Melak techpaleuiya ijkuak kuajli titouikaj imiuan tokniuan

1, 2. ¿Tlenon melak kipatiojkaita Jehová, niman tlenon kineki matikchiuakan?

ONKA seki tlen tikchiuaj tlen Jehová melak kipatiojkaita, ken ijkuak tikinchiuiliaj tlen kuajli oksekimej. Jesús otemachti ika noneki tikintlasojtlaskej oksekimej ijkon ken tejuamej titotlasojtlaj (Mat. 22:​37-39). Yejuin kijtosneki ika hasta akin xkitekichiuiliaj toTajtsin noneki tikinchiuiliskej tlen kuajli. Tla ijkon tikchiuaj, tikchiujtoskej ken toTaj iluikakchane akin “kichiua ika tonaltsintli makintlauilui akin xkuajkualtin niman akin kuajkualtin. Niman kichiua makiyaui inpan akin kipiyaj kuajli inyojlo niman inpan akin kipiyaj xkuajli inyojlo” (Mat. 5:45).

² Maski Jehová nochimej kintlasojtla, más kintlasojtla akin kitlakamatij (Juan 14:21). Niman yejua kineki ika tejuamej noijki más matikintlasojtlakan tokniuan, ika yejon, yejua techijlia “Sanoyej xmotlajsojtlakan” niman “Xmoititikan ika nemoikneliaj” (1 Ped. 4:8; Rom. 12:10). Yejuin tlasojtlalistli niman teiknelilistli tlen noneki tikimititiskej tokniuan yeskia ken on tlen tikimititiaj tochanejkauan noso akin kuajli imiuan titouikaj.

3. ¿Tlenon noneki matikilnamikikan itech tlasojtlalistli?

³ Tlasojtlalistli yeskia ken se xochitsintli. Para manoskalti, noneki tikatekiskej niman tiktlajpiyaskej. Apóstol Pablo ijkin okimijli tokniuan: “Nochipa xmotlajsojtlakan ken nenmiknijtin” (Heb. 13:1). Jehová kineki más matitetlasojtlatiakan. Ipan yejuin tlamachtijli tikitaskej tleka melak noneki más matitouikakan imiuan tokniuan niman kenijki uelis nochipa imiuan titouikaskej.

TLEKA NONEKI MÁS MATITOUIKAKAN IMIUAN TOKNIUAN

4. ¿Tlenon techpaleuis nochipa matikpatiojkaitakan ken kualtsin titouikaj imiuan tokniuan? (Salmo 113:1; noijki xkimita tlaixkopinaltin).

⁴ (Xpoua Salmo 133:1). Ijkon ken salmista, tejuamej noijki tikijtouaj ika melak “kuajli niman kualtsin” ika ueli titouikaj imiuan akin kitlasojtlaj Jehová. San ika, sakin ueliskia xok tikitaskej ken kualtsin titouikaj imiuan tokniuan. Kanaj ueliskia techpanos ken yakaj akin kita se kualtsin niman ueyi kojtli niman melak kuelita, san ika, sakin xok kikualtsinita pampa nochipa ompa kipanauijtinemi. Tejuamej nochipa tikimitaj tokniuan, kemantika miyekpa ipan se semana, ¿tlenon techpaleuis matikinpatiojkaitakan ijkon ken ijkuak otikimixmatkej? Tla titlanemiliaj tleka tikinpatiojkaitaj niman kenijki melak tepaleuiyaj ipan tlanechikojli.

5. ¿Kenijki kinpaleuiya sekimej ijkuak kitaj ika akin tiktekichiuiliaj toTajtsin melak titotlasojtlaj?

