Tlayekankej techpaleuiayaj matipakikan

1. ¿Tlenon okichiujkej tokniuan akin chantiyaj Corinto tlen okichiuj mayolpaki Pablo?

KATKA xiuitl 55, niman apóstol Pablo nemiya Troas kampa kisaj barcos, yejua san tlanemilijtoya intech tokniuan akin chantiyaj Corinto. ¿Tleka? Pampa okitekakilijka ika xnotlajtolnamikiyaj. Kuakon, pampa melak kintlasojtlaya okimijkuilouili se carta para kimijlis itlaj tlen ueliskia kinpaleuis (1 Cor. 1:11; 4:15). Noijki, okitlajtlanili itlasojkaikniuj Tito makimitati, sakin nonamikiskiaj Troas niman ompa kijliskia kenon nemiyaj tokniuan. San ika, Tito xkeman oajsik kampa nemiya Pablo. ¿Tlenon kichiuaskia Pablo? Okajsik se barco tlen kuikaskia Macedonia. Ompa ononexti iuan Tito niman yejua okijli ika tokniuan akin chantiyaj Corinto kuajli okiselijkej tlen yejua okimijkuilouili niman ika oksejpa kinekiyaj kitaskej. Ijkuak Pablo okikak yejuin, melak oyolpak (2 Cor. 2:12, 13; 7:5-9).

2. a) ¿Tlenon okijkuilo Pablo itech tlaneltokijli niman pakilistli? b) ¿Tlenon tiknankiliskej?

² Sakin, Pablo oksejpa okintlajkuilouili tokniuan akin chantiyaj Corinto niman okimijli yejuin: “Tejuamej xtiknekij temechnauatiskej ken nentlaneltokaskej, pampa nemotlaneltok ye melajki onkaj itech Cristo. Yej titekitij para xpiyakan pakilistli” (2 Cor. 1:24). ¿Tlenon kijtosneki yejuin? ¿Niman tlenon kinmachtia tokniuan tlayekankej ipan yejuin tonaltin?

TOTLANELTOK NIMAN TOPAKILIS

3. a) ¿Tlenon okijtosnek Pablo ijkuak okijkuilo: “Nemotlaneltok ye melajki onkaj itech Cristo”? b) Ipan yejuin tonaltin, ¿kenon uelis kichiuaskej ijkon ken Pablo akin tlayekanaj ipan tlanechikoltin?

³ Pablo otlajto itech ome tlen noneki tikpiyaskej para tikueyichiuaskej Jehová: tlaneltokijli niman pakilistli. Itech tlaneltokijli yejua okijkuilo: “Tejuamej xtiknekij temechnauatiskej ken nentlaneltokaskej, pampa nemotlaneltok ye melajki onkaj itech Cristo”. Pablo kuajli kimatstoya ika tokniuan akin chantiyaj Corinto, melajkanemiyaj ipampa intlaneltok niman xsan pampa tlen yejua noso oksekimej kimijliayaj. Pablo xkinekiya kinchiualtis itlaj makichiuakan pampa kineltokaya ika yejuamej kichiuaskiaj tlen kuajli (2 Cor. 2:3). Ipan yejuin tonaltin, tlayekankej ipan tlanechikoltin noijki kineltokaj ika tokniuan kitekichiuiliaj toTajtsin ipampa intlaneltokil (2 Tes. 3:4). Yejuamej xkintlaliaj tlanauatiltin ipan tlanechikojli, yejuamej san noyekanaj ika tlen Biblia kijtoua niman tlen ikalpan Jehová kimijlia. Kema, yejuamej xinyaxka intlaneltok oksekimej (1 Ped. 5:2, 3).

4. a) ¿Tlenon okijtosnek Pablo ijkuak okijkuilo: “Yej titekitij para xpiyakan pakilistli”? b) Ijkon ken Pablo, ¿tlenon kinekij kichiuaskej tlayekankej ipan yejuin tonaltin?

⁴ Pablo noijki okijto: “Yej titekitij para xpiyakan pakilistli”. Nikan kinteneujtoya tokniuan akin kipaleuiayaj. ¿Kenon tikmatij? Pampa ipan yejon carta noijki okinteneuj omemej tokniuan. Yejua okijkuilo: “JesuCristo iKonetsin Dios, yejuan Silvano, Timoteo niman nejua ika titemachtiaj” (2 Cor. 1:19). Noijki, ijkuak Pablo kijtouaya titekitij kinteneuaya akin más imiuan nouikaya, ken Apolos, Áquila, Prisca, Timoteo noso Tito (Rom. 16:3, 21; 1 Cor. 3:6-9; 2 Cor. 8:23). Ijkuak okijto “titekitij para xpiyakan pakilistli”, okijtosnek ika yejua niman tokniuan akin kipaleuiayaj nokojtiliskiaj para nochimej mapakikan ipan tlanechikojli. Niman ipan yejuin tonaltin, tokniuan akin tlayekanaj noijki ijkon kichiuaj: kinpaleuiyaj tokniuan makitekichiuilikan Jehová “ikan paktli” (Sal. 100:2; Filip. 1:25).

