Melak techpaleuiya ijkuak tiknisiuiyaj toTajtsin

1, 2. a) ¿Tlenon noneki tikchiuas niman ijkon más kuajli timouikas iuan yakaj? b) ¿Tlenon tikitaskej ipan yejuin tlamachtijli?

Xontlanemili itech yakaj akin melak kuajli iuan timouika. ¿Tikilnamiki tleka melak kuajli opeuj nemouikaj? Kanaj miyek tiempo san sekan nenpanouayaj, ika yejon, otikmat tlenon yokixnamik, tlenon kuelita niman tlenon xkuelita. Niman xsan yejon, kanaj noijki otikitak ika kinpiaya kualtsitsintin kualneskayomej niman hasta opeuj tikneki tikchiuas ken yejua. Niman aman melak tiktlasojtla.

² Kema, para uelis melak kuajli timouikas iuan yakaj, noneki tiempo niman kojtilistli. Noijki ijkon, tla tiknekij titouikaskej iuan toTajtsin noneki tikuiskej totiempo niman tokojtilis. Ipan yejuin tlamachtijli, tikitaskej kenijki uelis más titonisiuiskej itech toamigo Jehová. Kachtopa tikitaskej tleka melak kuajli tla ijkon tikchiuaj.

3. ¿Tleka melak kuajli tla titlanemiliaj itech kenijki techpaleuis tla titonisiuiyaj itech Jehová? Xkijto se neskayotl.

³ Tinochimej tikmatstokej ika melak kuajli tla titonisiuiyaj itech Jehová, san ika, melak noneki matitlanemilikan itech kenijki melak techpaleuiya ijkuak ijkon tikchiuaj (Sal. 63:​6-8). Matikitakan se neskayotl para tikajsikamatiskej yejuin. Tlaltikpakchanejkej kimatstokej ika melak tepaleuij tla kuajli titlakuaj, tla tikonij atl, tla tikchiuaj ejercicio niman tla kuajli tikochij. San ika ¿tleka miyekej xijkon kichiuaj? Pampa xtlanemiliaj itech kenijki melak kinpaleuis. Noijki ijkon, para tiknekiskej más titonisiuiskej itech Jehová melak noneki matitlanemilikan itech kenijki melak techpaleuiya ijkuak ijkon tikchiuaj (Sal. 119:​27-30).

4. ¿Tlenon okijto salmista ipan Salmo 73:28 itech Traducción del Nuevo Mundo?

⁴ (Xpoua Salmo 73:​28, TNM).a Akin okijkuilo Salmo 73 ualeuaya itech ichanejkauan Leví niman tlatsotsonketl katka ipan teopan. Yejua kanaj youejkaujka ika kitekichiuiliaya toTajtsin, san ika, kimatstoya ika melak nonekiya kilnamiktos kenijki kipaleuiya nemis nisiuj itech Jehová. Niman kinekiya ika oksekimej noijki makitakan ika melak tepaleui tla timouika iuan Jehová. ¿Kenijki tepaleuiya?

TIYOLPAKIJ IJKUAK TIKNISIUIYAJ TOTAJTSIN

5. a) ¿Tleka tiyolpakij ijkuak tiknisiuiyaj Jehová? b) ¿Kenijki mitspaleuiya niman mitstlajpiya tlamachilistli tlen mitsmaka Jehová? (Proverbios 2:​6-16).

⁵ Ijkuak más titonisiuiyaj itech Jehová, más tiyolpakij (Sal. 65:4). Matikitakan tleka ijkon tikijtouaj. Ijkuak tikchiuaj tlen Jehová techijlia ipan iTlajtoltsin, kuajli tonkisaj. Tlamachilistli tlen Jehová techmaka techpaleuiya maka matikchiuakan tlen uelis techtlajyouiltis (xpoua Proverbios 2:​6-16). Ika yejon, Biblia ijkin kijtoua: “Kipiyas pakilistli on yejuan kinextia tlamatkilistli niman kajsikamatilistli” (Prov. 3:13).

6. ¿Tleka salmista xok yolpakiya?

