¿Tleka kitekauilia toTajtsin matitlajyouikan?

¿KENON NOMACHILIA TOTAJTSIN IJKUAK TITLAJYOUIYAJ?

Michelle: Sofía, nipaki ika nimitsnextia.

Sofía: Kema, nejua noijki nipaki nimitsitas.

Michelle: Ijkuak oniuajlaka, otitlajtokej itech kenon nomachilia toTajtsin ijkuak techita titlajyouiyaj.a Tejua otinechijli ika youejkauj ika timotlajtoltia yejuin, más ijkuak monan okipix se accidente. Yemelak, ¿kenon nemi?

Sofía: Kemantika kuajli nemi niman kemantika ka, san ika, aman kuajli nemi.

Michelle: Nipaki nikmatis yejon. Niknemilia ika kemantika ouijtika nenkitaj nemoyolchikauaskej.

Sofía: Kema. Kemantika ninotlajtoltia tla uejkauis ijkin titlajyouijtoskej.

Michelle: Nasikamati tleka ijkon tiknemilia. Kanaj tikilnamiki ika otikijtokej ika tikitaskej tleka toTajtsin kitekauilia maonia tlajyouilistli tla yejua uelis kipopolos.

Sofía: Kema nikilnamiki.

Michelle: Achto ika tikitaskej kenon Biblia technankiliaj, nikuelitaskia matikilnamikikan tlen otikitakej.

Sofía: Maski.

Michelle: Kachtopa, otikitakej ika se itekipanojkauj Jehová, okitlajtolti tleka kitekauilia maonia tlajyouilistli, niman toTajtsin xokajuak nion okijli ika xtlaneltokaya.

Sofía: Kema, yejon xnikmatiya.

Michelle: Noijki otiuelkej ika toTajtsin xkuelita kitas ika titlajyouiyaj. Biblia kijtoua ika yeuejkaui, ijkuak ikalpan otlajyoui, “yejua noijki otlajyoui”.b ¿Xtechyolchikaua tikmatiskej ika toTajtsin noyolkokoua ijkuak tejuamej toyolkokouaj?

Sofía: Kema.

Michelle: Niman sakin otikijtokej ika, pampa toTajtsin melak kojtik, yejua uelis san kemanon kipopolos yejuin tlajyouilistli.

Sofía: Yejon tlen xnikasikamati. ¿Tleka toTajtsin kitekauilia manochiua miyek tlen xkuajli, tla uelis kipopolos?

¿AKINON KIJTOTOYA TLEN MELAUAK?

Michelle: Kachtopa matikitakan tlen kijtoua Biblia ipan Génesis. ¿Yotijkajka itech Adán, Eva niman tlakilyotl tlen okikuajkej?

Sofía: Kema, onechititijkej ipan catecismo. ToTajtsin okimijli maka makikuakan yejon tlakilyotl, san ika, yejuamej xotetlakamatkej.

Michelle: Kuajli. San ika, aman matikitakan tleka yejuamej otlajtlakojkej pampa yejuin techpaleuis matikasikamatikan tleka titlajyouiyaj ¿Tikneki tikpouas Génesis capítulo 3, versículo 1 hasta 5 itech Traducción del Nuevo Mundo?

Sofía: Kema, kijtoua: “Aman tej, kouatl nesiya melak tlamachilise xijkon ken nochimej yolkamej tlen nemiyaj ipan tepetl tlen Jehová yokichijchiujka. Ika yejon, opeuj kijlia yejon siuatl: ‘¿Yemelak toTajtsin yomechijli ika xkipiya nenkikuaskej itlakilyo itech nochi kojtin tlen onka ipan xochitlalpan?’. Kuakon, siuatl okinankili kouatl: ‘Uelis tijkuaskej itlakilyo nochi kojtin tlen onka ipan xochitlalpan.San ika, itech kojtli tlen onka itlajkotian yejuin xochitlalpan, toTajtsin yokijto: “Xkipiya ika nenkikuaskej, ka, xkipiya ika nenkikitskiskej; tla nenkichiuaj, nenmikiskej”’. Kuakon, kouatl okijli siuatl: ‘Xnenmikiskej. Pampa toTajtsin kimatstika ika ijkuak nemejuamej nenkikuaskej, ipan yejon tonajli nemixtlapouiskej niman nemochiuaskej ken toTajtsin, nenkixmatiskej tlen kuajli niman tlen xkuajli’”.

Michelle: Tlaxtlaui. Aman matikasikamatikan yejuin tlaxeloltin. Kachtopa kijtoua ika se kouatl otlajto iuan Eva, san ika, ipan okseki tlaxeloltin kijtoua ika katka Diablo noso Satanás akin otlajto itechkopa yejon kouatl.c Yejua okitlajtolti Eva itech tlanauatijli tlen yokinmakaka toTajtsin itech maka makikuakan yejon kojtlakilyotl. ¿Tlenon yokimijlikaj toTajtsin inpan nochiuaskia tla kikuayaj?

Sofía: Ika mikiskiaj.

Michelle: Kema. Sakin, Diablo okijto itlaj tlen melak xkuajli itech toTajtsin. Xkita tlen okijto: “Xnenmikiskej”. ¡Kijtojtoya ika toTajtsin se tekajkayaujketl!