5. ¿Tlenon tikitaskej ipan yejuin tlamachtijli niman itech tlenon noneki titlanemiliskej?

⁵ Ipan nochi tlaltikpaktli, sekimej tokniuan akin melak pakiyaj ijkuak tenojnotsayaj, okintlajtoltijkej yejuin: “¿Tlenon okijto noso tlenon okichiuj se tlayekanketl niman ijkon más xyolpaki?”. Matikitakan tlenon okijtojkej niman matiknemilikan tlenon tiknankiliskiaj tejuamej. Noijki matiknemilikan tlenon uelis tikchiuaskej tinochimej para más tipakiskej ipan totlanechikol.a

“XTLAJPALOKAN [...] TOTLAJSOJKAIKNIU PÉRSIDA”

6, 7. a) ¿Kenon tlayekankej ipan tlanechikoltin uelis kichiuaskej ijkon ken Jesús, Pablo niman oksekimej itekipanojkauan toTajtsin? b) ¿Tleka yolpakij tokniuan ijkuak oksekimej kinnotsaj ika intoka?

⁶ Miyekej tokniuan okijtokej ika melak yolpakij ijkuak kitaj ika tlayekankej najmanaj inpampa. Se kenon uelis kiteititiskej tlayekankej ika najmana inpampa oksekimej, tla kichiuaj ijkon ken David, Elihú niman Jesús (xpoua 2 Samuel 9:6; Job 33:1 niman Lucas 19:5). Yejuamej okinnotskej oksekimej ika intokayo. Pablo kimatstoya ika yejuin melak ueyi kijtosnekiya. Ijkon tikijtouaj pampa ijkuak okintlajkuilouili Romanos, okintlajpalo 25 tokniuan niman nochimej okintokayoti. Sekan okijkuilo: “Xtlajpalokan [...] totlajsojkaikniu Pérsida” (Rom. 16:3-15).

⁷ Sekimej tlayekankej melak ouijtika kitaj kilnamikiskej intoka tokniuan. San ika, ijkuak nokojtiliaj niman kilnamikij, kentla kijliskiaj yejon tokniuj: “Melak nimitstlasojkaita” (Éx. 33:17). Ijkuak tokniuan tlanankiliaj ipan tlanechikojli niman kitaj ika tlayekankej kinnotsaj ika intoka, yejuamej melak yolpakij (noijki xkita Juan 10:3).

“YEJUAN SANOYEJ TEKITI IPAN ITEKIU TOTEKO”

8. ¿Kenon Pablo okichiuj ijkon ken Jehová niman Jesús?

⁸ Okse tlen uelis kichiuas mayolpakikan tokniuan, ijkuak tikimijliaj tlenon kuajli kichiuaj. Ijkon okichiuj Pablo ijkuak ika okpa okintlajkuilouili Corintios, yejua okijto: “Nemotechkopa nikpiya miyek ueyimatilistli niman nemechtlakaita” (2 Cor. 7:4). Yejuin tlajtoltin melak okinyolpakti niman okinyolchikauj tokniuan corintios. Pablo miyekpa noijki ijkon okimijli okseki tlanechikoltin (Rom. 1:8; Filip. 1:3-5; 1 Tes. 1:8). Tikmatstokej yejuin pampa ijkuak okintlajkuilouili Romanos niman okitokayoti Pérsida, yejua okijto yejuin: “Yejuan sanoyej tekiti ipan itekiu toTEKO” (Rom. 16:12). ¡Kanaj ijkuak Pérsida okikak yejuin melak oyolpak! Ijkon ken Jehová niman Jesús, Pablo kimijliaya oksekimej tlen kuajli kichiuayaj (xpoua Marcos 1:9-11 niman Juan 1:47; Apoc. 2:2, 13, 19).

9. ¿Tleka onka pakilistli ipan tlanechikojli ijkuak techyolchikauaj niman ijkuak titeyolchikauaj?

