Ijkuak se xok kixikoua tlen kajmana

TINOCHIMEJ melak ika toyojlo tinemij ijkuak xtlaj techajmana. San ika, kemantika topan nochiua tlen xkuajli niman tikmachiliaj ika xok titlaxikouaj.

Sally,a akin chanti Estados Unidos, okipolo miyek tlen kipiaya ijkuak otlaixpolo se chikauak ajakakiyaujtli. Yejua kijtoua: “Nikmachiliaya ika xok niueliya. Miyekpa onikmachili ika xnikxikoskia tlen nopan panotoya”.

Ijkuak miki yakaj akin tiktlasojtla noijki melak teyolkoko. Janice, akin ualeua Australia, kijtoua: “Ijkuak omemej nokoneuan omijkej, onikmachili kentla nochi nonemilis oxoxoton niman ononek oksejpa nikyektlalis. Nikijliaya toTajtsin: ‘¡Xok niueli! San nikneki nikochis niman xok keman nitlachias’”.

Niman Daniel melak onoyolkoko ijkuak isiuauj okikajkayauj. Yejua kijtoua: “Ijkuak nosiuauj onechijli ika yonechkajkayaujka iuan okse, onikmat kentla onechyoltsopinijkej ika se cuchillo. Yejuin melak onechkoko, niman ouejkauj ijkin ninomachilijtinemiya”.

Yejuin Amatl Tekakistilijketl mitspaleuis xkasikamati ika ok uelis tiyolpakis maski tikixnamiki tlen xkuajli, ijkon ken:

Ijkuak tlaixpoliui
Ijkuak miki yakaj akin tiktlasojtla
Ijkuak moixnamik mitskajkayaua
Ijkuak tikpiya se kokolistli
Ijkuak tikmachilia ika xok titlaxikoua

Kuakon, kachtopa matikitakan tlenon mitspaleuis ijkuak tlaixpoliui.

a Seki tokayomej yonopatlakej.