¿Tlenon kijtosneki bautismo?
Tlen Biblia kijtoua
Ijkuak yakaj noapolaktia noneki nochi kuajli polakis ijtik atl.a Biblia kinteneua miyekej akin onopolaktijkej (Hechos 2:41). Se de yejuamej, Jesús. Yejua okiapolaktijkej ipan atentli Jordán (Mateo 3:13, 16). Seki xiujtin sakin, se tlakatl etíope noijki okiapolaktijkej ijtik atl tlen nisiuj onkatka kampa yaya (Hechos 8:36-40).
Jesús otemachti ika tla yakaj kineki kichiuas ken yejua, noneki noapolaktis (Mateo 28:19, 20). Niman apóstol Pedro noijki ijkon otemachti (1 Pedro 3:21).
Ipan yejuin tlamachtijli tiknankiliskej yejuin:
¿Tlenon kijtosneki timoapolaktis ika itoka toTajtsin, Tekoneuj niman espíritu santo?
Tlen xmelauak noijtoua itech ken noapolaktiaj akin kichiuaj ken Cristo
¿Tlenon kijtosneki bautismo?
Ijkuak yakaj noapolaktia kimititia nochimej ika yejua yonoyolkuep niman yokijto ika nochipa kichiuas tlen toTajtsin kineki. Yejon kijtosneki ika kitlakamatis toTajtsin niman Jesús ipan nochi inemilis. Tla yakaj kineki kiselis nemilistli tlen xkeman tlamis, kachtopa noneki noapolaktis.
Ijkuak yakaj noapolaktia kuajli kiteititia ika yokipatlak inemilis. Biblia kijtoua ika ijkuak se noapolaktia kentla kitokaskiaj (Romanos 6:4; Colosenses 2:12). Ijkuak toapolaktiaj kentla timikij, yejuin kijtosneki ika tijkauaj tlen tikchiuayaj. Niman ijkuak tiuajkisaj ijtik atl, kijtosneki ika aman san toTajtsin tiktlakamatiskej.
¿Kijtoua Biblia ika noneki kiapolaktiskej se konetsintli?
Ka. Biblia xkeman kiteneua tla se konetsintli noneki noapolaktis.b
San ika, tlen kema kijtoua ika akin kineki noapolaktis kachtopa noneki kichiuas miyek tlemach. Ken kasikamatis tlen temachtia iTlajtol toTajtsin niman kichiuas tlen kijtoua Biblia. Noijki noneki noyolkuepas itech itlajtlakoluan. Niman ipan se oración kijlis toTajtsin ika san yejua kitekichiuilis (Hechos 2:38, 41; 8:12). Nochi yejuin tlen yotikteneujkej xuelis kichiuas se konetsintli.
¿Tlenon kijtosneki timoapolaktis ika itoka toTajtsin, Tekoneuj niman espíritu santo?
Jesús okinnauati yejuin akin kinmachtiaya: “Nochimej xkinmachtitij. Xkinapolaktikan ika itoka noTajtsin, teKoneuj niman espíritu santo. Xkinmachtikan makitlakamatikan nochi tlen yonimechnauatij” (Mateo 28:19, 20). Ijkuak Biblia kijtoua ika itoka kijtosneki ika ijkuak yakaj noapolaktia kasikamati tlen tekitl kipiya toTajtsin, Tekoneuj niman espíritu santo. Sejpa katka, apóstol Pedro, ijkuak ikipajtiskia se tlakatl akin xueliya nejnemiya desde ijkuak onemiko, okitekitilti tlajtoltin ika itoka. Yejua okijto: “¡Ika itoka Jesucristo akin ualeua Nazaret, nimitsijlia: ‘Xnejnemi’!” (Hechos 3:6). ¿Tleka okijto “ika itoka”? Pampa kasikamatiya tlen tekitl kipiaya Jesús niman noijki ijkon kiteititijtoya ika yejon milagro tlen kichiuaskia, kichiuaskia pampa Jesús kipaleuijtoya.
Ijkuak kijtoua “noTajtsin”, kitenejtika toueyiTajtsin Jehová.c Yejua akin otechchijchiuj, otechmakak tonemilis niman yejua akin más kojtik. Kuakon, san Jehová akin más ueyixtika (Génesis 17:1; Apocalipsis 4:11).
Ijkuak kijtoua “Tekoneuj”, kitenejtika Jesucristo, akin omik topampa (Romanos 6:23). Para timakisaskej melak noneki matikselikan niman matikajsikamatikan tlen tekitl kipiya Jesús ipan tlen toTajtsin kineki kichiuas para tinochimej (Juan 14:6; 20:31; Hechos 4:8-12).
