¿Tlenon kijtoua Biblia intech ángeles?

Ne iluikak, nemij miyekej ángeles, niman Jehová kineki matikimixmatikan. Ángeles noijki noixmatij ken “ikoneuan Dios” (Génesis 6:4; Job 38:7). ¿Tlenon kijtoua Biblia intech ángeles? ¿Techpaleuiyaj, noso texchiuiliaj tlen xkuajli? ¿Kimita Jehová nochimej ángeles ken ikoneuan?

1. ¿Akinomej on ángeles?

Jehová okinchijchiuj ángeles niman, satepan, okichijchiuj tlaltikpaktli. Nochimej ángeles chantij iluikak. Yejuamej espíritus niman xueli tikimitaj (Hebreos 1:​14). Nemij melak miyekej ángeles niman nochimej tlatlamantikej (Apocalipsis 5:​11). Yejuamej kichiuaj tlen kinnauatia Jehová niman kitlakamatij itlanauatiluan (Salmo 103:​20). Yeuejkaui, Jehová kintitlaniya iángeles niman ijkon makimijlitij itekipanojkauan tlenon nonekiya kichiuaskej. Niman, intechkopa iángeles, yejua kinpaleuiaya niman kinmakixtiaya. Aman, ángeles techyekanaj niman ijkon uelis tikinnextiskej akin kinekij kixmatiskej toTajtsin.

2. ¿Akinon Satanás niman demonios?

Sekimej ángeles xok okitlakamatkej Jehová. Akin kachtopa ijkon okichiuj itoka Diablo noso Satanás, yejua kinkajkayaujtika nochimej akin chantij “ipan in tlaltikpaktli” (Apocalipsis 12:9). Satanás kinekiya tlayekanas, ika yejon, okichiuj ika Adán iuan Eva maka makitlakamatikan toTajtsin. Niman, sakin, okichiuj ika oksekimej ángeles noijki ijkon makichiuakan. Ángeles akin xotetlakamatkej noixmatij ken demonios. Jehová xok okinek manemikan iluikak, ika yejon, okinuajxini ipan tlaltikpaktli niman yokijto ika kinpopolos (xkita Apocalipsis 12:9, 12).

3. ¿Kenijki techkajkayauasnekij Satanás niman demonios?

Satanás niman demonios melak kinekij techkajkayauaskej. Kitekitiltiaj naualyotl niman ijkon kichiuaskej imiuan matouikakan niman imiuan matonotsakan. San xkonnemili yejuin, sekimej yauej intech nanaualtin niman tetlatemouilijkej. Sekimej nopajtiaj ika naualyotl niman oksekimej kimitaj horóscopos. Niman, miyekej yokintlaneltokiltijkej ika ueliskej tlajtoskej imiuan akin yomijkej. San ika, Jehová techijlia: “Maka xkintlakeuakan on yejuan kinnotsaj ajakamej nion yejuan tetlatejtemouiliaj” (Levítico 19:​31). Yejua ijkin techijlia pampa xkineki ika Satanás iuan idemonios matechkajkayauakan noso matexchiuilikan tlen xkuajli.

OKSEKI XKASIKAMATI

4. Ángeles kinpaleuiyaj oksekimej makixmatikan Jehová

Ángeles xkinnojnotsaj oksekimej itech toTajtsin ijkon ken tejuamej titenojnotsaj. San ika, kema kinyekanaj itekipanojkauan toTajtsin niman ijkon makinnextikan akin kinekij kixmatiskej Jehová. Xkitakan Apocalipsis 14:6, 7 niman xtlajtokan itech yejuin:

• ¿Tleka noneki matechpaleuikan ángeles ijkuak titenojnotsaj?

• ¿Mitsyolpaktia tikmatis ika ángeles ueliskej mitspaleuiskej xkinnexti akin kinekij kimatiskej tlen kijtoua Biblia? ¿Tleka?

5. Maka xmokauili mamitskajkayaua Satanás ika naualyotl

Satanás iuan idemonios kitlauelitaj Jehová, niman tejuamej noijki techtlauelitaj. Xkitakan Lucas 9:​38-​42 niman xtlajtokan itech yejuin:

• ¿Tlenon kitechiuiliaj demonios?

Tejuamej xtiknekij touikaskej imiuan demonios nion xtiknekij matexchiuilikan tlen yejuamej kinekij. Xkitakan Deuteronomio 18:​10-​12 niman xtlajtokan itech yejuin:

• ¿Tlenon kinekij matikchiuakan demonios? ¿Itlaj nochiua kampa tichanti tlen kipiya naualyotl? ¿Tlenon nochiua?

• ¿Tiknemilia ika kuajli ika Jehová techijlia maka matikchiuakan itlaj tlen kipiya naualyotl? ¿Tleka?

Xkitakan VIDEO niman xtlajtokan itech yejuin:

VIDEO: Xkixnamikikan on Diablo (5:​02)

• ¿Tiknemilia ika xkuajli yejon makoskatl tlen Palesa okakilti ikonetsin? ¿Tleka ijkon tiknemilia?

• ¿Tlenon ononek kichiuas Palesa niman ijkon maka makimomojtikan demonios?

Akin kichiuaj ken Cristo kitlauelitaj naualyotl. Xkitakan Hechos 19:​19 niman 1 Corintios 10:​21, niman xtlajtokan itech yejuin:

• ¿Tleka xnoneki tikpiyas itlaj tlen kipiya naualyotl?

6. Uelis tiktlanis Satanás niman demonios

Satanás yejua akin kinyekana demonios. San ika, arcángel Miguel, noso Jesús, yejua akin kinyekana ángeles akin kuajkualtin. ¿Tikneki tikmatis akinon más kojtik? Xkitakan Apocalipsis 12:​7-9 niman xtlajtokan itech yejuin:

• ¿Akinomej más kojtikej: Miguel iuan iángeles, noso Satanás iuan idemonios?

• ¿Tiknemilia ika akin kichiuaj ken Cristo noneki kimakasiskej Satanás iuan idemonios?

Tejua uelis tiktlanis Satanás iuan idemonios. Xkitakan Santiago 4:7 niman xtlajtokan itech yejuin:

• ¿Tlenon uelis tikchiuas niman ijkon Satanás iuan idemonios xmitschiuiliskej tlen xkuajli?

TLEN OTIUEL

Ángeles akin kuajkualtin techpaleuiyaj. Satanás iuan idemonios kitlauelitaj Jehová, niman techkajkayauasnekij ika naualyotl.

¿Kenon titlanankiliskia?

• ¿Tlenon kichiuaj ángeles niman ijkon oksekimej makixmatikan Jehová?

• ¿Akinon Satanás niman demonios?

• ¿Tleka xkuajli yeskia tla tejua tikchiua itlaj tlen kipiya naualyotl?

OKSEKI XKITA

Xkita tleka tikijtouaj ika Jesús yejua arcángel Miguel.

“¿Akinon arcángel Miguel?” (Tlamachtijli de jw.org)

Xkita tlenon techititia ika Diablo melauak nemi.

“¿Melauak nemi Diablo?” (Tlamachtijli de jw.org)

Xkita tlenon okipaleui se siuatl niman ijkon maka sa makichiua naualyotl.

“Biblia melak onechpaleui” (Amatl Tekakistilijketl, 1 de julio de 1993)

Xkita kenijki Satanás tekajkayaua ika naualyotl.

“Tlen melauak itech naualyotl” (¿Yotiknexti ojtli tlen mitsuikas ipan nemilistli tlen xkeman tlamis?, parte 5)