Matitenotsatij

1. ¿Kemanon peuas titenotsaskej mayakan ipan ueyi tlanechikojli?

¹ Ijkuak tiknemiliaj iuan titlakuaskej tochanejkauan noso akin kuajli iuan touikaj, noneki miyek tekitl niman tikpopolouaj tomintsin, ika yejon ika toyojlo tikimijliaj touan matlakuatij. Noijki ijkon, melak miyek tekitl nochiua ijkuak nochijchiua nochi tlen nopanoltia ipan se ueyi tlanechikojli. Yeyi semanas ijkuak xipeua toueyitlanechikol, Jehová techkauilia matikchiuakan se ueyi kualtsin tekitl, matikimijlitij mayakan. ¿Tlenon techpaleuis ika nochi toyojlo matikinnotsatij oksekimej?

2. ¿Tlenon techmapeuas matikimijlikan oksekimej mayakan ipan ueyi tlanechikojli?

² Tla titlanemiliaj kenon melak techyolchikauas tlen tikseliskej ipan toueyitlanechikol, techyolmapeuas matikimijlikan oksekimej mayakan (Is. 65:13, 14). Matikilnamikikan ika yejuin tlen tikchiuaj nochi xiuitl melak tepaleuiya (xkita recuadro “Tlen yonochiuj”). Itech akin tikimijliskej mayakan kanaj xnochimej yaskej. San ika, tla tochikauaj tikchiuaskej yejuin tekitl kiueyichiuas Jehová niman nesis ika yejua kuelita kitemakas tlen kuajli (Sal. 145:3, 7; Apoc. 22:17).

3. ¿Kenon notemamakas amatsintli tlen ika titenotsaskej mayakan ipan ueyi tlanechikojli?

³ Grupo ika tlayekankej ipan tlanechikoltin kitaskej kenon kitemamakaskej yejuin amatl, tla kikauaskej kampa xakaj nemi noso notemamakas ijkuak tenojnotsaskej kampa tojlan nojuitiaj. Sábados iuan domingos ijkuak notemakaj revistas noijki iuan notemakas yejuin amatsintli ijkuak uelis. Tla yotlamito yejuin tekitl tlen nochiua, tipakiskej pampa tikmatstoskej pampa teuan otikchiujkej yejuin tekitl niman ijkon ken tejuamej, miyekej makiselikan tlamachtijli tlen Jehová techmaka.

Tlen yonochiuj

Yeuejkaui ijkuak se tokniuj siuatl otlapaleui ipan yejuin ueyi tekitl, okinemili tla tepaleui tlen nochiua. Yejua okinemili: “¿Yemelak yauej ipan ueyi tlanechikojli ijkuak tikinnotsaj mayakan?” Sábado ika kualkan ipan ueyi tlanechikojli okitak se tlakatl akin kipiaya itlaneltokil itoka sij niman nisiuj onotlali, kuakon okitlajpalo nimantsin. Nesi ika oyaj pampa okiseli se amatsintli. Yejuin tlakatl okitlajtolti tokniuj miyek tlen kinekiya kimatis niman tokniuj ouel okinankili. Yejuin tlakatl okijto kenon melak kiyolpaktiaya tlen kikaktoya niman otlamojkaitak kenon nesij niman kichiuaj akin ompa nemij. Ipan yejon tonajli noijki iuan otlajto iuan se tlakatl iuan isiuauj akin nisiuj nemiyaj. Yejuamej noijki okiselijkej se amatsintli niman oyajkaj ipan ueyi tlanechikojli ipan autobús. Melak okuelitakej tlen okikakej niman kinemilijtoyaj oksejpa yaskej domingo. Tokniuj okasikamat ika melak noneki matikchiuakan yejuin ueyi tekitl tlen tikchiuaj nochi xiujtin.
Kinaman ipan se ueyi tlanechikojli, se tokniuj iuan isiuauj akin precursores okintlajpalotoj se tlakatl iuan isiuauj akin iuejueyimej katkaj. Yejuamej okimijlikej tokniuan ika xkeman yayaj ipan se ueyi tlanechikojli. Yejuin precursores okintlajtoltijkej: ¿“Akinon omechnots xuajlakan?”. Yejuamej otlanankilijkej: “Se tonajli ijkuak otajsikej tochan otiknextijtajsikej se amatsintli itsintlan puerta”. Yejuamej okitakej tlen kijtouaya yejuin amatl niman hasta okitemiltijkej tlen kintlajtlaniliaya tlakuitlapan. Oksekimej tokniuan ipan ueyi tlanechikojli imiuan otlakuajkej. Yejuamej melak yolpakiyaj itech tlen kikakiyaj niman okinemilijkej oksejpa yaskej ipan ueyi tlanechikojli uajmostla. Okitakej kenon yaskej kintlajpaloskej ipan inchan niman kinpaleuiskej.