Ijkuak kijtoua “espíritu santo”, kitenejtika ikojtilis toTajtsin.d ToTajtsin okitekitilti iespíritu santo para kichijchiuas nochi tlen onka, para tlajtos imiuan itekipanojkauan niman oksekimej niman para kinmakas kojtilistli para makichiuakan tlen yejua kinekiya (Génesis 1:2; Job 33:4; Romanos 15:18, 19). Noijki okitekitilti para kimijlis sekimej tlakamej tlenon yejua kinekiya manoijkuilo ipan Biblia (2 Pedro 1:21).
¿Se tlajtlakojli tla yakaj oksejpa noapolaktia?
Melak miyekej kemantika kipatlaj inreligión, san ika, tla yakaj yonoapolaktijka ¿kichiujtoskia se tlajtlakojli tla oksejpa noapolaktia ipan okse religión? Sekimej kijtoskiaj ika kema ipampa ken kasikamatij Efesios 4:5, kampa kijtoua ika, san se toTeko nemi, san se tlaneltokijli onka niman san se apolaktilistli. San ika, yejuin tlaxelojli xkijtosneki tla yakaj xuelis oksejpa noapolaktis. ¿Tleka ijkon tikijtouaj?
Tlen kijtouaj okseki tlaxeloltin. Tla kuajli tikimitaj okseki tlaxeloltin tlen noteneuaj ijkuak onoijkuilo Efesios 4:5, tikitaskej ika apóstol Pablo kiteneujtoya ika noneki san sekan tinemiskej. Akin melauak kichiuaj ken Cristo noneki sa noyejua kineltokaskej (Efesios 4:1-3, 16). Niman uelis san sekan tinemiskej, tla tikpiyaj san se toTeko, Jesucristo niman tla tikpiyaj san se tlaneltokijli noso tla tikajsikamatij tlen Biblia temachtia. Niman noijki tla tinochimej tikchiuaj tlen Biblia kijtoua para yakaj noapolaktis.
Sejpatipan apóstol Pablo okinyolchikauj sekimej akin yonoapolaktijkaj oksejpa manoapolaktikan. Niman ijkon okimijli pampa yejuamej, ijkuak onoapolaktijkaj, xkuajli kasikamatiyaj tlen Biblia temachtia (Hechos 19:1-5).
Ken noneki timoapolaktis para toTajtsin makiseli. ToTajtsin kineki ika yakaj manoapolakti, tla kuajli yokasikamat tlen temachtia Biblia (1 Timoteo 2:3, 4). Tla yakaj yonoapolaktijka, san ika, xokichiuj ken Biblia kijtoua para toTajtsin kentla xonoapolakti (Juan 4:23, 24). Kanaj akin onoapolakti okichiuj ika nochi iyojlo, san ika, xokichiuj ijkon ken temachtia Biblia (Romanos 10:2). Para toTajtsin makiseli, noneki nomachtis tlen Biblia kijtoua, kichiuas tlen ueltiuj, nosentemakas itech toTajtsin niman oksejpa noapolaktis. Tla ijkon kichiua, xkichiujtoskia se tlajtlakojli. Yejua kichiujtoskia ijkon ken noneki.
Okseki bautismos tlen Biblia kinteneua
Biblia kinteneua okseki bautismos tlen xsan noijki kijtosnekij ijkon ken oteapolaktijkej akin kichiuayaj ken Cristo. San seki matikimitakan.
Ken teapolaktiaya Juan Teapolaktijketl.e Ijkuak se judío noso yakaj akin yonochiujka judío yaya itech Juan para makiapolakti, kichiuaya pampa yejua yonoyolkuepka niman pampa xokitlakamatka se tlanauatijli itech Tlanauatiltin tlen yokimakakaj Moisés. Ken teapolaktiaya Juan kinpaleuiaya judíos para makixmatikan niman makiselikan Jesús de Nazaret, akin Mesías yeskia (Lucas 1:13-17; 3:2, 3; Hechos 19:4).
Ijkuak Jesús onoapolakti. Iapolaktilis Jesús sejneka katka. ¿Tleka? Pampa yejua xkeman nopopolouaya niman xokichiujka se tlajtlakojli, maski ijkon, Juan Teapolaktijketl, okiapolakti (1 Pedro 2:21, 22). Noijki, Jesús xonoapolakti pampa yonoyolkuepka noso pampa kitlajtlaniliaya toTajtsin makimaka se “chipajkatlamachilistli” (1 Pedro 3:21). Kuakon, ijkuak Jesús onoapolakti okititi toTajtsin ika kichiuaskia tlen yokijtojka itech Mesías noso Cristo, yejon kijtosnekiya kitemakas inemilis topampa (Hebreos 10:7-10).