⁵ Ijkuak sekimej kemach yauej ipan totlanechikoluan, melak kinmojkatlachialtia kenijki titoititiaj ika melak titotlasojtlaj, niman kajsikamatij ika yejuin ikalpan toTajtsin. Jesús okijto: “Tla nemotlasojtlaj, nochimej kimatiskej ika nejua onimechmachti” (Juan 13:35). Matikitakan tlen ipan opanok se ichpochtli akin itoka Chaithra. Yejua nomachtijtoya universidad niman opeuj nomachtia Biblia. Sejpatipan okijlijkej mauiya ipan se ueyi tlanechikojli yeyi tonajli, niman yejua oyaj. Ijkuak yotlanka kachtopa tonajli, ijkin okijli tokniuj akin kimachtijtoya: “Notajuan xkeman onechnapalojkej. ¡San ika, inpan yejuin kachtopa tonajli ipan moueyitlanechikol, semi cincuenta y dostipan yonechnapalojkej! Jehová yonechititi ika melak nechtlasojtla itechkopa ikalpan. Nejua noijki nikneki ninemis ipan ikalpan”. Chaithra xokikajkauj ika nomachtia Biblia, niman ipan 2024 onoapolakti. Kema, miyekpa akin kemach yauej tlanechikoltin peuaj kinekij kitekichiuiliskej Jehová pampa kitaj tlen kuajli tikchiuaj, ken ijkuak titoititiaj ika melak titotlasojtlaj (Mat. 5:16).

6. ¿Kenijki techpaleuis tla más kuajli titouikaj imiuan tokniuan?

⁶ Melak techpaleuis tla más kuajli titouikaj imiuan tokniuan. Pablo ijkin okimijli tokniuan: “Cada mojmostla xmoyolchikauakan cada se inuan oksekimej […], maka nensemej nemoyoltechikauaskej niman mechkajkayauas on tlajtlakojli” (Heb. 3:13). Tla kemantika tikmachiliaj ika xok chikaujtok totlaneltok niman yetiktlalkauijtokej Jehová, yejua uelis kintekitiltis tokniuan para matechpaleuikan (Sal. 73:​2, 17, 23). ¡Melak kualtsin pampa tikinpiyaj tokniuan akin techpaleuiyaj!

7. ¿Tleka tikijtouaj ika tla titotlasojtlaj techpaleuis kuajli matitouikakan imiuan tokniuan? (Colosenses 3:​13, 14).

⁷ Akin tiktekichiuiliaj toTajtsin melak titokojtiliaj titotlasojtlaskej, ika yejon, tikinseliaj miyek tlateochiualistin (1 Juan 4:11). San matikonteneuakan yejuin, pampa melak titotlasojtlaj, tejuamej titoijyouiyaj niman yejon kichiua tinochimej kuajli matitouikakan (Efes. 4:​2-6; xpoua Colosenses 3:​13, 14). Ika yejon, melak kualtsin titomachiliaj ipan tlanechikoltin, xonka okse grupo kampa manochiua ijkon ken ipan ikalpan Jehová.

MATITOTLAKAITAKAN

8. ¿Kenijki techpaleuiya Jehová kuajli matitouikakan?

⁸ Ipan ikalpan Jehová tinochimej kuajli titouikaj maski titlajtlakolejkej, niman yejon se milagro tlen Jehová kichiujtok (1 Cor. 12:25). Biblia kijtoua: “Dios kuajli yomechmachtij” (1 Tes. 4:9). ¿Kenijki techmachtia? Ipan iTlajtoltsin kijtoua tlenon noneki tikchiuaskej niman ijkon kuajli titouikaskej imiuan oksekimej. Niman tejuamej titokauiliaj matechmachti Jehová ijkuak kuajli titomachtiaj iTlajtol niman tikchiuaj tlen tiuelij (Heb. 4:12; Sant. 1:25). Kema, akin tiiteixpantijkauan Jehová titokojtiliaj ijkon tikchiuaskej.

9. ¿Tlenon techmachtia Romanos 12:​9-13?

⁹ ¿Kenijki uelis techpaleuis iTlajtol toTajtsin más matitouikakan imiuan tokniuan? Matikitakan tlen okijto Pablo ipan Romanos 12:​9-13 (xpoua). Kuajli matikitakan kampa kijtoua: “Nemejuamej achto xkimititikan oksekimej ika nenkintlakaitaj”. ¿Tlenon kijtosneki yejuin? Ika nochipa noneki tikitaskej kenijki uelis tikimititiskej tokniuan ika tikintlasojtlaj. Kema, tikimititiaj ika tikintlasojtlaj ijkuak tikintlapojpoluiyaj, ijkuak kuajli tikinseliaj tochan niman ijkuak itlaj tikintlayokoliaj (Efes. 4:32). Xnoneki san tikchiatoskej ika oksekimej matechititikan ika techtlasojtlaj, yej noneki tejuamej kachtopa tikimititiskej. Tla ijkon tikchiuaj, topan nochiuas tlen okijto Jesús: “Más pakij akin kitemakaj xijkon ken akin kiseliaj” (Hech. 20:35).

