TLAMACHTIJLI 6
¿Oksejpa uajnemiskej akin yomijkej?
1. ¿Tlenon kualtsin kijtoua toTajtsin inpan nochiuas akin yomijkej?
Ijkuak Jesús oajsik Betania nisiu Jerusalén, Lázaro akin iuan kuajli nouikaya ikipiaya naui tonajli ika omik. Kuakon, Jesús oyaj iuan Marta niman María, ikniuan Lázaro, kampa yokitokakaj imikniuj. Nimantsin otojlantik. ¡San xnemili kenon opajkej Marta iuan María ijkuak Jesús yokiyoliti Lázaro! Xkita Juan 11:21-24, 38-44.
Marta kimatstoya tlenon kualtsin inpan nochiuaskia akin yomijkej. Yejua kimatiya ika Jehová oksejpa kinyolitiskia akin yomijkej. Xkita Job 14:14, 15.
2. ¿Kenon nemij akin yomijkej?
ToTajtsin okijli Adán: “Pampa tejua titlalpoktli, tlalpoktli timokuepas” (GÉNESIS 3:19)
Tlaltikpakchanejkej okinchijchiujkej ika tlajli (Génesis 2:7; 3:19). Xtiespíritus akin yotechmakakej tonakayo. Kuakon ijkuak timikij, xtlaj nokaua totech. Noijki, ijkuak timikij popoliui totlamachilis, niman san ompa tlami totlanemililuan. Ika yejon, Lázaro xtlaj okijto tla itlaj ipan onochiuj ijkuak omik, pampa xtlaj kimachiliaya. Xkita Salmo 146:4 niman Eclesiastés 9:5, 6, 10.
¿Kintlajyouiltia toTajtsin ika tlitl akin yomijkej? Ijkuak Biblia kijtoua ika akin yomijkej xtlaj kimatij, techititia ika xmelak ijkuak sekimej kinemiliaj ika toTajtsin tetlajyouiltia ika tlitl. Yejua xkuelita ijkuak nonemilia ika yakaj ijkon kitlajyouiltiaj. Xkita Jeremías 7:31.
Xkita video ¿Kenon nemij akin yomijkej?
3. ¿Uelis titlajtoskej imiuan akin yomijkej?
Nion se akin yomik ueli tlakaki nion tlajtoua (Salmo 115:17). San ika, nemij xkuakualtin iluikaktekitkej akin tetlaneltokiltiaj ika kema uelis titlajtos imiuan akin yomijkej (2 Pedro 2:4, NM). Jehová xtechkauilia matikyejyekokan titlajtoskej imiuan akin yomijkej. Xkita Deuteronomio 18:10, 11.
4. ¿Akinomej yoliuiskej?
Melak miyekej akin nemij ipan intlalkon oksejpa yoliuiskej. Sekimej akin okichiujkej tlen xkuajli niman xokixmatkej toTajtsin, oksejpa yoliuiskej. Xkita Lucas 23:43 niman Hechos 24:15.
Akin yoliuiskej uelis nomachtiskej itech toTajtsin. Noijki uelis tlaneltokaskej itech Jesús niman kitlakamatiskej (Apocalipsis [Revelación] 20:11-13). Tla akin yoliuiskej kichiuaj tlen kuajli, nemiskej nochipa ika inyojlo ipan tlaltikpaktli. Xkita Juan 5:28, 29.
5. ¿Tlenon tikasikamatij itech toTajtsin pampa teyolitis?
Pampa toTajtsin okuajtitlan iKoneuj mamikiki topampa uelis oksejpa yoliuiskej akin yomijkej. Ijkon Jehová techititia ika techtlasojtla niman techmaka tlen xtechnamiki tikseliskej. Ijkuak oksejpa uajnemiskej akin yomijkej, ¿akinon tikuelitaskia tikitas? Xkita Juan 3:16 niman Romanos 6:23.