⁹ Ipan yejuin tonaltin, tlayekankej ipan tlanechikoltin kuajli kimatstokej ika kimijliskej tokniuan ika kintlasojtlaj, melak ueyi kijtosneki (Prov. 3:27; 15:23). Ijkuak ijkon kichiuaj, kentla kimijliskiaj: “Onikitak tlenon otikchiuj pampa nimitstlasojtla”. Kema, tokniuan kinekij ika tlayekankej makinyolchikauakan. Miyekej tokniuan nomachiliaj ijkon ken okijto se tokniuj siuatl akin kipiya 55 xiuitl: “Kampa nitekiti xakaj mitsijlis ika kuajli tikchiujtika motekiyo, ompa nochimej san notlatlanij. Ika yejon, melak niyolpaki ijkuak ipan tlanechikojli se tlayekanketl nechijlia ika melak kipatiojkaita tlen nikchiua. ¡Yejon melak nechyolchikaua! Pampa ijkon nikita ika Jehová melak nechtlasojtla”. Xiuejkaui, se tlayekanketl okiyolchikauj se tajtli akin san yejua kimiskaltijtika ikoneuan, yejua okijto: “Tlen onechijli melak onechyolchikauj”. Kuajli tikitaj ika ijkuak tlayekankej kimijliaj tokniuan ika kuajli kichiujtokej intekiyo, yejon kinyolpaktia, kinyolchikaua niman kichiua maka manosiaujkauakan (Is. 40:31).

“XKINCUIDAROKAN ON TLANELTOKAKEJ”

10, 11. a) ¿Kenon tlayekankej uelis kichiuaskej ijkon ken Nehemías? b) ¿Tlenon kinpaleuis tlayekankej makinyolchikauakan tokniuan ijkuak komintlajpaloskej?

¹⁰ ¿Tlenon okse uelis kichiuaskej tlayekankej niman ijkon kiteititiskej ika najmanaj ipampa tokniuan niman kinpaleuiskej más mayolpakikan? Tla nochipa kinektokej kinyolchikauaskej (xpoua Hechos 20:28). Tla ijkon kichiuaj, kichiujtoskej ken yeuejkaui okichiuj Nehemías. Biblia kijtoua ika ijkuak yejua okitak ika judíos nomojtiayaj, yejua onotelkets niman okinyolchikauj (Neh. 4:14). Tlayekankej ipan yejuin tonaltin noijki ijkon kichiuaj, yejuamej akin kachtopa kitaj akinon kiyolchikauaskej. Ika yejon, kominitaj inchajchan para kinmakaskej on “tlatiochiualistli yejuan kisa itech on Espíritu Santo” (Rom. 1:11). ¿Tlenon kinpaleuis tlayekankej kuajli makinyolchikauakan tokniuan ijkuak komintlajpaloskej?

¹¹ Achto komintaskej tokniuan, tlayekankej noneki kinemiliskej itech tlenon imiuan tlajtoskej. Ueliskia notlajtoltiskej: “¿Tlenon kixnamiktok yejuin tokniuj? ¿Tlenon uelis tikijliskej para tikyolchikauaskej? ¿Tlen textos itech Biblia uelis kipaleuis? ¿Biblia yakaj kiteneua akin ipan yonochiujka ijkon ken yejua?”. Tla notlajtoltiaj yejuin, kichiuas kuajli makinpaleuikan. Ijkuak tlayekankej kominitaj tokniuan, kinkauiliaj makijtokan tlenon kinemiliaj niman noijki kuajli kinkakij (Sant. 1:19). Se tokniuj siuatl okijto: “¡Melak mitsyolchikauas ijkuak se tlayekanketl kuajli mitskakis!” (Luc. 8:18).

12. ¿Akinomej noneki kinyolchikauaskej ipan tlanechikojli, niman tleka?

¹² ¿Akinomej noneki kinyolchikauaskej? Pablo okimijli tlayekankej: “Impan xtlachiakan nochimej on tlaneltokakej”. Kema, nochimej ipan tlanechikojli noneki makinyolchikauakan, maski youejkaujkej ika tenojnotsaj noso ka niman noijki precursores. Yejuin tokniuan yolmelajkej niman yolchikaujkej, san ika, ¿tleka noneki makinpaleuikan tlayekankej? Pampa kemantika yejuamej xkuajli nomachiliaj ipampa tlen nochiujtika ipan yejuin tlaltikpaktli. Tlen ipan onochiuj tekiuaj David techmachtia ika maski yakaj melajkanemi, kemantika noneki yakaj makipaleui.

“ABISAI [...] OKIPALEUITO DAVID”

13. a) ¿Tleka Isbí-benob ouel okixnamik David? b) ¿Tleka Abisai ouel okipaleuito David ijkuak nonekiya?