Bautismo ika espíritu santo. Juan Teapolaktijketl niman Jesucristo otlajtokej itech bautismo ika espíritu santo (Mateo 3:11; Lucas 3:16; Hechos 1:1-5). Yejuin bautismo xsa noyejua ken on bautismo ika itoka espíritu santo (Mateo 28:19). ¿Tleka?
Itech nochimej akin kichiuaj ken Cristo xmiyekej kiminapolaktiaj ika espíritu santo. Yejuamej kinmakaj espíritu santo pampa kintlapejpeniaj para yaskej cielo niman kipaleuiskej Cristo ken tekiuajkej niman teopixkejf (1 Pedro 1:3, 4; Apocalipsis 5:9, 10). Niman ¿akinomej kinyekanaskej? Nochimej akin kichiuaj ken Cristo akin nochipa nemiskej ipan tlaltikpaktli kampa melak kualtsin yes (Mateo 5:5; Lucas 23:43).
Bautismos itech Cristo Jesús niman bautismos itech imikilis. Akin noapolaktiaj ika espíritu santo, noijki kiminapolaktiaj itech Cristo Jesús (Romanos 6:3). Kuakon, yejuin apolaktilistli kiseliaj akin kichiuaj ken Cristo akin kintlapejpeniaj para yaskej cielo niman iuan tekiuajtiskej Jesús. Ijkuak kiseliaj apolaktilistli itech Cristo Jesús, nochiuaj san se grupo: Jesús yejua tlayekanketl noso kentla itsontekon tlanechikojli niman tlapejpeniltin kentla itlalnakayo tlanechikojli (1 Corintios 12:12, 13, 27; Colosenses 1:18).
Akin tlapejpeniltin noijki kiminnapolaktiaj itech imikilis Jesús (Romanos 6:3, 4). Ijkon ken Jesús, yejuamej noijki chikauak kitekichiuiliaj toTajtsin niman kitlakamatij. Niman kinektokej yaskej cielo maski xkiseliskej nemilistli para nochipa ipan yejuin tlaltikpaktli. Yejuin bautismo nochiua ijkuak mikij niman kinyolitiaj ken espíritus ne cielo (Romanos 6:5; 1 Corintios 15:42-44).
Bautismo ika tlitl. Juan Teapolaktijketl okijto: “Yejua [Jesús] mechapolaktis ika espíritu santo niman ika tlitl. Ipan ima kipiya tlen ika kikajkaniaj trigo niman ijkon kichipauas nochi itlal. Kisentlalis itrigo niman kejyeuas, pero yejon tlasojli tlen okisentlali, kitlatis ika tlitl tlen xuelij kiseuiyaj” (Mateo 3:11, 12). Yejuin tlajtoltin techititiaj ika bautismo ika tlitl niman bautismo ika espíritu santo xsan noyejua. Kuakon, ¿tlenon kijtosneki tlen okiteneuj Juan?
Trigo kineskayotia akin kikakij Jesús niman kitlakamatij. Yejuamej uelis kiminapolaktiskej ika espíritu santo. Niman tlasojli kineskayotia akin xkikakij Jesús. Yejuamej kiseliskej bautismo ika tlitl pampa kinpopoloskej para nochipa (Mateo 3:7-12; Lucas 3:16, 17).
a Ipan Diccionario expositivo de palabras del Antiguo y del Nuevo Testamento exhaustivo, de W. E. Vine (tlen okitlajtolkuepkej Guillermo Cook niman Santiago Escuain), kijtouaj ika tlajtojli “bautismo” kijtosneki ijkuak yakaj kipolaktiaj niman kikixtiaj ijtik atl.
b Ipan seki religiones ijkuak kiminapolaktiaj kokonej kintoyauiliaj achijtsin atl ipan itsontekon niman kintlaliliaj intoka.
c Biblia kijtoua ika toTajtsin itoka Jehová (Éxodo 15:3). Xkita tlamachtijli “¿Akinon Jehová?”.
d Xkita tlamachtijli “¿Tlenon on espíritu santo?”.
e Xkita tlamachtijli “¿Quién fue Juan el Bautista?”.
f Xkita tlamachtijli “¿Akinomej yaskej iluikak?”.
g Biblia kitekitiltia tlajtoltin bautismo niman bautismos ijkuak tlajtoua ken nochipauayaj seki tlemach ipan teopan. Ken ijkuak nopolaktiayaj ijtik atl seki tlemach tlen ompa notekitiltiayaj (Marcos 7:4; Hebreos 9:10). San ika, yejon xsan noyejua ken ijkuak Jesús kuajli onoapolakti niman noijki ijkuak noapolaktiaj inomachtijkauan.