Nochipa kuajli xmouika imiuan tokniuan

Ijkuak tinemij imiuan tokniuan, tomachiliaj ijkon ken tekiuaj David, akin okijto: “Xkitakan ken kuajli niman kualtsin ijkuak nemij san sekan ikoneuan Dios ikan tetlajsojtlalistli” (Salmo 133:1). Ipan ikalpan toTajtsin tinochimej melak kuajli touikaj, san ika, tla tiknekij nochipa ijkon touikaskej, noneki tikchiuaskej seki tlemach.

1. ¿Tlenon kualtsin panoua ipan ikalpan Jehová?

Tla tejua tiaskia ipan okse país niman tiaskia ipan se tlanechikojli, kanaj xtikasikamatiskia tlen ompa noijtoua pampa okse tlajtojli tlajtouaj. Maski ijkon, melak kuajli timomachiliskia. ¿Tleka ijkon tikijtouaj? Pampa maski san kanon tias, tikitas ika iteixpantijkauan Jehová kintekitiltiaj san no yejua amatlajkuiloltin ijkuak nomachtiaj Biblia. Niman xsan yejon, tinochimej melak tokojtiliaj tikimititiskej oksekimej ika tikintlasojtlaj. Maski san kanon matichantikan, tinochimej tiknekij tikueyiteneuaskej “itokayo Jehová” niman “san sekan” tikueyichiuaskej (Sofonías 3:9, TNM).

2. ¿Tlenon uelis tikchiuas niman ijkon nochimej akin nemij ipan tlanechikojli manemikan ika inyojlo?

“Sanoyej xmotlajsojtlakan inuan oksekimej ikan nochi nemoyojlo” (1 Pedro 1:22). Tejua uelis tikchiuas ijkon ken kijtoua yejuin texto tla tikita tlen kuajli kichiuaj oksekimej niman tla xsan tikita tlen xkuajli kichiuaj. Maka san xmouika imiuan akin kuelitaj kichiuaskej tlen tejua tikuelita tikchiuas, noijki xmokojtili timouikas imiuan akin oksekan ualeuaj niman akin xsan noijkimej ken tejua. Niman, melak xmokojtili maka titechikoitas (xkita 1 Pedro 2:17).a

3. ¿Tlenon uelis tikchiuas tla tikpiya se tlauejli iuan se tokniuj?

Ipan tlanechikojli tinochimej kuajli touikaj, san ika, pampa titlajtlakolejkej, kemantika kanaj uelis titeyolkokoskej noso uelis techyolkokoskej. Ika yejon, Biblia kijtoua: “Xmotlapopoluijtokan”. Niman noijki kijtoua: “Ijkon ken Jehová omechtlapopolui ika kuajli iyojlo, nemejuamej noijki noneki ijkon nenkichiuaskej” (xkita Colosenses 3:13, TNM). Jehová nochipa techtlapopoluiya maski miyekpa tikyolkokouaj. Ika yejon, yejua kineki ika tejuamej noijki matikintlapopoluikan tokniuan. Tla kemantika tikita ika yakaj otikyolkoko, iuan xtlajto niman xtlajtlanili mamitstlapopolui (xkita Mateo 5:23, 24).b

OKSEKI XKASIKAMATI

4. Maka xtechikoita

Tejuamej tiknekij tikimititiskej nochimej tokniuan ika tikintlasojtlaj. San ika, kanaj kemantika xmás tiknekij touikaskej imiuan akin xijkon ken tejuamej. Tla ijkon mopan nochiua, ¿tlenon uelis mitspaleuis? Xkitakan Hechos 10:34, 35 niman xtlajtokan itech yejuin:

• Jehová kinselia nochimej akin kinekij kitekichiuiliskej pampa yejua xtechikoita. Ika yejon, ¿tejua tlenon noneki tikchiuas?

• ¿Akinomej kinchikoitaj kampa tejua tichanti? ¿Tleka xnoneki tikchiuas ijkon ken akin techikoitaj?

