ToTajtsin kintlakaita niman kintlasojkaita siuamej

IJKUAK Jesús nemiya ipan tlaltikpaktli, nochipa kichiuaya ken iTaj iluikak chanej. Yejua okijto: “Xitlaj nikchiua yejuan san nejua nikneki, yej san nikijtoua on tlen noTajtsin yonechmachtij”, niman noijki okijto: “Nejua nochipa nikchiua tlen yejua kuelita” (Juan 8:28, 29; Colosenses 1:15). Kuakon, tla tiknekij tikmatiskej kenon toTajtsin kimita siuamej, noneki tikitaskej kenon kimitaya Jesús.

Sekimej akin yonomachtijkej Evangelios yokijtokej ika Jesús xkimitaya siuamej ken oksekimej kimitayaj. ¿Kenon? Niman tlen más ueyi kijtosneki, ¿tlen Jesús otemachti uelis kinpaleuis siuamej ipan yejuin tonaltin?

¿Kenon kimitaya Jesús siuamej?

Jesús xkimitaya siuamej ken yakaj akin san uelis iuan timotekas. Miyekej teopixkej judíos, kinemiliayaj ika siuamej san kichiuayaj makimileuikan. Ika yejon, siuamej xkinkauiliayaj matlajtokan imiuan tlakamej kampa tojlan noso kimijliayaj ika nonekiya nokuatlapachoskej ijkuak kisaskej. Maski ijkon, Jesús xkeman okijto tla siuamej xnonekiya nonojnotsaskej imiuan oksekimej. Yejua okijto ika tlakamej nonekiya nokojtiliskej para ijkon maka kimileuiskej siuamej niman ika nonekiya kintlakaitaskej (Mateo 5:28).

Sejpatipan Jesús okijto: “San akinon yejuan noxotonis iuan isiuau niman nonamiktis iuan okse siuatl, yejua siuapapatla” (Marcos 10:11, 12). Kuajli nesi ika xkuelitaya ika se tlakatl makikaua isiuauj san pampa ijkon kinekiya (Mateo 19:3, 9). Miyekej judíos xkasikamatiyaj tlenon kijtosnekiya tiauilnemis. Yejuamej kinemiliayaj ika tla se tlakatl notekaya iuan se siuatl akin xisiuauj xkijtosnekiya tla auilnentoya. Akin temachtiayaj kijtouayaj ika san siuamej auilnemiyaj tlakamej xkeman auilnemiyaj. Ika yejon, ijkuak Jesús otemachti ika tlakamej niman siuamej sano ijkomej, okiteititi ika noneki tikintlakaitaskej siuamej.

Ken kinpaleuiya siuamej ipan yejuin tonaltin: Ipan tlanechikoltin tlen kinpiyaj iteixpantijkauan Jehová, siuamej kuajli nouikaj imiuan tlakamej pampa kimatstokej ika yejuamej kintlakaitaskej. Tlakamej akin kichiuaj ken Jesús kiyejyekouaj kimitaskej siuamej akin más uejueyimej ken innanuan, niman akin xmás uejueyimej kentla imikniuan, “ikan nochi chipaualistli” (1 Timoteo 5:2).

Jesús okixelo tiempo niman ijkon kinmachtis siuamej. Yeuejkaui xmás kinekiyaj kinmachtiskej siuamej. San ika, Jesús kixelouaya tiempo niman ijkon kimachtis, niman hasta kinyolchikauaya para makijtokan tlen kinemiliayaj. Jesús xkinemiliaya ika san siuamej nonekiya tekichiuaskej. Niman ijkon okiteititi ijkuak okikauili María matlakaki ijkuak yejua temachtijtoya (Lucas 10:38-42). Niman pampa Marta, ikniuj María, melak kuajli ken okinankili Jesús ijkuak Lázaro yomijka, okiteititi ika yejua noijki okipaleui tlen Jesús otemachti (Juan 11:21-27).

Jesús kuelitaya kuajli kinmachtis siuamej. Miyekej siuamej judías kinekiyaj kipiyaskej se telpokatsin akin ueliskia kipiyas se ueyi tekitl noso nochiuaskia se profeta. Ika yejon, ijkuak se siuatl okijli “sanoyej tlatiochijtli on siuatl yejuan omitstlakatilij”, Jesús okasikamachilti ika más kuajli tla tiktlakamatij toTajtsin (Lucas 11:27, 28). Ika tlen okijto, okiteititi ika siuamej yejuamej ueliskiaj kichiuaskej tlen más ueyi kijtosneki niman ika xsan nonekiya kichiuaskej tlen oksekimej kinekiyaj (Juan 8:32).

Ken kinpaleuiya siuamej ipan yejuin tonaltin: Nochimej melak kuelitaj ijkuak tokniuan siuamej tlanankiliaj ipan tlanechikoltin. Ompa tlakamej noijki kintlakaitaj siuamej pampa melak kuajli temachtiaj (Tito 2:3). Noijki yejuamej tenojnotsaj itech tlen kualtsin kichiuas iTekiuajyo toTajtsin (Salmo 68:11; xkita recuadro: “¿Xokinkauili apóstol Pablo matlajtokan siuamej?”, ipan página 9).

Jesús kintlakaitaya siuamej. Yeuejkaui tajtin más kintlasojtlayaj inkoneuan tlakamej. Se libro tlen itoka Talmud kijtouaya ika akin kinpiyas ikoneuan tlakamej melak yolpakis niman akin kinpiyaj inkoneuan siuamej melak najmanas. Miyekej tajtin melak kintekiyomakaya kiskaltiskej se ichpokakonetl pampa nonekiya kitejtemouiliskej akinon iuan nonamiktis niman kitlaxtlauaskej. Noijki kimatstoyaj ika xueliskia kintlajpiyas ijkuak iueuentsitsintin.