Sofía: Yejon xkeman nijkakiya.

Michelle: Niman ijkuak Satanás okijto ika toTajtsin se tekajkayaujketl xnimantsin ueliskia noteititiskia ika yejon xmelauak. ¿Tikmati tleka?

Sofía: Ka, xnikmati.

Michelle: Más matikasikamatikan yejuin. Matiknemilikan ika nejua se tonajli niuajlauj niman nikijtoua ika nejua más nikojtik xijkon ken tejua. ¿Kenon tikteititiskia ika tlen onikijto xmelauak?

Sofía: Tla tikchiuaj itlaj tlen makiteititi akinon más kojtik.

Michelle: Kema. Uelis tiktejtemoskej itlaj tlen melak yetik niman tikitaskiaj akinon uelis kajkokuis. Ijkon nimantsin tikitaskej akin más kojtik.

Sofía: Kema, yemelak.

Michelle: San ika, nochi nopatlaskia tla nejua nikijtoskia ika tejua xtikijtoua tlen melauak, ¿xmelak?

Sofía: Kema.

Michelle: Yejon xnimantsin uelis noteititis tla melauak noso xmelauak, xijkon ken ijkuak tikteititis akinon más kojtik.

Sofía: Kema, melauak.

Michelle: Noneki tiempo niman ijkon on oksekimej kitaskej ika tejua kema tikijtoua tlen melauak.

Sofía: Kema ijkon.

Michelle: Oksejpa matikitakan Génesis. ¿Okijto Satanás ika yejua más kojtik xijkon ken toTajtsin?

Sofía: Ka.

Michelle: ToTajtsin nimantsin ueliskia kiteititiskia ika yejon xmelauak. San ika, Satanás okijto ika toTajtsin xkijtoua tlen melauak. Kentla kijtotoskia: “ToTajtsin mitskajkayaujtika nejua nikijtoua tlen melauak”.

Sofía: Temojkatlachialti.

Michelle: Pampa toTajtsin tlamachilise okitekauili mapano tiempo niman ijkon noteititiskia ika tlen okijto Satanás xmelauak.

ITLAJ TLEN MELAK UEYI KIJTOSNEKI

Sofía: San ika, ijkuak omik Eva onoteititi ika toTajtsin okijto tlen melauak, ¿ka?

Michelle: Uelis tikijtoskej ika kema, san ika, tlen okijto Satanás xsan yejon kijtosnekiya. Oksejpa xkita tlaxelojli 5, ¿tlenon okse okijli Satanás, Eva?

Sofía: Okijli: “nemixtlapouiskej”.

Michelle: Kema, noijki okijto ika tla kikuaskiaj yeskiaj ken toTajtsin, ijkon okijto ika toTajtsin xkinekiya kinmakaskia tlen kuajli.

Sofía: ¡Ah!

Michelle: Niman ijkon noijki okixnamik.

Sofía: Xnikasikamati.

Michelle: Xkita, Diablo kinekiya kasikamachiltis Eva niman noijki tejuamej, ika más kuajli tinemiskiaj tla xtechyekana toTajtsin. Jehová kimatstoya ika nonekiya tiempo niman ijkon noteititis ika tlen okijto Diablo xmelauak katka. ToTajtsin okikauili matlayekana nikan ipan tlaltikpaktli, ika yejon onka miyek tlajyouilistli.d San ika, nikneki nimitsijlis itlaj tlen kualtsin.

Sofía: ¿Itlaj tlen kualtsin?

Michelle: Kema, Biblia techititia tlen kualtsin itech toTajtsin. Kijtoua ika Jehová nemi nisiuj ijkuak titlajyouiyaj. Matikitakan tlen okijkuilo tekiuaj David, ipan Salmo 31:7. Yejua melak otlajyoui, san ika, xkita tlen okijto. ¿Tikneki tikpouas yejuin tlaxelojli?

Sofía: Kema, kijtoua: “Motetlajsojtlalis yejuan xkaman tlamis nechmaka pakilistli. Tejua tikita ijkuak ninajmana, niman tikmati ijkuak niyolpajsoliui”.

Michelle: Kuakon, maski David melak otlajyoui, oyolseuj pampa kimatstoya ika Jehová okitak nochi tlen ipan onochiuj. Niman tejua, ¿xmitsyolseuiya tikmatis ika Jehová kita nochi, niman ika kasikamati ken timomachilia xijkon ken oksekimej?

Sofía: Kema, melak nechyolseuiya.

Michelle: Niman Biblia techititia ika toTajtsin xkitekauilis nochipa matitlajyouikan, noijki techmachtia ika sa achijtsin poliui ijkuak kipopolos itekiuajyo Satanás niman kiyektlalis nochi tlen yokijtlako, noijki tlen yomechtlajyouiltij tejua iuan monan. ¿Uelis niuajlas okse semana? Nikneki nimitsititis tleka uelis kuajli tikmatstoskej ika sa achijtsin poliui ijkuak toTajtsin kipopolos tlajyouilistli.e

Sofía: Kema, nikan nimitschia.