Tlen noneki tikmatiskej ijkuak tiaskej ipan toueyitlanechikol
Tlen hora peuas. Tlatlaposkej 8:00 ika kualkan. Tlatsotsonajli peuas 9:20 nochi yeyi tonajli. Ijkuak peuas, tinochimej noneki totlaliskej niman ijkon kuajli mapeua nochi tlen nopanoltis. Viernes niman sábado tlen nopanoltis ontlamis kanaj 5:00 ika teotlak niman domingo ontlamis kanaj 4:00.
Tlakuikaltin tlen ika tikueyichiuaj Jehová. Yeuejkaui ikalpan toTajtsin kiueyichiuaya Jehová ika tlakuikaltin. Ipan yejuin tonajli, ok melak ueyi kijtosneki tikuikatlalilis Jehová ijkuak tikueyichiuas (Sal. 28:7). Nochi ueyi tlanechikojli yeyi tonajli peua ika tlatsotsonajli. Xsan kitlaliaj yolik makakisti ijkuak tejuamej tonojnotstoskej, noyektlaliaj ika matikueyichiuakan Jehová niman matomachtikan itech. Ika yejon, ijkuak akin kiyekantok tlanechikojli kijtoua ika peuas tlatsotsonajli, noneki totlalijtoskej niman kuajli matijkakikan yejuin tlatsotsonajli, niman maka matitenojnotstokan. Ijkon tikteititiskej ika tiktlasojkaita tlen kichiuaj tokniuan akin nemij ipan orquesta Watchtower. Okpa ipan se xiuitl yejuamej kitlaxtlauaj ijkuak yauej ipan Patterson, (Nueva York) niman ijkon kichiuaj grabación ika tlatsotsonaltin tlen techyolpaktia. Tla yonokak yejuin tlatsotsonajli, aman tikueyichiuaskej Jehová ijkuak tokuikatiskej tlakuikaltin itech Tekiuajyotl.
Kampa nokauaj carros. Xnotlaxtlauas kampa nokauas carros ijkuak tejuamej tikijtoskej kanon nokauaskej, niman kintlaliskej ijkon ken ajsitiaskej. Miyekan xonakij miyek carros, ika yejon timechyoleuaj, tla ueli, mayakan miyekej ipan se carro. Kampa nokauaskej carros akin kinuajuikaj akin xuelij nejnemij noso kualoj san ompa kinkauaskej tlen kipiyaj letrero ika kuikaj se akin xueli nejnemi noso kualo.
Tikxelos kampa timotlalis. Ijkuak notlaposkej puertas, maka xmotlalo xkinxeloti kentla yakaj iuan timotlantoskia. Xkimasikamati oksekimej maski nonekis timotlalis kampa xtiknekiskia. Tla tiknektokej tajmanaskej itech oksekimej, tikteititia ika yemelak tiktokaj Cristo niman akin techitaj makiueyichiuakan toTajtsin (Juan 13:34, 35; 1 Cor. 13:5; 1 Ped. 2:12). San uelis tikinxelos kampa notlaliskej akin imiuan tichanti, akin mouan yauej ipan carro noso akin imiuan timomachtijtika Biblia. Maka itlaj xtlali kampa notlalilos tla xompa notlaliskej akin mouan yauej, pampa ijkon xouijtika nesis kampa notlalilos. Noijki onias kampa notlaliskej akin uejueyimej niman akin kualoj. Pampa onias san keski, xnochipa onias kampa notlaliskej nochimej inchanejkauan. Timechtlajtlaniliaj xkinkauilikan ompa manotlalikan san akin kinpaleuijtokej akin youeuentsintiajkej noso akin kualoj.
Timotlakentis kuajli ken noneki. Noneki matotlakentikan ipan ueyi tlanechikojli ken noneki, niman xtikchiuaskej ken akin xkitekichiuiliaj toTajtsin (1 Tim. 2:9). Noijki, noneki kuajli matotlakentikan hasta ijkuak tiaskej ipan hotel tikteijliskej ika ompa tokauaskej noso ijkuak tikonteijliskej ika itiauej. Niman noijki ijkuak yotikiskej ipan ueyi tlanechikojli. Ijkon, kuajli tomachiliskej ika tikitki tarjeta kampa nesi ika tinemij ipan se ueyi tlanechikojli niman xtipinauiskej titenojnotsaskej. Tinesiskej kuajli niman tlen tikchiuaskej ipan ueyi tlanechikojli xsan kichiuas ika akin kipiyaj kuajli inyojlo makinekikan kikakiskej itech Biblia, noijki kiyolpaktis Jehová (Sof. 3:17).
Tla tiktekitiltis aparatos. Tla tiknemilia tikitkis se celular noso okse aparato, xkita maka makinpasolo sekimej. Tla tiktekitiltis cámara, videocámara, tableta noso okse aparato, xteasikamati niman ijkon maka titepasolos niman maka titetsakuilis maontlachiakan ipan plataforma. Xteititi ika tikintlakaita oksekimej niman maka xkontetitlanili mensaje tlen xnoneki.
Tlakuajli. Xkitki tlen tijkuas niman ijkon xtikisas tias tontlakouas ipan tlajkotonajli. Uelis tikitkis tlen onakis tlatsintlan kampa timotlalia. Tlen ika tiktlalia tlakuajli xnotekauilia tikitkis tlen melak ueyi noso tlen matlachijchiujtli ika vidrio.