10. ¿Kenijki tikteititiaj ika titekitkej ijkuak titetlakaitaj? (Noijki xkita tlaixkopinajli).

¹⁰ Kuajli matikitakan tlenon okijto Pablo sakin ika okijto ika tejuamej kachtopa noneki titetlakaitaskej: “Xtekitikan, maka san xtlatsiuikan”. Yakaj akin tekitki, yolpaki ijkuak kichiua itekiyo, niman ijkuak kimakaj se tekitl, kuajli kichiua. Proverbios 3:​27, 28 kijtoua: “Maka kaman timonenekis tikpaleuis yejuan itlaj kipoloua ijkuak tikpiyas tlinon ika tiuelis tikpaleuis”. Kuakon, tla tikitaj ika yakaj noneki makipaleuikan, nimantsin matikitakan tla uelis tikpaleuiskej. Maka matiknemilikan ika uelis sakin tikpaleuiskej noso ika uelis oksekimej kipaleuiskej (1 Juan 3:​17, 18).

11. ¿Kenijki uelis más titouikaskej imiuan tokniuan?

¹¹ Noijki uelis tikteititiskej ika titetlakaitaj tla ijkuak techyolkokouaj, nimantsin titetlapojpoluiyaj. Efesios 4:26 kijtoua: “On tlauejli maka xpiyakan nochi tonajli, yej saniman xmoyoltlalikan”. ¿Tleka noneki nimantsin matitetlapojpoluikan? Para xtijkauiliskej Diablo matechchiualti matikchiuakan tlen xkuajli (Efes. 4:27). Ipan Biblia, Jehová miyekpa techijlia ika noneki titetlapojpoluiskej. Colosenses 3:13 kijtoua: “Xtlapojpoluikan tla yakaj xkuajli itlaj mechchiuilia”. Tla tikintlapojpoluiyaj tokniuan ijkuak techyolkokouaj, techpaleuis más imiuan matitouikakan niman san sekan matinemikan “ikan yolseuilistli” (Efes. 4:3). Tla xtitotlapojpoluiyaj, xuelis kuajli titouikaskej niman xonias yolseuilistli.

12. ¿Kenijki techpaleuiya Jehová matitetlapojpoluikan?

¹² Kema, kemantika ouijtika tikitaj tiktlapojpoluiskej yakaj akin otechyolkoko. San ika, iespíritu toTajtsin uelis techpaleuis ijkon matikchiuakan. Sakin ika Pablo okijto ika noneki matitotlasojtlakan niman matitekitkej, ijkin okijto: “Xkauilikan ika espíritu santo mamechyekana”. Yejuin kijtosneki ika espíritu santo uelis kichiuas melak matiknekikan tikchiuaskej tlen kuajli, ken titetlasojtlaskej niman titetlapojpoluiskej ika nochi toyojlo (Rom. 12:11). Ika yejon, tiktlajtlaniliaj Jehová matechpaleui matitetlapojpoluikan (Luc. 11:13).

MAKA MATIXELIUJTOKAN

13. ¿Tlenon ueliskia techxelos?

¹³ Ipan tlanechikojli tinochimej titlatlamantikej (1 Tim. 2:​3, 4). Ika yejon, xsan noijki tlen tiktlapejpeniaj, ken ijkuak tiktlapejpeniaj ken titotlakentiskej, ken titokualnextiskej, ken titopajtiskej noso ken titoyolpaktiskej (Rom. 14:4; 1 Cor. 1:10). San ika, toTajtsin yotechmachti tinochimej matitotlasojtlakan, ika yejon, xtiknemiliaj ika tlen tejuamej tiktlapejpeniaj yejon tlen más kuajli xijkon ken tlen oksekimej kitlapejpeniaj (Filip. 2:3).

