Tlen mitspaleuis xkasikamati Biblia

Xnemili ika tiauj ipan se país tlen xtikixmati. Tikita ika tlaltikpakchanejkej tlen kichiuaj, tlen kikuaj niman intomintsin melak sejneka noso tlamantik itech ken tejua tikixmati. Yejuin uelis kichiuas xmajmana ika xnimantsin tikasikamati.

Noijki ijkon timomachilis ijkuak kemach tikitas Biblia. Tikitas tlen yeuejkaui yopanok niman xtikixmati. Tikitas ika tlajtoua itech miyekej kalpamej, ken filisteos niman timomachtis tlen kichiuayaj, ken ijkuak kintsomoniaj intlaken. Noijki tikitas ika tlajtoua itech se tlakuajli, itoka maná niman itech okseki tlemach (Éxodo 16:31; Josué 13:2; 2 Samuel 3:31). Kanaj nochi yejuin mitspopolos. Ijkuak tinemis ipan okse país, tiktlasojkamatiskia yakaj mamitspaleui. ¿Tikuelitaskia yakaj mamitspaleui xkasikamati tlen kijtoua Biblia?

TLEN OTEPALEUI YEUEJKAUI

Ijkuak opeuj ika noijkuiloua Biblia, ipan siglo dieciséis ijkuak xpeuaya xiuitl 1, yonotemakak tlen ika tikasikamatis Biblia. Xnemili, Moisés akin kachtopa okinyekan israelitas, okitetomili tlen yokijkuilojka (Deuteronomio 1:5).

Kanaj diez siglos sakin, ok nemiyaj tlajkuilojkej. Ipan xiuitl 455 ijkuak xpeuaya xiuitl 1, nemiyaj melak miyekej judíos, niman ompa noijki nemiyaj kokonej, akin onosentlalijkej ipan Jerusalén. Tlamachtijkej itech Biblia “chikauak kipoujtoyaj yejuin amoxtli” niman “okinpaleuijkej tlaltikpakchanejkej makasikamatikan tlen kipoujtoyaj” (Nehemías 8:1-8).

Kanaj quinientos xiuitl ika tlayekapan, Jesucristo noijki okichiuj yejon tekitl. Tlaltikpakchanejkej kixmatiyaj ken se Tlamachtijketl (Juan 13:13). Kinmachtiaya insejselti noso uejueyimej grupos. Se tonajli, okiminojnots niman otemakak tlamachtijli ipan tepetl niman “tojlan sanoyej mojkatlachaya  ika on tlen yejua kimijliaya” (Mateo 5:1, 2; 7:28). Ipan xiuitl 33, Jesús otlajto iuan omemej inomachtijkauan ijkuak yayaj Jerusalén. Yejuamej okijtokej “techajpantlantilijtiaya on tlen [...] tlajkuilolnestikaj ipan on Yektlajkuilojli”, kijtosneki, ika kuajli okintomili tlen kijtoua (Lucas 24:13-15, 27, 32).

Inomachtijkauan Jesucristo noijki ijkon otemachtijkej itech iTlajtol toTajtsin. Se tonajli, se tlakatl chanej Etiopía kitstoya tlen kijtouaya iTlajtol toTajtsin. Kuakon, Felipe, inomachtijkauj Jesús, okinisiui niman okitlajtolti: “¿Tikajsikamati on tlen tikmomachtia?”. Yejon tlakatl okijto: “¿Ken ijki, tej, nikajsikamatis tla xakaj nechmachtia?”. Kuakon Felipe opeuj kijlia tlenon kijtosneki tlen kitstoya (Hechos 8:27-35).

TLEN TEPALEUIYA IPAN YEJUIN TONAJLI

Ijkon ken yeuejkaui nemiyaj akin temachtiayaj itech Biblia, ipan yejuin tonajli, iteixpantijkauan Jehová noijki ijkon kichiuaj ipan 239 países niman territorios (Mateo 28:19, 20). Ipan nochi semanas kinpaleuiyaj ipantsin nueve millones tlaltikpakchanejkej makasikamatikan tlen Biblia temachtia. Miyekej yejon tlaltikpakchanejkej nion xkineltokaj Cristo. Uelis mitsmachtiskej niman xtiktlaxtlauas. Tejua uelis tikijtos tla tikneki mamitsmachtikan mochan noso oksekan, noijki uelis ipan teléfono noso ipan Internet.

Tla tikneki timomachtis itech Biblia, xtlajto iuan se iteixpantijkauj Jehová. Tikitas ika xouijtika tikasikamatis Biblia. Tikitas ika techpaleuiya ika “techmachtia on tlen melauak, techchikajkanotsa, kiyektlalia on tlen xkuajli, niman temachtia ken ijki onyas se nemilistli melajki”. Noijki kipaleuiya ika se “ma ueltiu niman ma noyektlalijtiu para kichiuas nochi tlen kuajli” (2 Timoteo 3:16, 17).