TLAMACHTIJLI 26
¿Tleka titlajyouiyaj?
Ijkuak panoua tlen xkuajli, miyekej notlajtoltiaj: “¿Tleka ijkon opanok?”. Melak techyolpaktia tikmatiskej ika Biblia technankilia yejuin.
1. ¿Kenijki Satanás okipeualti tlen xkuajli?
Satanás, noso Diablo, xokitlakamat toTajtsin. Yejua noijki kinekiya tlayekanas, ika yejon, okichiuj ika Adán iuan Eva maka sa makitlakamatikan Jehová. Kuakon, Satanás okikajkayauj Eva (Génesis 3:1-5). Okitlaneltokilti ika Jehová kitlasojtiliaya itlaj tlen kuajli. Kentla kijlitoskia ika tejuamej akin titlaltikpakchanejkej más tipakiskiaj tla xtiktlakamatiskiaj Jehová. Satanás opeuj tlakajkayaua ijkuak okijli Eva ika xmikiskia, ika yejon, Biblia kijtoua ika “yejua tlakajkayaua niman yejua imintataj on yejuan tlakajkayauaj” (Juan 8:44).
2. ¿Tlenon okitlapejpenijkej kichiuaskej Adán iuan Eva?
Jehová melak kintlasojtlaya Adán iuan Eva. Okimijli ika ueliskia kikuaskej nochi tlen kitlakiltiskiaj kojtin tlen onkatkaj ipan jardín de Edén, san itlakilyo se kojtli xokinkauili makikuakan (Génesis 2:15-17). Maski toTajtsin ijkon okimijlijka, yejuamej okikuajkej. Biblia kijtoua ika Eva “okitek se itlakyo niman okikuaj”. Satepan, okimakak iueuentsin niman “yejua no okikuaj” (Génesis 3:6). Kuakon omemej xokitlakamatkej toTajtsin. San no yejuamej okitlapejpenijkej ijkon kichiuaskej. ¿Tleka ijkon tikijtouaj? Pampa yejuamej xtlajtlakolejkej katkaj. Yejuamej kimatstoyaj ika más kuajli tla nochipa kichiuayaj tlen Jehová kinnauatiaya. Kuakon, ijkuak xotetlakamatkej, otlajtlakojkej niman okiteasikamachiltijkej ika xkinekiyaj makinyekana toTajtsin. Tlen okitlapejpenijkej okichiuj melak matlajyouikan (Génesis 3:16-19).
3. ¿Tlenon opanok pampa Adán iuan Eva xotetlakamatkej?
Adán iuan Eva opeuj kipiyaj tlajtlakojli ijkuak xokitlakamatkej toTajtsin, niman yejon tlajtlakojli okinpanoltilijkej nochimej inkoneuan. Biblia kijtoua yejuin itech Adán: “Ipan in tlaltikpaktli on achtoj tlakatl otlajtlakoj niman ipampa on tlajtlakojli onkaj mikilistli. Yejua ika nochimej mikiskej pampa nochimej tlajtlakouaj” (Romanos 5:12).
Kemantika titlajyouiyaj pampa xkuajli tlen tiktlapejpeniaj tikchiuaskej, pampa oksekimej kichiuaj tlen xkuajli noso pampa kemantika tinemij kampa panoua tlen xkuajli (xkita Eclesiastés 9:12).
OKSEKI XKASIKAMATI
Matikitakan tleka xnoneki tiktlajtlakoltiskej toTajtsin ipampa tlen xkuajli nochiua ipan tlaltikpaktli. Noijki matikitakan kenijki nomachilia ijkuak kita ika titlajyouiyaj.
4. Akin kichiua matitlajyouikan
Miyekej kinemiliaj ika toTajtsin yejua akin kiyekana tlaltikpaktli. San ika ¿yejon melauak? Xkitakan VIDEO.
Xkitakan Job 34:12 niman 1 Juan 5:19, niman xtlajtokan itech yejuin:
¿ToTajtsin kichiua matitlajyouikan?
