TLAMACHTIJLI 26
TLAKUIKAJLI 123 Matokauilikan matechyekana Jehová
Matikajsikamatikan ika xnochi uelis tikmatiskej
“Tejuamej xueli [tikajsikamatij] on Dios yejuan ueli nochi kichiua” (JOB 37:23).
TLEN TIKITASKEJ
Maski tejuamej xnochi tikmatij, kuajli tonkisaskej tla tikajsikamatij ika xnochi ueli tikchiuaj, tla san titlanemiliaj itech tlen kema tiuelij niman tla titlaneltokaj itech Jehová.
1. ¿Kenijki otechchijchiuj Jehová niman tleka?
JEHOVÁ melak kualtsin ken otechchijchiuj pampa ueli titlanemiliaj niman ueli tikchiuaj tlen tomachtiaj. Yejua ijkon otechchijchiuj pampa kineki matikmatikan kenijki tlanemilia, niman kineki kuajli matiktekitiltikan totlamachilis para tiktlapejpeniskej tlen kuajli ijkuak tiktekichiuiliskej (Prov. 2:1-5; Rom. 12:1).
2. a) ¿Tlenon noneki tikajsikamatiskej? (Job 37:23, 24; noijki xkita tlaixkopinajli). b) ¿Kenijki techpaleuiya tla tiyolyemankej niman tikajsikamatij ika xnochi tikmatij?
2 Maski Jehová okichiuj matiuelikan miyek tlemach, tejuamej xnochi tikmatij (xpoua Job 37:23, 24). Matontlanemilikan itech Job, Jehová miyek okitlatlajtolti niman ijkon kasikamachiltis ika xnochi kimatiya. Yejon okipaleui Job makajsikamati ika nonekiya yolyemanki yes niman ika nonekiya kipatlas ken tlanemiliaya (Job 42:3-6). Tejuamej noijki melak techpaleuis tla tiyolyemankej niman tikasikamatij ika xnochi tikmatij. Ijkuak tikasikamatij ika xnochi tikmatij, techpaleuiya matiyolyemankej niman matikneltokakan ika Jehová nochipa techijlis tlen noneki tikmatiskej niman ijkon tiktlapejpeniskej tlen kuajli (Prov. 2:6).
Ijkon ken Job, techpaleuis tla tikajsikamatij ika xnochi tikmatij. (Xkita párrafo 2)
3. ¿Tlenon tikitaskej ipan yejuin tlamachtijli?
3 Ipan yejuin tlamachtijli tikitaskej seki tlen xtikmatij niman tleka yejon kemantika uelis techyolkokos. Noijki tikitaskej tleka kemantika kuajli ika xnochi tikmatij. Tlen tiueliskej techpaleuis más matikneltokakan ika Jehová, akin “kipiya nochi tlamatkilistli”, techijlis tlen yemelak noneki tikmatiskej (Job 37:16).
XTIKMATI KEMANON TLAPOPOLIUIS
4. Ijkon ken kijtoua Mateo 24:36, ¿tlenon xtikmatij?
4 (Xpoua Mateo 24:36). Xtikmatij kemanon kipopoloskej nochi tlen Satanás kiyekana. Ijkuak Jesús nemiya ipan tlaltikpaktli, xkimatiya tlen tonajli niman tlen hora tlapopoliuis.a Sakin, okimijli inomachtijkauan ika san Jehová uelis kijtos kemanon nochiuas itlaj (Hech. 1:6, 7). Jehová yokitlali kemanon tlapopolos, san ika, tejuamej xuelis tikmatiskej kemanon nochiuas.
5. ¿Tlenon uelis topan panos pampa xtikmatij kemanon tlapopoliuis?
5 Ipampa tlen okijto Jesús, xtikmatij kech tiempo poliui para tlapopoliuis. Yejon uelis kichiuas matosiaujkauakan noso maka sa matiknekikan tiktekichiuiliskej Jehová. Niman más ijkon tomachiliskej tla yotiuejkaujkej ika tiktekichiuiliaj. Noso kanaj xueli titlaxikouaj pampa tochanejkauan niman oksekimej techpijpinaujtiaj pampa xetlapopoliui (2 Ped. 3:3, 4). Niman hasta uelis ijkin tiknemiliskej: “Tla nikmatiskia kemanon tlapopoliuis xouijtika yeskia nitlamachias niman nitlaxikos ijkuak nechpijpinaujtiskej”.