⁶ San ika, akin titouikaj iuan Jehová kemantika noijki titajmanaj. Matikitakan tlenon ipan opanok akin okijkuilo Salmo 73. Yejua xok yolpakiya pampa opeuj kita ika akin xkitlakaitayaj toTajtsin niman xkitlakamatiyaj nesiyaj ika más yolpakiyaj niman hasta opeuj kinnexikolita. Kinemiliaya ika akin kichiuayaj tlen xkuajli niman akin noueyimatiyaj, más kipiayaj tomin, xkualouayaj niman xtlajyouiayaj, san ika, yejon xmelauak (Sal. 73:​3-7, 12). Yejuin salmista melak onoyolkoko niman opeuj kinemilia ika xtlaj ika tepaleuij tiktekichiuilis Jehová. Yejua hasta ijkin okijto: “¡Tla ijkon, xitlaj ika nechpaleuiya tla niyolchipauak, niman maski tla xnikchiuas tlajtlakojli!” (Sal. 73:13).

7. ¿Kenijki uelis oksejpa tiyolpakiskej ijkuak melak titajmanaskej? (Noijki xkita tlaixkopinajli).

⁷ Maski salmista melak najmantoya, xsan ijkon onokauj, yejua okitak tlenon ueliskia kichiuas para kuajli nomachilis. Yejua okalak “ipan iyektiopan Dios” niman ompa Jehová okipaleui maka sa ijkon matlanemili (Sal. 73:​17-19). Jehová kimati ijkuak titajmanaj pampa yejua akin más kuajli iuan titouikaj. Ika yejon, ijkuak titajmanaskej, matiktlajtlanilikan matechpaleui matikmatikan tlenon uelis tikchiuaskej. Tlen techijlia ipan iTlajtol niman tlen techijliskej tokniuan, techpaleuis matiktekichiuilijtokan ijkuak titajmantoskej. Niman ijkuak itlaj melak techtekipachos, Jehová techpaleuis kuajli matitomachilikan (Sal. 94:19).b

KUAJLI TINEMIJ NIMAN TIKPIYAJ SE TLAMACHIALISTLI IJKUAK TIKNISIUIYAJ TOTAJTSIN

8. ¿Kenijki noijki techpaleuiya ijkuak titonisiuiyaj itech Jehová?

⁸ Tla titonisiuiyaj itech Jehová, noijki techpaleuiya kuajli matitomachilikan ipan tonemilis. Niman noijki techpaleuiya kuajli matikmatstokan ika nochiuas tlen Jehová yokijto (Jer. 29:11). Más matitlajtokan itech yejuin.

9. ¿Tleka kuajli titomachiliaj ijkuak titonisiuiyaj itech Jehová?

⁹ Ijkuak tiknisiuiyaj Jehová, más kuajli titomachiliaj. Ipan yejuin tonaltin, miyekej tlaltikpakchanejkej kijtouaj ika xnemi toTajtsin. Ika yejon, miyekej xkimatij tleka otinemikoj niman kinemiliaj ika ajsis se tonajli ijkuak tipoliuiskej. San ika, tejuamej yotiuelkej ipan iTlajtol toTajtsin ika “yejua melauak nemi, niman ika Dios kintiochiuas on yejuan melauak kitejtemouaj” (Heb. 11:6). Ijkuak Jehová otechchijchiuj, okichiuj matiknekikan tikueyichiuaskej. Ika yejon, ijkuak tiktekichiuiliaj melak kuajli titomachiliaj niman tiyolpakij (Deut. 10:​12, 13).

10. ¿Tlenon yokijto Jehová kinmakas akin itech tlaneltokaj? (Salmo 37:29).

¹⁰ Miyekej tlaltikpakchanejkej xkipiya se tlamachialistli. Yejuamej san tekitij, nonamiktiaj, kinpiyaj inkoneuan niman kejyeuaj intomintsin para ijkuak yeueuentsitsintin. Yejuamej xkimatij tlenon kichiuas toTajtsin ika tlayekapan. San ika, akin tiitekipanojkauan Jehová kuajli tikmatstokej ika yejua techtlajpiya (Sal. 25:​3-5; 1 Tim. 6:17). Tejuamej tikneltokaj ika toTajtsin, akin toamigo, kichiuas nochi tlen yokijto. Melak miyek tikchiaj ika tlayekapan, kema, sa tikchiatokej nochipa tiktekichiuiliskej Jehová ipan Xochitlalpan (xpoua Salmo 37:29).

