TLAMACHTIJLI 53
Makiyolpakti Jehová tlen ika timoyolpaktia
Jehová se toTajtsin akin yolpaki (1 Timoteo 1:11, TNM). Niman yejua kineki ika tejuamej noijki melak matiyolpakikan. Jehová kineki ika tejuamej matikxelokan tiempo niman ijkon matoseuikan itech totekiyo niman itech nochi tlen tikchiuaj. Ipan yejuin tlamachtijli, tikitaskej tlenon uelis tikchiuaskej ijkuak toseuiskej niman ijkon uelis toyolpaktiskej niman noijki tikyolpaktiskej Jehová.
1. ¿Tlenon noneki tikilnamikiskej ijkuak tikitaskej tlenon ika toyolpaktiskej?
¿Tlenon tikuelita tikchiuas ijkuak timoseuiya? Sekimej kuelitaj nokauaskej inchan niman ijkon kiamapouaskej se libro, kinkakiskej tlakuikaltin, kitaskej se película noso kalakiskej ipan Internet. Niman oksekimej kuelitaj nosentlaliskej imiuan iminamigos niman ijkon onpaxaloskej, onnauiltiskej noso onnaltiskej kampa onka atl. Maski tlatlamantik tlen tikuelitaj tikchiuaskej, noneki kuajli tikitaskej ika tlen tiktlapejpeniaj makiyolpakti toTajtsin (Efesios 5:10). Yejuin melak noneki tikilnamikiskej pampa aman miyekej kuelitaj noyolpaktiskej ika tlen toTajtsin xkuelita, ken auilnemilistli, naualyotl niman nouijsokilistli (xkita Salmo 11:5). ¿Tlenon techpaleuis kuajli matiktlapejpenikan tlenon ika toyolpaktiskej?
Tla akin imiuan touikaj kitlasojtlaj Jehová, yejuamej techpaleuiskej kuajli matiktlapejpenikan tlenon ika toyolpaktiskej. Ijkon ken otiuelkej ipan tlamachtijli 48, tla touikaj imiuan akin tlamachilisejkej, titlamachilisejkej yeskej. San ika, tla tejuamej touikaj imiuan akin xkintlakamatij itlanauatiluan Jehová, xkuajli tonkisaskej (Proverbios 13:20).
2. ¿Tleka melak noneki matikitakan kech tiempo toyolpaktiaj?
Kanaj yotikitakej ika tlen tikuelitaj tikchiuaskej ijkuak toseuiyaj xkitlauelita Jehová, san ika, aman noneki kuajli tikitaskej ika yejon tlen tikuelitaj tikchiuaskej maka melak miyek tiempo matechkuili. ¿Tleka? Pampa tla xtotlajpiyaj, xok techmakas tiempo para tikchiuaskej tlen más noneki. Biblia techijlia: “Maka xpolokan tiempo, yej nochipa xchiuakan tlen kuajli” (xkita Efesios 5:15, 16).
OKSEKI XKASIKAMATI
Matikitakan tlenon uelis mitspaleuis kuajli xtlapejpeni tlenon ika timoyolpaktis.
3. Maka xmoyolpakti ika tlen teijtlakoua
¿Tleka melak noneki kuajli matikitakan tlenon ika toyolpaktiaj? Xkitakan VIDEO niman xtlajtokan itech yejuin:
Yeuejkaui miyekej romanos kuelitayaj ontlamauisoskej kampa nouijsokiyaj niman nomiktiayaj sekimej tlakamej. ¿Tleka tikijtouaj ika aman miyekej noijki kuelitaj noyolpaktiskej ika tlen xkuajli?
Ijkon ken otikitakej ipan video, ¿tlenon okasikamat Danny?
Xkitakan Romanos 12:9 niman xtlajtokan itech yejuin:
¿Kenijki techpaleuiya yejuin texto kuajli matiktlapejpenikan tlenon ika toyolpaktiskej?
