Ijkuak miki yakaj akin tiktlasojtla
¿YOMIK yakaj akin melak tiktlasojtlaya? Tla kema, kanaj xkuajli ken otimomachili: kanaj melak otimoyolkoko, moselti otimomachili noso kanaj xok tikmatiya tlenon tikchiuas. Noso kanaj hasta otitlauelmik, opeuj timomojtia noso kanaj opeuj timotlajtlakoltia. Kanaj hasta otiknemili ika más kuajli tla timikiskia.
Maka xnemili ika xtiyolchikauak tla tichoka ijkuak yakaj mikij. Pampa ijkuak tichoka, tikteititia ika melak tiktlasojtlaya akin omik. San ika ¿onka itlaj tlen uelis mitspaleuis maka melak xmajmana?
TLEN SEKIMEJ YOKINPALEUI
Kanaj tikmachilia ika xtlaj mitspaleuis maka xmajmana. San ika, xkita tlen sekimej yokinpaleui, kanaj noijki uelis mitspaleuis:
XCHOKA TLA TIKNEKI TICHOKAS
Tlatlamantik noso sesejneka ken tomachiliaj ijkuak miki yakaj akin tiktlasojtlaj. Sekimej uejkaujtipan noyolkokouaj niman oksekimej xmás uejkauij. Maski san kenon, melak tepaleui ijkuak se choka. Vanessa, akin yotikteneujkaj, kijtoua: “Nochipa san nichokatoya. Niknekiya nikixtis tlen nechajmantoya”. Sofía, akin san totoka omik ikniuj siuatl, kijtoua: “Melak nechyolkokouaya nitlanemilis itech tlen opanok. Nikmachiliaya kentla kitlaposkiaj kampa nitlakokojlo niman ijkon kichipauaskej. Maski yejuin melak tekoko, san ijkon uelis tipajtis”.
XKIJTO KENON TIMOMACHILIA NIMAN TLENON MITSAJMANA
Tikasikamatij ika kemantika tiknekiskia san moselti tinemis. San ika, melak ouijtika san tejua tikixnamikis tlen mitsajmana. Jared, se telpochtli akin kipiya 17 xiuitl niman akin omik itaj, kijtoua: “Nikimijliaya oksekimej kenon ninomachiliaya. Kanaj kemantika nion xnasikamatiya tlen nikijtouaya, san ika, melak nechpaleuiaya nikijtos tlen nechajmanaya”. Janice, akin otikteneujkej ijkuak otipeujkej, noijki kijtoua: “Melak kuajli timomachilis ijkuak titlajtos imiuan oksekimej. Nikitaya ika oksekimej nechasikamatiyaj niman xok san noselti ninomachiliaya”.
XMOKAUILI MAMITSPALEUIKAN
Se tepajtiketl kijtoua: “Akin kinokauiliaj ika inchanejkauan niman akin imiuan nouikaj makinpaleuikan ijkuak kemach inpan yonochiuj tlen melak teyolkoko, más totoka yolseuij”. Xkimijli akin imiuan timouika tlenon uelis kichiuaskej mopampa. Yejuamej kanaj kinekij mitspaleuiskej, san ika, kanaj xkimatij kenon kichiuaskej (Proverbios 17:17).
XNISIUI TOTAJTSIN
Tina kijtoua: “Noueuentsin san totoka omik pampa okajsik cáncer. Aman xok nemiya yakaj akin ueliskia nikijlis tlen nechajmanaya, kuakon, opeuj niknotsa toTajtsin. Mojmostla ika kualkan niktlajtlaniliaya manechyolchikaua. ToTajtsin melak onechpaleui”. Tarsha, akin kipiaya 22 xiuitl ijkuak omik inan, kijtoua: “Melak nechpaleuiaya nikpouas Biblia mojmostla. Nochipa niueliya itlaj tlen nechyolchikauaya”.
XNEMILI IJKUAK OKSEJPA YOLIUIS
Tina kijtoua: “Kachtopa, xtlaj ika nechpaleuiaya nikilnamikis ika ajsis se tonajli ijkuak yoliuiskej akin yomijkej. Nejua niknekiya ika noueuentsin nouan manemi, niman nokoneuan noijki kinekiyaj nemiskej iuan intaj. San ika, aman ika yopanok naui xiuitl, melak nikneki maajsi tonajli ijkuak yoliuis noueuentsin. Yejon tlen melak nechpaleuiya. Melak kuajli ninomachilia ijkuak niknemilia kenon yes ijkuak oksejpa nikitas”.
Kanaj tikmachilia ika xkeman ajsis tonajli ijkuak xok timoyolkokos, san ika, tlen okijto Vanessa kanaj uelis mitspaleuis. Yejua kijtoua: “Se kinemilia ika xok keman uelis yolpakis, san ika, ajsi tonajli ijkuak se kuajli nomachilia”.
Yemelak ika xkeman tikilkauas mochanejkauj akin yomik, san ika, maka keman xnemili ika más kuajli tla timiki. Ika itlapaleuilis toTajtsin, tejua ok uelis tiyolpakis imiuan akin timouika niman ok uelis tinemis ika moyojlo. Sa achijtsin poliui ijkuak toTajtsin kinyolitis noso kinkuiteuas akin yomijkej. Yejua kineki oksejpa xkinnapalo akin tikintlasojtla, niman noijki kineki ika tlen mitsyolkokoua mapopoliui.