6. ¿Tleka kuajli ika xtikmati kemanon tlapopoliuis?
6 Jehová xtechijlia kemanon tlapopoliuis, yejon techpaleuiya matikititikan ika tiktekichiuiliaj pampa tiktlasojtlaj niman itech titlaneltokaj. Tejuamej tiknekij nochipa tiktekichiuiliskej Jehová niman xsan hasta ijkuak yetlapopoliuis. Kuakon, ijkuak titlanemiliskej ipan itonal Jehová maka san matiknemilijtokan kemanon yejkos, yej matitlanemilikan itech nochi tlen kualtsin kichiuas. Tla titlanemiliaj itech nochi tlen toTajtsin kichiuas, techpaleuis más iuan matouikakan niman matokojtilikan tikyolpaktiskej (2 Ped. 3:11, 12).
7. ¿Tlenon tikmatij?
7 Melak kuajli tla san titlanemiliaj itech tlen kema tikmatij. Tikmatij ika ipan 1914 opeuj itlamiyan tonaltin. Ipan Biblia, Jehová okimijto teotlajtoltin tlen techititiaj yejon. Noijki techititia kenijki tinemiskiaj ipan itlamiyan tonaltin, ika yejon, kuajli tikmatstokej ika “iueyi tonal Jehová iyejkotika” (Sof. 1:14, TNM). Noijki tikmatstokej ika Jehová kineki matokojtilikan nochimej matikimijlikan on “kuajli tlajtoltin itech iGobierno” (Mat. 24:14). Aman, yejuin tlajtoltin yetikteijlijtokej kanaj ipan 240 países niman ika ipantsin 1,000 tlajtoltin. Kuajli nesi ika xnoneki tikmatiskej kemanon tlapopoliuis para ika nochi toyojlo titenojnotsaskej.
XTIKMATIJ KENIJKI JEHOVÁ TECHPALEUIS
8. ¿Tlenon kijtosneki “tlen Dios kichiua”? (Eclesiastés 11:5).
8 Xnochipa tikmati “tlen Dios kichiua” (xpoua Eclesiastés 11:5). Yejuin kijtosneki tlen Jehová kichiua noso kitekauilia para manochiua tlen yejua kineki. Tejuamej xkuajli tikmatij tleka Jehová kitekauilia mapano seki tlemach nion tlen kichiuas ijkuak techpaleuis (Sal. 37:5). Yejuin xueli tikasikamatij, ijkon ken xtikasikamatij kenijki noskaltia se konetsintli ijtik inan, itlaj tlen nion ixtlamatkej xekimatij.
9. ¿Tlenon uelis panos pampa xtikmatij tlenon kichiuas Jehová para techpaleuis?
9 Tejuamej kemantika uelis tiometlamatiskej pampa xtikmatij kenijki Jehová techpaleuis. Kanaj kemantika xtikmatij tla tikpatlaskej seki tlemach niman ijkon más tiktekichiuiliskej Jehová, ken sa achijtsin tomintsin ika topanoltiskej noso tonchantiskej kampa nonekij más tenojnotskej. Kanaj tiknemiliaj ika xtikyolpaktijtokej Jehová pampa xueli tikchiuaj tlen yotikijtojkaj. Noso melak chikauak titenojnotsaj, san ika, xtiknextiaj akin tikmachtiskej. Noso titlapaleuijtokej kampa nochijchiua noso noyektlalia se kajli kampa tikueyichiuaj Jehová niman tikixnamiki itlaj tlen ouijtika.
10. ¿Kenijki techpaleuiya pampa xtikmati tlen kichiuas Jehová?
10 Pampa xtikmatij tlen kichiuas Jehová, techpaleuiya matiyolyemankej niman san matikchiuakan tlen tiuelij. Noijki techpaleuiya matikitakan ika tejuamej xsan noijki titlanemiliaj ken Jehová (Is. 55:8, 9). Noijki techpaleuiya kuajli matikmatstokan ika tla itech topaleuiyaj, kuajli onkisas tlen tikchiuaskej. Tla kuajli techkakij ijkuak titenojnotsaj noso kuajli tikchiuaj se tekitl ipan ikalpan Jehová, yejua matiktlasojkamachilikan (Sal. 127:1; 1 Cor. 3:7). San ika, tla xnochiua ken tejuamej tikuelitaskiaj, matikmatstokan ika Jehová nochi kita niman techpaleuis kuajli matomachilikan (Is. 26:12). San tikchiuaj tlen tiuelij, niman tikneltokaj ika Jehová techpaleuis. Niman kuajli tikmatstokej ika yejua techyekanas maski xkichiuas se milagro ken yeuejkaui okichiuj (Hech. 16:6-10).
