis timoapolaktis?
TLEN OTIUEL
Jesús okijto ika tla tiknekij tikchiuaskej ken yejua, noneki toapolaktiskej. Niman, para uelis toapolaktiskej, noneki titlaneltokaskej itech Jehová, tiktlakamatiskej niman itech tosentemakaskej.
¿Kenon titlanankiliskia?
¿Tlenon kijtosneki timoapolaktis, niman tleka melak noneki ijkon matikchiuakan?
¿Tlenon kiteititia akin noapolaktia?
¿Tlenon noneki kichiuas akin kineki nosentemakas itech toTajtsin niman noapolaktis?
OKSEKI XKITA
Xkita tlenon kasikamatij oksekimej ijkuak kikakij tlajtojli bautismo niman xkita tlenon melauak kijtosneki.
Xkita tlen uelis mitspaleuis xmoapolakti.
“Tiknekiskej toapolaktiskej tla tiktlasojtlaj Jehová” (Amatl Tekakistilijketl, marzo de 2020)
Xkita tleka se tlakatl okinek noapolaktis.
Xkita tleka melak kuajli tla tiknemilia timoapolaktis niman tlenon uelis mitspaleuis ijkon xchiua.
a Tla yakaj yonoapolaktijka ipan okse religión, nonekis oksejpa noapolaktis. ¿Tleka? Pampa ipan yejon religión xokimachtijkej tlen melauak temachtia Biblia (xkita Hechos 19:1-5, TNM, niman tlamachtijli 13).