Tomintsin tlen kisa ipan toyojlo. Uelis tikteititiskej ika tiktlasojkamatij tlamachtijli itech toTajtsin tla tiktemakaj totomintsin. Tla tiktemaka se cheque xtlalili “La Torre del Vigía, A.R.”. Ipan seki uejueyimej tlanechikoltin uelis tiktemakaskej totomintsin ika tarjetas de débito niman crédito.
Pajtli. Tla tejua yomitsijlijkej tlen pajtli tikonis, xkitki pampa ipan ueyi tlanechikojli xuelis mitsmakaskej. Tla tikpiya diabetes niman mistsopiniaj, xkita kanon tiktlajkalis jeringas pampa yejon uelis kimijtlakos oksekimej. Maka xtlajkali ipan tlasojli tlen nosentlalia ipan ueyi tlanechikojli nion ipan hotel.
Matikitakan maka panos tlen xkuajli. Xkita maka itlaj kichiuas timotexolauas noso xmantikisa. Nochi xiujtin nokokouaj ika zapatos tlen kitkij, ken ijkuak kintekitiltiaj tacones tlen melak uejkapan. Melak kuajli tla notekitiltiaj zapatos tlen ika kuajli tinejnemis ipan escaleras noso itlaj kampa uelis saliuis zapato.
Akin xok kuajli tlakakij. Ipan seki uejueyimej tlanechikoltin tlen nopanoltis noijki kakistis ipan radio (FM). Nonekis se radio niman audífonos tla tikneki tijkakis.
Carriolas. Maka xkitki carriolas ipan ueyi tlanechikojli. Notekauilia tikitkis kampa notlaliaj kokonej tla onaki itech se asiento.
Timajuiyalis. Miyek tlanechikoltin uejueyimej nochiuaj kampa tlatsatsauktika. Ika yejon, tikteititis ika titeasikamati tla san achijtsin timotlalia tlen ajuiyak, ijkon xkinpasolos akin xkuajli nijyotiaj noso kipiyaj okse kokolistli ken yejuin (1 Cor. 10:24).
Restaurantes. Tlen tikchiuaj ipan restautantes kiueyichiua Jehová. Kuajli xmotlakenti ken akin yemelak kichiuaj ken Cristo. Xkaujteua propina tla ijkon nochiua.
Hoteles:
Maka xkinxelo cuartos tlen xtikintekitiltis niman san xkinkalakti ipan cuarto san kech notekauilia.
Maka xteijli ika xok tiktekitiltis cuarto. San uelis tikchiuas tla itlaj panoua tlen xtikchia. Tla ijkon tikchiua nimantsin xkonteijli niman ijkon oksekimej uelis kitekitiltiskej (Mat. 5:37). Tla ijkon panoua, xkijkuilo número kampa manesi ika xok tiktekitiltis yejon cuarto. Tla tikonteijlia ijkuak xok poliui cuarenta y ocho horas ika tiktekitiltiskia, ompa nokauas motomintsin tlen yotiktemakaka.
Xmatsto ika tla tiktekitiltia tarjeta de crédito noso débito ijkuak tikonteijlia ipan hotel ika tiktekitiltis se cuarto ompa kajsiskej seki motomin tlen ika notlaxtlauas nochi, noijki itech tlen uelis tikijtlakos ijkuak ompa tinemis. Xuelis tiktekitiltis yejuin tomintsin hasta ijkuak yotlan tiktlaxtlaua, sakin tla yotikis itech hotel.
Xkitki carrito tlen ika nosasakaj maletas san ijkuak itiktekitiltis niman nimantsin xkauati niman ijkon oksekimej uelis kitekitiltiskej.
Xkinmaka propina, tla ijkon nochiua, akin ompa tekitij ijkuak mitspaleuiskej ika momaletas niman noijki akin tlachipauaj ipan cuarto.
Xtlakualchiua ipan cuarto san tla notekauilia.
Tla ipan hotel notemaka tlakuajli, café noso hielo maka xkitki ipan ueyi tlanechikojli.
Ijkuak titlajtos imiuan akin tekitij ipan hotel, xteititi kualneskayomej. Xkilnamiki ika yejuamej miyekej kintekichiuilijtokej akin ompa onkochij niman kitlasojkamatiskej tla tikinmasikamati, itlaj tikinmaka niman xtimosiaujkaua.
Melak noneki ika tajtin nochipa makintlajpiyakan inkoneuan ijkuak nemiskej ipan hotel, ipan elevadores, ipan albercas, kampa notlakenpatlaj niman ipan gimnasio.
Ipan Lista de hoteles recomendados kijtoua kech notlaxtlauas se tonajli, san ika, xiuan impuestos. Tla kinekij xtlaxtlaua okseki, maka xchiua niman xkimijli Akin kitaj kanon kochiskej akin yauej ipan yejon tlanechikojli.
Tla itlaj xkuajli panoua ipan cuarto, nimantsin xkimijli mamitspaleuikan Akin kitaj kanon kochiskej ijkuak ok tinemi ipan yejon tlanechikojli.
Akin kineki tlapaleuis. Nochi akin kineki tlapaleuis kipiya ika yas itech Akin tlapaleuiyaj kampa noneki. Tla xikaxiltiaj 16 xiuitl, uelis tekitiskej tla intaj, innan noso yakaj okse imiuan tekiti.