11. ¿Tlenon tikmatstokej?
11 Matikilnamikikan ika Jehová melak tetlasojtla, yolmelajki, tlamachilise niman ika melak techtlasojtla pampa tiktekichiuiliaj niman pampa tikinpaleuiyaj tokniuan. Niman yejua nochipa kinteochiua akin itech melajkanemij (Heb. 11:6).
XTIKMATIJ TLEN MOSTLA PANOS
12. ¿Tlenon techilnamiktia Santiago 4:13, 14?
12 (Xpoua Santiago 4:13, 14). Tejuamej xtikmati tlen topan panos mostla “pampa san kemanon niman ijkuak xtlaj nochia nochimej itlaj inpan panoua” (Ecl. 9:11, TNM). Ika yejon, ijkuak itlaj tikijtoua tikchiuaskej xtikmatij tla uelis tikchiuaskej pampa xtikmatij tla tiyoltoskej.
13. ¿Kenijki tomachiliaj pampa xtikmati tlen panos?
13 Kemantika toyolkokouaj pampa xtikmatij tlen uelis panos mostla. Tla san titlanemilijtokej itech tlen uelis panos, kichiuas maka sa matiyolpakikan. Kemantika melak toyolkokouaj noso tajmanaj ijkuak panoua itlaj tlen xtikchiayaj noso xnochiua tlen tiknekiskiaj (Prov. 13:12).
14. ¿Tlenon noneki tikchiuaskej para tiyolpakiskej? (Noijki xkimita tlaixkopinaltin).
14 Tla titlaxikouaj ijkuak itlaj tikixnamikij, tikititiskej Jehová ika tiktekichiuiliaj pampa tiktlasojtlaj niman xsan ipampa tlen techmaka. Ipan Biblia techititia ika xnoneki tikchiaskej ika Jehová matechkixtili tlen tikixnamikij noso makijkuilo tlen topan nochiuas. Yejua kimatstika ika xnoneki nochi tikmatiskej para tiyolpakiskej. Tejuamej san uelis tiyolpakiskej tla tiktlakamatij niman tla tokauiliaj matechyekana (Jer. 10:23). Ijkuak tiknotsaj Jehová achto itlaj tiktlapejpeniskej kentla tikijtoskiaj: “Tla [Jehová] kineki, tinemiskej niman tikchiuaskej yejua in” (Sant. 4:15).
Techpaleuis tla tokauiliaj matechyekana Jehová niman tiktlakamatij. (Xkimita párrafos 14 niman 15).b
15. ¿Tlenon tikmatij panos ika tlayekapan?
15 Maski xtikmatij tlen uelis panos mostla, kema tikmatij ika Jehová techmakas tlen yotechijli: se nemilistli tlen xkeman tlamis nikan ipan tlaltikpaktli noso iluikak. Tikmatstokej ika yejua xtechkajkayaua niman ika xtlaj ueli kiteltia makichiua tlen kijtoua (Tito 1:2). San Jehová uelis ijkin kijtos: “Nochi tlinon yonikijtoj nikchiuas, nicumpliros. Nejua nikchiuas nochi tlinon yonikijtoj”. Tlen yeuejkaui okijtokaj onochiuj, kuakon, kuajli matikmatstokan ika nochi tlen yokijto noijki nochiuas (Is. 46:10). Noijki tikmatstokej ika xitlaj uelis techxelos itech itlasojtlalis Jehová (Rom. 8:35-39). Kuakon, uelis tikmatstokej ika Jehová techpaleuis niman techteochiuas pampa yejua techmakas tlamachilistli, yolseuilistli niman kojtilistli para tikxikoskej tlen tikixnamikiskej (Jer. 17:7, 8).
XUELIS TIKAJSIKAMATISKEJ KENIJKI JEHOVÁ KUAJLI TECHIXMATI
16. ¿Tlenon kimati Jehová totech? (Salmo 139:1-6).
