Ijkuak tlaixpoliui

Andrew, akin ualeua Sierra Leona, kijtoua: “Ijkuak san kemach nochi opanok, melak toyolkokouayaj. Nochi tlen tikpiayaj oapachiuj niman osokipachiuj”.

David, akin ualeua islas Vírgenes, kijtoua: “Sakin ika opanok ajakakiyaujtli, otokuepkej tochan niman xtlaj otiknextijtajsikej. Xok tikmatiyaj tlenon tikchiuaskej. Nochpoch onotlakuankets niman opeuj choka”.

TLA TEJUA ijkon mopan yonochiujka, kuakon kanaj tikasikamati kenon nomachiliaj akin ijkon inpan nochiua. Yejuamej ajmankamikij, xuelij kineltokaj tlen inpan yonochiuj, xok kimatij tlenon kichiuaskej niman xkuajli tlen kitemikij. Miyekej melak noyolkokouaj, niman hasta kinemiliaj ika xok keman yolpakiskej.

Tla tejua noijki miyek yotikpolo ijkuak itlaj otlaixpolo, kuakon kanaj noijki tikmachilia ika xok titlaxikoua. Kanaj yopeuj tiknemilia ika más kuajli tla xok tinemiskia. San ika, Biblia kijtoua ika kema uelis tiyolpakis maski mopan yonochiuj itlaj tlen melak xkuajli, niman noijki kijtoua ika xnochipa ijkon tinemiskej.

TLEN KIJTOUA BIBLIA UELIS TECHPALEUIS

Eclesiastés 7:8 kijtoua: “Más kuajli on tlen tlami nochiua, xken on yejua peua nochiua”. Ijkuak tlaixpoliui niman se kineki kiyektlalis inemilis, kanaj kinemilia ika xuelis kichiuas. San ika, tla se xnosiaujkaua niman nokojtilia, uelis kichiuas.

Biblia kijtoua ika ajsis se tonajli ijkuak xok tijkakiskej ika yakaj choka nion ika yakaj “ajmankatsajtsi” (Isaías 65:19). Yejuin nochiuas ijkuak iTekiuajyo toTajtsin kikuepas yejuin tlaltikpaktli se xochitlalpan (Salmo 37:11, 29). Xok itlaj tlaixpolos. Xok tikilnamikiskej tlen xkuajli topan onochiujka, pampa toTajtsin akin nochi ueli kichiua techmelajkaijlia: “On tlen yonochiuj, nochimej kelkauaskej; xokaman yakaj kelnamikis” (Isaías 65:17).

San xkonnemili: toTajtsin akin otexchijchiuj miyek tlemach yokichiuj niman ijkon techmakas se kuajli nemilistli niman se tlamachialistli. Yejua kineki ika matinemikan ika toyojlo kampa tlayekanas iTekiuajyo (Jeremías 29:11). ¿Uelis mitspaleuis yejuin niman ijkon maka xajmankamiki? Sally, akin otikteneujkej ipeujyan yejuin amatlajkuilojli, kijtoua: “Titlanemilis itech nochi tlen kualtsin kichiuas iTekiuajyo toTajtsin ika tlayekapan, uelis mitspaleuis xkilkaua tlen yopanok niman xtlaxiko”.

¿Tikmatstika tlenon más kichiuas iTekiuajyo toTajtsin? Melak mitspaleuis tla tikmati yejuin. Pampa tikasikamatis ika xnoneki melak timotekipachos ijkuak tikixnamikis tlen melak teyolkoko, niman noijki tikasikamatis ika xok keman itlaj tlaixpolos. Chika ajsi yejon tonajli, Biblia uelis mitspaleuis xtlaxiko ijkuak itlaj tlaixpolos kampa tichanti. Matikitakan tlenon kijtoua.

Textos itech Biblia tlen uelis mitspaleuiskej

Kuajli xkochi

“Más kuajli [...] tikpiyas achitsin neseuijli, xken sanoyej tichikajkatekitis niman tikpiyas miyek, pero xtikpiyas neseuijli. Yejua in no sen tlaixkajkayaualistli ken tla se kinekiskia kajsis ikan ima on ajakatl” (Eclesiastés 4:6).

Ixtlamatkej kijtouaj ika ijkuak yakaj ipan nochiua tlen xkuajli niman xkuajli kochi, yejon uelis kichiuas más xkuajli manomachili. Yejua ika, melak kuajli tla se kuajli kochi.

Xkijto tlen mitsajmana

“Sen ueyi ajmantli xkauilia sen tlakatl ma nemi iyolika, pero ijkuak kaki sen kuajli tlajtojli, yejua noyoleua” (Proverbios 12:25).

Xtlajto iuan se mochanejkauj noso se akin iuan timouika. Yejuamej xsan mitskakiskej, noijki uelis mitsyolchikauaskej niman mitspaleuiskej.a

Xkilnamiki ika ajsis tonajli ijkuak nochi noyektlalis

“Pero tejuamej tikmachixtokej on yenkuik cielo iuan on yenkuik tlaltikpaktli yejuan Dios otechprometerouilij. Ompa tej, nochimej nouikaskej yolmelajkej” (2 Pedro 3:13).

a Tla yakaj melak najmana noso youejkauj najmantinemi, kanaj nonekis konitas se tepajtiketl.