¹³ Ijkuak David xitekiuaj katka itech Israel, okixnamik Goliat, se ueyi tlakatl akin ualeuaya intech refaím. David okiteititi ika yolchikauak katka niman okimikti (1 Sam. 17:4, 48-51; 1 Crón. 20:5, 8). Sakin, oksejpa okixnamik okse tlakatl akin noijki ualeuaya intech refaím, itoka katka Isbí-benob (2 Sam. 21:16). San ika, yejuin tlakatl akin melak uejkapan katka ikimiktiaya David. ¿Tleka? Xpampa David xok yolchikauak katka, yej xok más kojtik katka. Biblia kuajli kijtoua ika David yosiaujkaj, niman ijkuak Isbí-benob okitak yejuin, okixnamik. Sakin, ijkuak ikimiktiskiaj David, “Abisai, itelpoch Sarvia, okipaleuito David. Okixnamik niman okimiktij on filisteo” (2 Sam. 21:15-17). Tla Abisai xkipaleuiskia David, kanaj kimiktiskiaj. Ika yejon, melak okitlasojkamachili ika okimakixti. ¿Tlenon tiuelij itech yejuin?

14. a) ¿Tlenon uelis techpaleuis matitlaxikokan ijkuak tikixnamikiskej se tlauejli tlen melak ueyi ijkon ken Goliat? b) ¿Kenon tlayekankej uelis techpaleuiskej para oksejpa matikojtitokan niman matiyolpakikan? Xkijto se neskayotl.

¹⁴ Ipan nochi tlaltikpaktli, akin tiiteixpantijkauan Jehová melak tokojtiliaj titenojnotsaskej maski Satanás niman idemonios kichiuaj nochi tlen uelij para techteltiskej. Sekimej de tejuamej yotikixnamijkej tlaueltin tlen melak uejueyimej ijkon ken Goliat, san ika, pampa otopaleuijkej itech Jehová, ouel otikinxikojkej. Kemantika, tlauejli tlen se mojmostla tikixnamikij melak techsiauitia niman ijkuak ijkon tomachiliaj, san tlenon uelis techtlajkalis. Ijkuak ijkon topan nochiuas, se tlayekanketl uelis techpaleuis oksejpa matiyolpakikan niman matoyolchikauakan. Se tokniuj precursora akin kipiya 65 xiuitl kijtoua: “Yeuejkaui xkuajli ninomachiliaya niman ijkuak nontenojnotsaya melak nisiauiya. Se tlayekanketl okitak kenon ninomachiliaya niman onechtlajtolti tlenon nopan panotoya, kuakon melak onechyolchikauj ika Biblia. Pampa onikchiuj tlen onechijli, nochi kuajli okisato. ¡Melak niktlasojkamachilia ika onechpaleui!”. Sajnoye tiktlasojkamatij ika tikinpiyaj tlayekankej akin melak techtlasojtlaj niman ijkon ken Abisai okipaleui David, yejuamej noijki kinektokej techpaleuiskej.

“PARA XMATIKAN KEN SANOYEJ UEYI TETLAJSOJTLALISTLI NEMECHPIYALIA”

15, 16. a) ¿Tleka tokniuan melak kitlasojtlayaj Pablo? b) ¿Tleka melak tikintlasojtlaj tlayekankej?

¹⁵ Tlayekankej kichiuaj se ueyi tekitl. Yejuamej kemantika hasta xkochij pampa kinemilijtokej kenon uelis techpaleuiskej (2 Cor. 11:27, 28). Maski ijkon, yejuamej melak yolpakij kichiuaskej intekiyo, kichiuaj ijkon ken Pablo okimijkuilouili corintios: “Niman nejua ikan kuajli noyojlo [...] niktemakas nonemilis ipampa nemoalma” (2 Cor. 12:15). Yejua melak kintlasojtlaya tokniuan, ika yejon, melak onokojtili kinyolchikauas (xpoua 2 Corintios 2:4; Filip. 2:17; 1 Tes. 2:8). Ika yejon, ¡yejuamej noijki melak kitlasojtlayaj! (Hech. 20:31-38.)

¹⁶ Aman ipan yejuin tonajli, tejuamej noijki tikintlasojtlaj tlayekankej. Noijki, ijkuak tikchiuaj teoyotl, tiktlasojkamachiliaj Jehová pampa tikinpiyaj tlayekankej. Ijkuak tejuamej tikitaj ika najmanaj topampa, melak tiyolpakij, niman ijkuak techontlajpalouaj, melak techyolchikaua. Noijki melak tiktlasojkaitaj ika ijkuak yejuamej kitaj ika toyolajmanaj, kinektokej techpaleuiskej. Kuajli tikmatstokej ika tlayekankej techpaleuiyaj matiyolpakikan.