¿Tlenon panoua ijkuak yakaj miki?

Ijkuak miki yakaj akin tiktlasojtlaj, melak toyolkokouaj niman kanaj hasta totlajtoltiaj: “¿Aman tlenon ipan nochiuas? ¿Oksejpa uelis nikitas?”. Ipan yejuin tlamachtijli niman ipan okse, tikitaskej tlenon kijtoua Biblia itech yejuin.

1. ¿Tlenon panoua ijkuak yakaj miki?

Jesús okijto ika ijkuak yakaj miki, kentla san kochiskia. ¿Tleka ijkon okijto? Pampa ijkuak yakaj melak kuajli kochi, nion xkimati tlenon panoua iyeualiujyan. Noijki ijkon, ijkuak yakaj miki xok itlaj kimachilia, xok itlaj kikokoua niman xok tlajyouiya. Biblia kijtoua ika akin yomijkej xok itlaj kimatij (xkita Eclesiastés 9:5).

2. ¿Tleka melak kuajli tla tikmatij tlen melauak panoua ijkuak yakaj miki?

Miyekej melak kimakasij mikiskej niman noijki kinmakasij akin yomijkej. San ika, tlen temachtia Biblia uelis techpaleuis maka ijkon matomachilikan. Jesús okijto: “On tlen melauak yejua mechmanauis [noso mechmakixtis]” (Juan 8:​32). Miyek religiones kijtouaj ika tikpiyaj se alma tlen xueli miki, san ika, Biblia xyejon tlen kijtoua. Yejuin kijtosneki ika akin yomijkej xok tlajyouiyaj. Yejuamej xok itlaj kimatij niman noijki xuelis itlaj texchiuiliskej. Ika yejon, xnoneki tikinchiuiliskej rezos nion tikintlamaniliskej noso tikchiuaskej okse itlaj inpampa niman ijkon tikinueyichiuaskej.

Sekimej kijtouaj ika uelij tlajtouaj imiuan akin yomijkej. San ika, xakaj uelis tlajtos imiuan akin yomijkej, pampa ijkon ken yotikonitakej, yejuamej xok itlaj kimatij. Kuakon, akin kinemiliaj ika tlajtouaj imiuan akin yomijkej, xtlajtouaj imiuan akin yomijkej, yejuamej tlajtouaj imiuan demonios. Yejuin demonios melak miyekej ijkon yokinkajkayaujkej. Kuakon, ijkuak tikmatij tlen temachtia Biblia itech mikilistli, demonios xok uelis techkajkayauaskej. Jehová techijlia maka matikyejyekokan titlajtoskej imiuan akin yomijkej, pampa tla ijkon tikchiuaj, demonios uelis itlaj texchiuiliskej (xkita Deuteronomio 18:​10-​12).

3. Tlen melauak panoua ijkuak yakaj miki

Tla miyekan tiaskiaj niman titetlajtoltiskiaj tlenon topan nochiua ijkuak timikij, xsan noijki ken technankiliskiaj. Ika yejon, noneki kuajli tomachtiskej niman ijkon uelis tikmatiskej tlen melauak.

• ¿Tlenon noijtoua kampa tejua tichanti ijkuak yakaj miki?

VIDEO: ¿Kenon nemij akin yomijkej? (san achijtsin) (1:​19)

Xkitakan Eclesiastés 3:​20 niman xtlajtokan itech yejuin:

• Ijkon ken kijtoua yejuin texto, ¿tlenon panoua ijkuak yakaj miki?

• ¿Kijtoua yejuin texto ika tikpiyaj se alma noso se espíritu tlen xueli miki?

Biblia techijlia tlenon okijto Jesús ijkuak omik Lázaro, akin iuan nouikaya. Xkitakan Juan 11:​11-​14 niman xtlajtokan itech yejuin:

• ¿Tlenon okijto Jesús ijkuak okimijli inomachtijkauan ika Lázaro yomijka?

• ¿Tlenon tiuelij itech tlen okijto Jesús?

• ¿Tlenon tiknemilia itech tlen Biblia techmachtia?

4. Tlen temachtia Biblia techpaleuiya maka matikneltokakan tlen xmelauak

Ijkuak tikasikamatij tlen melauak temachtia Biblia, tikitaj ika xnoneki tikinmakasiskej akin yomijkej. Xkitakan Eclesiastés 9:​10 niman xtlajtokan itech yejuin:

• ¿Uelis texchiuiliskej tlen xkuajli akin yomijkej?

Biblia techititia ika xnoneki tikchiuaskej itlaj inpampa akin yomijkej nion tikintlamaniliskej. Xkitakan Levítico 20:6 niman Apocalipsis 4:​11, niman xtlajtokan itech yejuin:

• ¿Kenijki tiknemilia nomachilia Jehová ijkuak kita ika yakaj kiyejyekoua tlajtos imiuan akin yomijkej noso kinueyichiua?

5. Tlen melauak temachtia Biblia techyolseuiya

Miyekej kinmachtiaj ika, ijkuak mikiskej, tlajyouiskej ipampa nochi tlen xkuajli okichiujkej. San ika, melak techyolseuiya tlen temachtia Biblia. Ompa techijlia ika akin yomijkej xtlajyouiyaj, nion akin okichiujkej tlen melak xkuajli. Xkitakan Romanos 6:7 niman xtlajtokan itech yejuin:

• Biblia kijtoua ika ijkuak yakaj miki, ijkuakon popoliuij itlajtlakoluan. Kuakon, ¿tiknemilia ika akin yomijkej tlajyouijtokej ipampa tlen xkuajli okichiujkej?

Ijkuak más tikixmatij Jehová, más kuajli tikasikamatij ika yejua xkeman kintlajyouiltiskia akin yomijkej. Xkitakan Deuteronomio 32:4 niman 1 Juan 4:8, niman xtlajtokan itech yejuin:

• Yejuin textos kijtouaj ika Jehová melak kuajli iyojlo niman ika melak tetlasojtla. Kuakon, ¿tiknemilia ika kitekauiliskia matlajyouikan akin yomijkej?

• ¿Tiknemilia ika tlen temachtia Biblia itech mikilistli techyolseuiya? ¿Tleka ijkon tiknemilia?

TLEN OTIUEL

Akin yomijkej xok itlaj kimatij, xok tlajyouiyaj niman xok uelis kitechiuiliskej tlen xkuajli.

¿Kenon titlanankiliskia?

• ¿Tlenon panoua ijkuak yakaj miki?

• ¿Tleka tikijtouaj ika tlen temachtia Biblia techpaleuiya maka matikneltokakan tlen xmelauak?

• ¿Tleka techyolseuiya tlen melauak temachtia Biblia itech mikilistli?

OKSEKI XKITA

Biblia kiteneua tlajtojli alma. Xkita tlenon melauak kijtosneki.

“¿Tlenon on alma?” (Tlamachtijli de jw.org)

Xkita tla toTajtsin tetlajyouiltia ipan infierno.

¿ToTajtsin tetlajyouiltia ipan infierno? (3:​07)

¿Noneki tikinmakasiskej akin yomijkej?

Inespíritus akin yomijkej... ¿uelis techpaleuiskej?, ¿uelis texchiuiliskej tlen xkuajli? ¿Melauak nemij? (Folleto)

Xkita kenijki se tlakatl oyolseuj ijkuak okimat tlenon melauak panoua ijkuak yakaj miki.

“Melak onechpaleui nikmatis tlen melauak temachtia Biblia” (Amatl Tekakistilijketl, 1 de febrero de 2015)