5. Tlen yopanok pampa Satanás tlayekantika
Xkitakan Génesis 3:1-6 niman xtlajtokan itech yejuin:
¿Kenijki otlakajkayauj Satanás? (Xkitakan Génesis 3:4, 5).
¿Tleka tikijtouaj ika Satanás okiteasikamachilti ika toTajtsin kintlasojtilia ikoneuan itlaj tlen kuajli?
Ijkon ken yotikitakej, ¿kinemilia Satanás ika noneki tiktlakamatiskej toTajtsin niman ijkon tiyolpakiskej?
Xkitakan Eclesiastés 8:9 niman xtlajtokan itech yejuin:
¿Tlenon panoua ipan tlaltikpaktli pampa Satanás yejua akin tlayekana?
Adán iuan Eva xkipiayaj tlajtlakojli niman melak kualtsin chantiyaj ipan jardín de Edén. San ika, okichiujkej tlen Satanás okimijli niman xokitlakamatkej toTajtsin.
Pampa Adán iuan Eva otlajtlakojkej, aman tinochimej titlajtlakolejkej, titlajyouiyaj niman timikij.
Jehová kipopolos tlajtlakojli, tlajyouilistli niman mikilistli. Ijkuak ijkon kichiuas, xok tikpiyaskej tlajtlakojli niman tinemiskej ipan se kualtsin tlaltikpaktli.
6. Jehová kiyolkokoua ijkuak titlajyouiyaj
¿Kenijki nomachilia Jehová ijkuak kita ika titlajyouiyaj? Matikitakan tlen okijkuilo tekiuaj David niman apóstol Pedro. Xkitakan Salmo 31:7 niman 1 Pedro 5:7, niman xtlajtokan itech yejuin:
¿Kenijki timomachilia ijkuak tikmati ika Jehová kita ijkuak titlajyouiyaj niman ika kiyolkokoua?
7. Jehová kipopolos nochi tlen techtlajyouiltia
Xkitakan Isaías 65:17 niman Apocalipsis 21:3, 4, niman xtlajtokan itech yejuin:
Jehová kijtoua ika kipopolos nochi tlen techtlajyouiltia. ¿Kenijki timomachilia ijkuak tikmati yejuin? ¿Tleka ijkon timomachilia?
¿Tikmatiya yejuin?
Satanás okitlajtolchijchiuili Jehová ijkuak okikajkayauj Adán iuan Eva. Ijkon okiteasikamachilti ika Jehová xkuajli ken tlayekana niman ika xtetlasojtla. San ika, sa achijtsin poliui ijkuak Jehová kiteititis ika xmelauak tlen okiteneuilijkej. Yejua kipopolos nochi tlen techtlajyouiltia niman kuajli kiteititis ika san yejua kinamiki tlayekanas. Jehová melak kineki manoyekteneua itoka (Mateo 6:9, 10).
SEKIMEJ KIJTOUAJ: “ToTajtsin otexchijchiuj san para matitlajyouikan”.
¿Tejua tlenon tikijtoskia?
TLEN OTIUEL
Satanás, Adán niman Eva okichiujkej manochiua tlen xkuajli ipan tlaltikpaktli. Jehová melak kiyolkokoua ijkuak kita ika titlajyouiyaj. Sa achijtsin poliui ijkuak kipopolos nochi tlen techtlajyouiltia.
¿Kenon titlanankiliskia?
¿Kenijki Satanás okikajkayauj Eva?
¿Tlenon opanok pampa Adán iuan Eva xotetlakamatkej?
¿Tleka tikijtouaj ika Jehová kiyolkokoua ijkuak kita ika titlajyouiyaj?
OKSEKI XKITA
Xkita tlenon kijtoua Biblia itech tlajtlakojli.
Xkita kenijki Satanás okitlajtolchijchiuili toTajtsin ipan jardín de Edén.
“¿Tleka kitekauilia toTajtsin matitlajyouikan?” (Amatl Tekakistilijketl, 1 de enero de 2014)
Xkita tlenon kijtoua Biblia itech tlen miyekej xkasikamatij.
Xkita tlenon okipaleui se tlakatl akin melak tlajyouiaya.