¿Tlenon kitlauelita Jehová? Xkitakan Proverbios 6:16, 17 niman Gálatas 5:19-21. Ijkuak nenkitaskej se texto, xtlajtokan itech yejuin:
Itech nochi tlen noteneua ipan yejuin texto, ¿tlenon más kuelitaj kichiuaskej miyekej ipan yejuin tonaltin niman ijkon noyolpaktiskej?
Kuajli xtlapejpeni tlenon ika timoyolpaktis
Xmotlajtolti:
¿Tlenon nochiua? ¿Nochiua itlaj tlen kitlauelita Jehová?
¿Kemanon? ¿Nikchiuasneki yejuin ijkuak noneki nikchiuas itlaj tlen más noneki?
¿Iuan akinon? ¿Nonekis uejkaujtipan ninemis imiuan akin xkitlasojtlaj Jehová?
Tla tiknekij kuajli tinemiskej, noneki tiktlalkauiskej tlen uelis kichiuas topan manochiua tlen xkuajli. Ika yejon, noneki totlajpiyaskej maka toyolpaktiskej ika tlen ueliskia techijtlakos.
4. Maka san xpolo motiempo
Xkitakan VIDEO niman xtlajtokan itech yejuin:
Maski tokniuj akin otikitakej ipan video xkichiujtoya tlen xkuajli, ¿tlenon ipan nochiujtoya pampa san kipolouaya itiempo?
Xkitakan Filipenses 1:10 niman xtlajtokan itech yejuin:
¿Kenijki uelis techpaleuis yejuin texto matikitakan kech tiempo toyolpaktiskej?
5. Xtlapejpeni tlen kuajli
Maski Jehová xkuelita miyek tlemach tlen miyekej kuelitaj ika noyolpaktiskej, onka okseki tlemach tlen kema kuelita, niman tejuamej uelis tikchiuaskej yejon niman ijkon toyolpaktiskej. Xkitakan Eclesiastés 8:15 niman Filipenses 4:8, niman xtlajtokan itech yejuin:
¿Tlenon tikuelita ika timoyolpaktis?
Ijkuak toseuiyaj, uelis tikchiuaskej itlaj tlen techyolpaktis niman tlen kiyolpaktis Jehová.
SEKIMEJ KIJTOUAJ: “Xtlaj tlenon tla tejua tijkaki noso tikita kampa nouijsokij, kampa auilnemij noso kampa kichiuaj naualyotl. Aman tej, tla tejua tikchiuaskia tlen ompa tikaki noso tikita, yejon kema xkuajli yeskia”.
¿Tejua tlenon tikijtoskia?
TLEN OTIUEL
Jehová kineki kuajli matiktlapejpenikan tlenon ika toyolpaktiskej ijkuak toseuiyaj.
¿Kenon titlanankiliskia?
¿Tlenon xika toyolpaktiaj akin tiktekichiuiliaj toTajtsin?
¿Tleka melak noneki matikitakan kech tiempo toyolpaktiaj?
¿Tikneki timoyolpaktis ika tlen kuelita Jehová? ¿Tleka?
OKSEKI XKITA
Xkita akinon noneki techijlis tlenon ika toyolpaktiskej.
Xkita tlenon uelis mitspaleuis kuajli xtlapejpeni tlenon tikchiuas ijkuak timoseuiya.
“¿Kuajli tlen ika toyolpaktiaj?” (Amatl Tekakistilijketl, 15 de octubre de 2011)
Xkita tlamachtijli “Onikajkauj ika nitechikoitaya”, ompa tikitas tlenon okipaleui se tlakatl makikajkaua seki tlen ika noyolpaktiaya.
“Biblia okichiuj manopatlakan” (Amatl Tekakistilijketl, 1 de febrero de 2010)
Xkita tlenon okichiuj se siuatl ijkuak kitstoya tlenon kimauisos chika noseuiaya.