16 (Xpoua Salmo 139:1-6). Jehová kuajli kimatstika kenijki titlachijchiujtin, kenijki tomachiliaj, kenijki titlanemiliaj niman nochipa kinektika techpaleuis. Jehová nochipa kitstika tlen tikchiuaj, tleka ijkon tikchiuaj, tleka itlaj tikijtouaj niman tlenon yemelak tikijtosnekij. Tekiuaj David okijto ika Jehová nochipa kinektok techtlajpiyas. Kuakon, melak kualtsin ika toueyiTajtsin, akin nochi okichijchiuj, kinektika techpaleuis. David okijto: “Sanoyej tetlatlachaltij. Para nejua, on sanoyej ueyi kijtosneki hasta xniueli nikajsijkamati” (Sal. 139:6).
17. ¿Tleka techtekiyomaka tikneltokaskej ika Jehová kuajli techixmati?
17 Kanaj ipampa ken otoskaltijkej noso ipampa tlen tikneltokayaj xuelij tikneltokaj ika Jehová techtlasojtla. Noso kanaj ipampa tlen yeuejkaui xkuajli otikchiujkej tiknemiliaj ika Jehová xkineki techpaleuis. Hasta David kemantika ijkon onomachili (Sal. 38:18, 21). Noso kanaj yakaj nokojtilijtika kikajkauas tlen xkuajli para kitlakamatis Jehová, san ika, ijkin kinemilia: “Tla Jehová yemelak nechasikamatiskia xnechtlajtlaniliskia manijkaua tlen nikuelita”.
18. ¿Tleka tikmatstokej ika Jehová más kuajli techixmati? (Noijki xkita tlaixkopinajli).
18 Kuajli matikmatstokan ika Jehová más kuajli techixmati xijkon ken tejuamej titoixmatij. Yejua kita tlen kuajli tikchiuaj maski tejuamej xtikitaj, kita ken topopolouaj niman kasikamati tleka ijkon tikchiuaj. Jehová kimatstika ika uelis topatlaskej niman techpaleuiya ijkon matikchiuakan (Rom. 7:15). Tla tikajsikamatij ika Jehová kimatsitika tlenon uelis tikchiuaskej, techpaleuis nochipa matiktekichiuilikan ika pakilistli.
Maski onka miyek tlen xtikmatij, kema tikmatij ika Jehová yotechijli ika tlayekapan techmakas itlaj tlen melak kualtsin niman yejon techpaleuiya matitlaxikokan. (Xkimita párrafos 18 niman 19).c
19. ¿Tlenon tikmatij itech Jehová?
19 Kuajli tikmatij ika Jehová melak tetlasojtlani (1 Juan 4:8). Yejua techtlasojtla niman kineki kuajli matinemikan, ika yejon, techinmaka itlanauatiluan. Noijki tikmatij ika Jehová kineki nochipa matinemikan, ika yejon, hasta okitemakak ikonetsin para mamiki topampa. Kuajli matikmatstokan ika maski topopolouaj uelis tiktekichiuiliskej Jehová ijkon ken yejua kuelita (Rom. 7:24, 25). Niman tikmatij ika “Dios más nochi kimati xken toyojlo, niman yejua nochi kimati” (1 Juan 3:19, 20). Jehová kuajli techixmati niman kuajli kimatstika ika uelis tikchiuaskej tlen kineki.
20. ¿Tlenon techpaleuis maka melak matajmanakan?
20 Ijkon ken yotikitakej, Jehová san techijlia tlen noneki tikmatiskej. Kuakon, xnoneki melak tajmanaskej ipampa tlen xtikmatij, yej san matitlanemilikan itech tlen yetikmatij. Tla ijkon tikchiuaj, tikteititiskej ika tiyolyemankej niman titlaneltokaj itech Jehová (Job 36:4). Maski aman onka miyek tlen xtikasikamatij, techyolpaktia tikmatiskej ika ipan xochitlalpan más tikixmatiskej Jehová (Ecl. 3:11).
TLAKUIKAJLI 104 ToTajtsin techtlayokolia espíritu santo
a Jesús yejua akin kinyekanas iluikaktekitkej akin tlauijsokiskej ijkuak kipopoloskej yejuin tlaltikpaktli tlen kiyekantika Satanás. Ika yejon, uelis tikijtoskej ika yejua aman yekimatstika kemanon panos Armagedón niman kemanon tetlanis (Apoc. 6:2; 19:11-16).
b TLEN NESI IPAN TLAIXKOPINAJLI: Se tajtli iuan ikoneuj kiyektlalijtokej imimochila de emergencia.
c TLEN NESI IPAN TLAIXKOPINAJLI: Se tokniuj akin itlaj itech panotok tlanemilia itech tlenon kichiuas ipan xochitlalpan.