Xkitakan 2 Corintios 6:11-13 niman xtlajtokan itech yejuin:

• ¿Tlenon uelis tikchiuas niman ijkon más tikintlasojtlas nochimej tokniuan?

5. Xtetlapopolui niman xyektlali tlauejli

Maski tejuamej xkeman nonekis tiktlapopoluiskej Jehová, yejua nochipa ika iyojlo techtlapopoluiya. Xkitakan Salmo 86:5 niman xtlajtokan itech yejuin:

• Jehová melak kuajli iyojlo niman kinektika tetlapopoluis, ¿tlenon techmachtia yejuin?

• ¿Tikuelita ken Jehová tetlapopoluiya? ¿Tleka?

• ¿Tlenon ueliskia kichiuas maka kuajli xmouika imiuan oksekimej?

¿Kenijki uelis tikchiuaskej ijkon ken Jehová niman ijkon nochipa kuajli touikaskej imiuan tokniuan? Xkitakan Proverbios 19:11 niman xtlajtokan itech yejuin:

• Tla kemantika yakaj kichiua itlaj tlen mitskualania noso mitsyolkokoua, ¿tlenon ueliskia tikchiuas niman ijkon maka más maueyiya yejon tlauejli?

Kemantika tejuamej tikchiuaj itlaj tlen kinyolkokoua oksekimej. Ijkuak ijkon panos, ¿tlenon noneki tikchiuaskej? Xkitakan VIDEO niman xtlajtokan itech yejuin:

VIDEO: Melak kuajli tla titetlapopoluiyaj (6:01)

• ¿Tlenon okichiuj tokniuj akin otikitakej ipan video niman ijkon oksejpa kuajli nouikas iuan tokniuj?

6. Xkita tlen kuajli kichiuaj tokniuan

Ijkuak más kuajli tikimixmatij tokniuan, xok san tikitaj tlen kuajli kichiuaj, noijki peua tikitaj tlen xkuajli kichiuaj. ¿Tlenon uelis techpaleuis maka san matikitakan tlen xkuajli kichiuaj? Xkitakan VIDEO niman xtlajtokan itech yejuin:

VIDEO: ¡Xmoyektlalijtiuj! (5:10)

• ¿Tlenon uelis mitspaleuis xkita tlen kuajli kichiuaj tokniuan?

Jehová kita tlen kuajli tikchiuaj. Xkitakan 2 Crónicas 16:9a niman xtlajtokan itech yejuin:

• ¿Kenijki timomachilia ijkuak tikmati ika Jehová kita tlen kuajli tikchiua?

TLEN OTIUEL

Tla tejua tikintlapopoluiya nochimej tokniuan niman tikimititia ika tikintlasojtla, titlapaleuis ika ipan tlanechikojli nochimej manemikan ika inyojlo.

¿Kenon titlanankiliskia?

• ¿Tlenon uelis mitspaleuis maka xtechikoita?

• ¿Tlenon uelis tikchiuas ijkuak tikpiyas se tlauejli iuan se tokniuj?

• ¿Tikuelitaskia tikintlapopoluis oksekimej ijkon ken kichiua Jehová? ¿Tleka?

OKSEKI XKITA

Jesús okiteneuj itlaj tlen techpaleuiya maka san matikitstokan tlen xtikuelitaj itech oksekimej. Xkita tlenon okijto.

¡Xkixti kojtli tlen tikpiya ipan moixtololoj! (6:56)

¿Noneki tiktlajtlaniskej matechtlapopoluikan maski tla tiknemiliaj ika tejuamej xtlaj otiktechiuilijkej?

“Melak tepaleuij tla tiktlajtlani mamitstlapopoluikan” (Amatl Tekakistilijketl, 1 de noviembre de 2002)

Xkita tlenon yokinpaleui sekimej maka sa matechikoitakan.

Maka matitechikoitakan san ipampa tlen tikitaj (5:06)

Xkita tlenon uelis tikchiuas tla tikpiya se tlauejli iuan se tokniuj niman ijkon maka xeliuis tlanechikojli.

“Matikyektlalikan tlaueltin ika tlasojtlalistli” (Amatl Tekakistilijketl, mayo de 2016)