San ika, Jesús melak kipatiojkaitaya inemilis se ichpokatsin niman noijki inemilis se telpokatsin. Jesús kuajli okiteititi yejuin pampa ijkon ken okiyoliti itelpoch se siuakaualtsintli akin chantiya Naín, noijki okiyoliti ichpokatsin Jairo (Marcos 5:35, 41, 42; Lucas 7:11-15). Niman sejpatipan okipajti se siuatl akin kipiaya dieciocho xiuitl ika kualouaya “pampa on xkuajli espíritu ijki okichiuilij”. Hasta okijli ika yejua katka “teuejkakoneu itech Abraham”, maski yejuin tlajtoltin xmás nokuiyaj ipan tlajkuiloltin judíos (Lucas 13:10-16). Ijkuak ijkon okijto okiteititi ika yejua xsan melak kinpatiojkaitaya siuamej noijki kimatstoya ika siuamej chikauak kipiyaj intlaneltokil (Lucas 19:9; Gálatas 3:7).

Ken kinpaleuiya siuamej ipan yejuin tonaltin: Ne Asia, kijtouaj ika tikiskaltis se ichpokakonetl yeskia kentla tikatekis ixochiuan movecino. San ika, tajtin akin kichiuaj ken Jesús niman kintlasojtlaj inkoneuan xijkon tlanemiliaj. Yejuamej, yej kintlasojtlaj intelpokakoneuan niman inmichpokakoneuan, kinmachtiaj niman kinpajtiaj ijkuak kualoj.

Jesús tlaneltokaya itech siuamej. Yeuejkaui ipan tribunales judíos, tlen kijtouaya se siuatl xueyi kijtosnekiya ijkon ken tlen kijtouaya se tlakeuajli. Ipan siglo primero ixtlamatki Josefo okijto ika se siuatl xtlaj uelis kijtos ipan se tribunal pampa xakaj kineltokas.

¡Jesús xijkon katka! Yejua okintlapejpeni siuamej para makiteijlikan ika yejua yoyoliujka (Mateo 28:1, 8-10). Niman maski yejuin siuamej okitakej kenon okimiktijkej niman okitokakej Jesús, hasta apóstoles xueliyaj kineltokayaj tlen yejuamej kimijliayaj (Mateo 27:55, 56, 61; Lucas 24:10, 11). San ika, ijkuak Jesús okintlapejpeni siuamej para makiteijlikan ika yoyoliujka, okiteititi ika siuamej noijki ueliskiaj tenojnotsaskej ijkon ken sekimej idicípulos (Hechos 1:8, 14).

Ken kinpaleuiya siuamej ipan yejuin tonaltin: Tokniuan tlakamej akin tlapaleuiyaj ipan tlanechikojli kiteititiaj ika kintlakaitaj tokniuan siuamej ijkuak kinkakij. Noijki teueuentsitsinuan kiteititiaj ika kintlakaitaj insiuatsitsinuan ijkuak kuajli kinkakij (1 Pedro 3:7; Génesis 21:12).

Tlen Biblia kijtoua melak kinyolpaktia siuamej

Akin kichiuaj ken Jesús kintlakaitaj siuamej niman kimitaj ijkon ken toTajtsin kinekiya makimitakan ijkuak okinchijchiuj (Génesis 1:27, 28). Teueuentsitsinuan akin kichiuaj ken Cristo xkimita siuamej ijkon ken oksekimej. Yejuamej kichiuaj tlen Biblia kijtoua niman ijkon isiuauan más yolpakij (Efesios 5:28, 29).

Ijkuak Yelena opeuj nomachtia Biblia, yejua melak najmanaya pampa iueuentsin kitlajyouiltiaya. Yejua onoskalti kampa melak nochiuaya tlen xkuajli, kampa telpokamej kimixtekiyaj iminovias niman kampa melak kintlajyouiltiayaj siuamej. Yejua kijtoua: “Biblia melak yonechpaleui, oniuel ika toTajtsin melak nechtlasojtla, nechpatiojkaita niman kineki nechpaleuis. Onikitak ika noueuentsin noijki ueliskia nopatlaskia tla nomachtiskia Biblia”. Niman ijkon onochiuj ijkuak iueuentsin onoapolakti niman onochiuj iteixpantijkauj Jehová. Yejua noijki kijtoua: “Aman yejua xnimantsin kualani niman tiomemej más totlapopoluiyaj”. Niman noijki okijto: “Tlen Biblia kijtoua yonechpaleui manikmachili ika noueuentsin más nechtlasojtla niman nechtlajpiya” (Colosenses 3:13, 18, 19).

Ijkon ken Yelena, miyekej siuamej akin kichiuaj ken Cristo melak yolpakij imiuan inueuentsitsinuan pampa kichiuaj ijkon ken Biblia kijtoua. Noijki okseki tokniuan kichiuaj kuajli manomachilikan pampa kintlakaitaj niman kinyolseuiyaj (Juan 13:34, 35).

Nochimej akin kichiuaj ken Jesús maski tla siuamej noso tlakamej kimatstokej ika yejuamej tlajtlakolejkej niman ika nochi tlen toTajtsin “yokichichiuj oijtlakau”. San ika, noijki kimatstokej ika tla kinisiuiyaj Jehová, yejua kinmakixtis itech yejuin tlaltikpaktli kampa nochiua tlen melak xkuajli. ¡Melak kualtsin tlen kiseliskej tlakamej niman siuamej akin toTajtsin kintlajpiya! (Romanos 8:20, 21).