14. ¿Tlenon noneki nochipa tikchiuaskej, niman tleka?

¹⁴ Noijki, tla titokojtiliaj nochipa titeyolchikauaskej, titlapaleuiskej para tinochimej kuajli matitouikakan ipan tlanechikojli (1 Tes. 5:11). Aman youajnokuepkej melak miyekej tokniuan akin youejkaujkaj ika xok touan nosentlaliayaj niman akin yokinkixtijkaj itech tlanechikojli niman tejuamej melak kuajli tikinseliaj (2 Cor. 2:8). Matikitakan tlenon okijto se tokniuj siuatl akin oksejpa oyaj ipan tlanechikojli sakin ika yopanoka 10 xiuitl ika xok touan nosentlaliaya niman xok touan tenojnotsaya, yejua kijtoua: “Nochimej onechtlajpalojkej niman nesiya ika pakiyaj pampa oksejpa oniaj tlanechikojli” (Hech. 3:19). ¿Kenijki okipaleui tokniuj pampa kuajli okiselijkej ipan tlanechikojli? Yejua kijtoua: “Onikmachili ika Jehová nechpaleuijtoya oksejpa maniyolpaki”. Ijkuak titokojtiliaj titeyolchikauaskej, Jesús uelis techtekitiltis niman ijkon matikinyolchikauakan akin melak yosiaujkej (Mat. 11:​28, 29).

15. ¿Kenijki noijki uelis titepaleuiskej para tinochimej kuajli matitouikakan? (Noijki xkita tlaixkopinajli).

¹⁵ Tlen tikijtouaj noijki uelis tepaleuis tinochimej kuajli matitouikakan. Job 12:11 kijtoua: “Ijkon ken tonakas kuajli kaki tlinon se kijtoua, tokamak ueli kimati ken uelik on tlakuajli”. Se tlakualchiujketl nochipa kimati tla uelik okikixti tlen okichijchiuj achto tetlakualtekilis. Noijki ijkon, achto titlajtoskej noneki kuajli tiknemiliskej tla tlen tikijtoskej teyolchikauas, teyolseuis niman tla tepaleuis (Sal. 141:3; Efes. 4:29).

16. ¿Akinomej más noneki nokojtiliskej teyolchikauaskej ijkuak tlajtoskej?

¹⁶ Teueuentsitsintin, tajtin niman nantin noneki más nokojtiliskej teyolchikauaskej ijkuak tlajtoskej (Col. 3:​19, 21; Tito 2:4). Tlayekankej noijki melak kinyolchikauaj niman kinyolseuiyaj iborreguitos toTajtsin (Is. 32:​1, 2; Gál. 6:1). Se proverbio techijlia: “Se tlajtojli tlen noijtoua ijkuak noneki, ¡melak kuajli!” (Prov. 15:​23, TNM).

MELAUAK MATITETLASOJTLAKAN

17. ¿Tlenon uelis tikchiuaskej niman ijkon melauak tikintlasojtlaskej tokniuan?

¹⁷ Apóstol Juan okijto: “Maka san xteijlikan ika nenkipiyaj tetlajsojtlalistli, nion maka san xkijtokan ika nenkintlajsojtlaj on tokniuan, yej melauak xkintlajsojtlakan ikan nochi nemoyojlo niman xkintitikan ika nenkintlajsojtlaj ika on tlen nenkichiuaj” (1 Juan 3:18). ¿Tlenon uelis tikchiuaskej niman ijkon melauak tikintlasojtlaskej tokniuan niman más imiuan titouikaskej? Matikxelokan tiempo para más imiuan tinemiskej. Matikitakan kenijki uelis más imiuan titonojnotsaskej ipan tlanechikojli niman imiuan matitenojnotsakan. Niman noijki matikintlajpalotij. Tla ijkon tikchiuaj, oksekimej uelis ijkin techijliskej: “Dios kuajli yomechmachtij” (1 Tes. 4:9). Kema, tikitaskej “ken kuajli niman kualtsin ijkuak nemij san sekan ikoneuan Dios ikan tetlajsojtlalistli” (Sal. 133:1).