11. ¿Kenijki techpaleuiya ijkuak tiknisiuiyaj toTajtsin, niman kenijki nomachilia ijkuak ijkon tikchiuaj?

¹¹ Melak miyek ken techpaleuiya ijkuak titonisiuiyaj itech toTajtsin. Matikonteneuakan yejuin, Jehová techijlia ika tla titoyolkuepaj, techtlapojpoluis (Is. 1:18). Yejon kijtosneki ika uelis tiyolseujtoskej niman xok titoyolkokojtoskej ipampa tlen xkuajli yotikchiujkej (Sal. 32:​1-5). Noijki, tikyolpaktiaj Jehová, niman yejon kichiua kualtsin matitomachilikan (Prov. 23:15). Kuajli tikmatstokej ika melak yomitspaleui pampa tejua yotimonisiui itech Jehová. Aman tej, ¿tlenon uelis tikchiuaskej niman ijkon más tiknisiuiskej toTajtsin?

KEN UELIS MÁS TIKNISIUISKEJ TOTAJTSIN

12. ¿Tlenon noneki tikchiuas para más tiknisiuis toTajtsin?

¹² Tla tejua yotimoapolakti ken iteixpantijkauj Jehová, kijtosneki ika miyek yotiuel itech Jehová niman Jesucristo, yotimoyolkuep itech motlajtlakoluan, yotikteititi ika titlaneltoka itech toTajtsin niman ika timokojtilia tikintlakamatis itlanauatiluan. Ika yejon, uelis tikijtoskej ika tejua yotimonisiui itech Jehová. Aman tej, noneki nochipa ijkon tikchiuas para más tiknisiuis totajtsin (Col. 2:6).

13. ¿Tlenon techpaleuis más matiknisiuikan Jehová?

¹³ ¿Tlenon techpaleuis más matiknisiuikan Jehová? 1) Noneki nochipa tikamapouaskej niman titomachtiskej toBiblia. Matitokojtilikan tikmatiskej tlen xtikmatiyaj. Noijki matikajsikamatikan kenijki tlanemilia toTajtsin, tlenon kineki matikchiuakan niman matinemikan ken yejua kuelita (Efes. 5:​15-17). 2) Noneki nochipa tikchikaujtoskej totlaneltokil. ¿Kenijki uelis ijkon tikchiuaskej? Tla titlanemiliaj itech tlen yokichiuj Jehová para techititis ika techtlasojtla. 3) Noneki tiktlauelitaskej tlen Jehová kitlauelita niman xtitouikaskej imiuan akin kichiuaj tlen xkuajli (Sal. 1:1; 101:3).

14. ¿Tlenon noneki mojmostla tikchiuaskej para tikyolpaktiskej Jehová? (1 Corintios 10:31; noijki xkimita tlaixkopinaltin).

¹⁴ (Xpoua 1 Corintios 10:31). Melak noneki matitokojtilikan tikchiuaskej tlen kiyolpaktia Jehová. San ika, para tikyolpaktiskej xsan noneki titenojnotsaskej niman tiaskej tlanechikoltin, yej noneki mojmostla tikchiuaskej tlen makiyolpakti. San matikonteneuakan yejuin, tikmatstokej ika yejua kineki nochipa matikijtokan tlen melauak niman matiknekikan tiktemakaskej tlen tikpiyaj (2 Cor. 8:21; 9:7). Noijki, Jehová kineki matikpatiojkaitakan tonemilis tlen yotechtlayokoli. Kuakon, tla tejuamej xsajnoye titlakuaj, xsajnoye titlaonij niman tikitaj kenijki más titotlajpiyaskej, más titonisiuiskej itech toTajtsin. Jehová más techtlasojtlaj ijkuak kita ika titokojtiliaj tikchiuaskej tlen kiyolpaktia (Luc. 16:10).

15. ¿Tlenon kineki Jehová matikinchiuilikan oksekimej?

