¿Tikilnamiki tejua?

¿Kuajli yotikinpouj revistas tlen san kemach yokiskej itech Amatl Tekakistilijketl? Xkita tla uelis tikinnankilis yejuin tlajtoltilistin:

Ijkuak ikalpan toTajtsin temaka tlayekanalistli, ¿kenon noneki kiseliskej tokniuan, ken tlayekankej ipan circuito niman tlayekankej ipan tlanechikojli?

Yejuamej noneki nimantsin tetlakamatiskej. Uelis notlajtoltiskej: “¿Nikinpaleuiya nokniuan maka keman makikauakan Jehová? ¿Nimantsin nikchiua tlayekanalistli tlen nikselia itech ikalpan Jehová?” (w16.11, página 14).

¿Kemanon okintsajkej itech Babilonia akin melauak kichiuaj ken Cristo?

Yejuin onochiuj ijkuak sa ika nochi itlatitlankauj Cristo omik. Ipan yejon tonaltin, se grupo ika tlayekankej itech tlaneltokijli tlen xmelauak kemach peujtoya. Teopan niman tekiuajkej okinpaleuijkej akin kijtouayaj kichiuaj ken Cristo niman kixnamikiyaj tlen melauak niman okiyejyekojkej mapopoliui intlajtol akin kichiuayaj ken Cristo, akin kentla trigo yeskia. Ipan xiujtin ikuitlapan 1914, tlapejpeniltin opeuj makisaj (w16.11, páginas 23-26).

¿Tleka xsan noijki “yejuan ontlamatstokej ipan on tlajtlamach yejuan intlalnakayo kineki” niman “tla tikomatstikaj on tlajtlamach yejuan on espíritu santo kineki”? (Rom. 8:6)

Akin tlanemilia ipan itlalnakayo san kineki kichiuas iileuilis niman tlen itlalnakayo kineki, niman nochipa tlajtoua itech yejuin. Se akin tlanemilia ipan espíritu san tlanemilia ipan tlemach tlen ualeua itech toTajtsin niman itlanemililuan; kuakon kinokauilia makiyekana espíritu santo. Titlanemilis ipan motlalnakayo mitsuikas ipan mikilistli niman titlanemilis ipan espíritu kichiuas xpiya nemilistli niman yolseuilistli (w16.12, páginas 11-14).

¿Tlenon seki uelis tikchiuaskej niman ijkon maka ok melak matajmanakan?

Xchiua tlenon kachtopa noneki, xchiua san tlen tiuelis, mojmostla xtlali maonia kemanon timoseuis, xmoyolpakti tech tlen toTajtsin yokichijchiuj, xchiua ika tlen panoua mamitsuetskiti, nochipa xchiua ejercicio niman nochipa kuajli xkochi (w16.12, páginas 18, 19).

¿Tleka ok noneki matikteititikan yolyemanilistli?

Tla tiyolyemankej titlanemiliskej ken kinamiki totechkopa niman kuajli tikmatstoskej tlen xueli tikchiuaj. Noneki matikilnamikikan ika tlen tikchiuaj uelis kimijtlakos oksekimej niman maka melak totech matitlanemilikan (w17.01, página 16).

¿Tlenon teititia ika toTajtsin okiyekan grupo akin tlayekanaya ipan kachtopa siglo ijkon ken kiyekantika Grupo akin Tlayekana ipan yejuin tonajli?

Ika itlapaleuilis espíritu santo, yejuamej okasikamatkej tlen melauak kijtoua Biblia. Ika intlapaleuilis iluikaktekitkej, yejuamej okiyekankej tenojnotsalistli niman otlaneltokakej itech tlayekanalistli tlen kisaya ipan iTlajtol toTajtsin. Noijki ijkon nochiua ipan yejuin tonajli (w17.02, páginas 23-26).

¿Tlenon kichiua matikitakan tlaxtlauijli ken itlaj tlen melak tlasojti?

Onka naui tlemach: akinon okitemakak, tleka okitemakak, tlenon ononek kichiuas niman tlenon melak techpolouaya. Noneki titlanemiliskej itech yejuin (wp17.1, páginas 4-6).

¿Uelis notlajtolkuepas se tokniuj ijkuak yokitlapejpeni tlenon kichiuas?

Maski noneki tikchiuaskej totlajtol, kemantika nonekis oksejpa titlanemiliskej itech tlen yotiktlapejpenijkej tikchiuaskej. Ijkuak chanejkej Nínive onoyolkuepkej, toTajtsin okinemili ika xok kinpopolos. Kemantika, pampa itlaj nopatla ipan tonemilis noso ijkuak noyenkuiliaj tlen tikmatiyaj nonekis tikpatlaskej tlen yotiknemilijka tikchiuaskej (w17.03, páginas 12-14).

¿Tleka melak teijtlako titetejteneuas?

Uelis kichiuas se tlauejli maueyiya, niman xkuajli ontlamis. Maski tla tikmatij tlen melauak noso ka, tikijtoskej tlen teyolkoko xkeman itlaj kiyektlalis (w17.04, página 19).