¹⁵ Jehová nochimej kinchiuilia tlen kuajli (Mat. 5:45). Niman yejua kineki ika tejuamej noijki ijkon matikchiuakan. San matikonteneuakan yejuin, yejua kineki ika akin kitekichiuiliaj “maka yakaj ma kiteneuilikan on tlen xkuajli, yej ma nemikan inuan oksekimej ikan yolseuilistli” niman “ma kiteititikan yolyemanilistli itech nochi tlakatl” (Tito 3:2). Yejua ika, tejuamej xtiknemiliaj ika más tiuejueyixtokej xken tlaltikpakchanejkej akin xkitekichiuiliaj toTajtsin (2 Tim. 2:​23-25). Tla nochipa tikinchiuiliaj tlen kuajli oksekimej, más titonisiuiskej itech Jehová.

MÁS MATIKNISIUIKAN TOTAJTSIN MASKI YOTITOPOPOLOJKEJ

16. ¿Kenijki nomachiliaya akin okijkuilo Salmo 73?

¹⁶ ¿Niman tla kemantika tiknemiliaj ika Jehová xok touan nemi? Matitlanemilikan itech tlen ipan onochiuj akin okijkuilo Salmo 73. Yejua ijkin okijto: “Sa achijtsin opoliuito niman nejua niuetsiskia ipan tlajtlakojli. Nokxiuan ye nalauayaj” (Sal. 73:2). Noijki ijkin okijto: “Ninemiya ika ajmantli, niman ninoyolkokouaya”. Niman noijki okijto ika ixpan Jehová nemiya “ken itlaj yolki” (Sal. 73:​21, 22). San ika ¿okinemili ika Jehová xok kitlasojtlaya niman xkitlapojpoluiskia pampa onopopolojka?

17. a) ¿Tlenon okichiuj salmista ijkuak melak xkuajli nomachiliaya? b) ¿Tlenon tiuelij itech tlen okichiuj? (Noijki xkimita tlaixkopinaltin).

¹⁷ Tla salmista okinemili ika Jehová xok iuan nemiya, xuejkaujtipan ijkon okinemili. Maski melak xkuajli nomachiliaya, nesi ika yejua kimatstoya ika nonekiya nonisiuis itech Jehová. Ijkin tikijtouaj pampa yejua ijkin okijto: “Maski ijkon onikchiu, nochipa mouan ninemi. Otinechmakitskij ipan noyekma. Otinechyekan ika motetlakanonotsalis, niman ijkuak tlamis in tlaltikpaktli tinechselis ikan tetlakaitalistli” (Sal. 73:​23, 24). Ijkuak xchikaujtos totlaneltok noso ijkuak melak titajmantoskej, noneki tiktlajtlaniliskej Jehová, akin toTepetlauj, matechkojtili (Sal. 73:26; 94:18). Maski tla yotitopopolojkej, uelis titokuepaskej itech Jehová pampa yejua kinektok techtlapojpoluis (Sal. 86:5). Ijkuak sajnoye titoyolajmanaskej, ijkuakon más noneki matitonisiuikan itech toTajtsin (Sal. 103:​13, 14).

NOCHIPA MATIKNISIUIJTOKAN TOTAJTSIN

18. ¿Tleka uelis nochipa tiknisiuijtoskej Jehová?

¹⁸ Uelis nochipa tiknisiuijtoskej Jehová pampa xkeman uelis tlamis ika tikixmatij. Biblia kijtoua ika itlamachilis Jehová, ikajsikamatilis niman nochi tlen kichiua “xakaj uelis kasikamatis” (Rom. 11:33).

19. ¿Tlenon kuajli techijlia yejuin Salmos?

¹⁹ Salmo 79:13 kijtoua: “Tejuamej yejuan timotlapejpeniluan, yejuan ken timoborregos yejuan tinemij ipan mosakayoj, nochipa timitsmakaskej tlaxtlauijli, niman timitskuikatlaliskej ikan yekteneualistli para nochipa”. Kuajli xmatsto ika tla más tiknisiuiya Jehová, nochipa tikinselis tlateochiualistin, niman uelis ijkin tikijtos: “Dios yejua noherencia para nochipa niman yejua kipaleuiya noyojlo” (Sal. 73:26).