Matikinpaleuikan akin xtlachiaj makixmatikan Jehová
1. ¿Kenon okiteititi Jesús ika notekipachouaya inpampa tlaltikpakchanejkej akin xtlachiaj?
1 Ijkuak Jesús ikistoya itech Jericó, omemej tlakamej akin xtlachiaj opeuj kitsajtsiliaj: “¡ToTeko [...], xtechikneli!”. Maski Jesús kanaj melak notekipachouaya pampa kimatstoya ika sa achijtsin poliuiya ika kimiktiskiaj, yejua onotelti, okinnots niman okinpajti (Mat. 20:29-34). ¿Kenon uelis tikteititiskej ika noijki titeikneliaj ken Jesús?
2. ¿Kenon uelis tikinnojnotsaskej tlaltikpakchanejkej akin xtlachiaj ijkuak tikinnextiskej ipan ojtli?
2 Matikinpaleuikan. Tla tiknextiaj se akin xtlachia, kanaj ipan ojtli, matikijlikan akin tejuamej niman matikpaleuikan. Kanaj ijkuak peuas iuan titlajtoskej xkinekis touan tlajtos, pampa miyekpa nemij akin kinekij kinchiuiliskej itlaj tlen xkuajli. San ika, tla kuajli tiknotsaj niman tikititiaj ika yemelak tiknekij tikixmatiskej, kanaj kinekis touan tlajtos. Noijki, noneki matikmatstokan ika sekimej ok ueli tlachiaj san achijtsin, niman yejon uelis techpaleuis tikmatiskej kenon uelis tikinpaleuiskej. Tla yotikpaleuijkej, uelis tikijliskej ika noijki titemachtiaj itech iTlajtol toTajtsin, Biblia. Matikpouilikan se texto ipan Biblia, ken Salmo 146:8 noso Isaías 35:5, 6. Uelis tikpaleuiskej makimati kenon uelis kintemoltis amatlajkuiloltin tlen nokakij itech jw.org. Tla yejon tlaltikpakchane ueli amapoua ika braille, matiktlajtoltikan tla kuelitaskia kiselis amatlajkuiloltin tlen yonokixtijkej itech Biblia ika braille. Tla icomputadora se tlaltikpakchane kipiya se programa tlen kipoua tlen uajnesi ipan pantalla, kanaj uelis kipaleuis noijki tlamachtiltin tlen yonotlalijkej ipan jw.org niman amatlajkuiloltin tlen uelis notemoltiskej ika RTF (formato de texto enriquecido). Yejuin ome ken uelis notemoltiskej amatlajkuiloltin, san onka ika español niman okseki tlajtoltin tlen melak noixmatij ipan nochi tlaltikpaktli. (Xkita recuadro “Ijkuak tikpaleuis se akin xtlachia...”.)
3. ¿Kenon uelis tikinnextiskej tlaltikpakchanejkej akin xtlachiaj kampa titenojnotsaj?
3 Matikintejtemokan akin xtlachiaj. Kanaj xmiyekpa tikinnextiaj tlaltikpakchanejkej akin xtlachiaj ijkuak tontenojnotsaj techajchan, pampa xnochipa kinekij tlajtoskej imiuan akin yauej inchan niman xkimixmatij. Ika yejon, noneki tikintejtemoskej niman tikinnojnotsaskej itech iTlajtol toTajtsin (Mat. 10:11). ¿Tikixmatstokej se akin xtlachia kampa titekitij noso ipan kaltlamachtijli? Kuakon, matiknojnotsakan itech iTlajtol toTajtsin. Tla kampa titenojnotsaj onka kaltlamachtijli kampa yauej akin xtlachiaj, matiktlajtoltikan director tla kinektika tikimitkiliskej seki amatlajkuiloltin ika braille tlen uelis kitlalis ipan biblioteca. ¿Tikixmatstokej yakaj akin kipiya ichanejkauj akin xtlachia? Kampa titenojnotsaj, ¿nemij noso onka kampa kinpaleuiyaj akin xtlachiaj noso onka kaltin kampa kinpiyaj akin xtlachiaj? Matikijlikan ichanejkauj akin xtlachia, akin teselia ipan yejon kaltin noso director ipan kaltlamachtijli ika tiiteixpantijkauan Jehová tiknekij tikinpaleuiskej akin xtlachiaj, niman ika tikinpiyaj amatlajkuiloltin ika braille niman grabaciones tlen nokakij tlen uelis kinpaleuis akin xtlachiaj. Matikimititikan ipan Biblia ika toTajtsin kijtoua ika yejkos tonajli ijkuak akin xtlachiaj, uelis tlachiaskej nochipa. Noijki uelis tikititiskej video tlen itoka “No sé qué haría sin ella”, tlen onka ipan jw.org. Yejuin video techijlia kenon se tokniuj akin xtlachia yokipaleui ika kipiya Biblia ika braille. Tla kuajli tikteijliaj tleka tikintejtemouaj akin xtlachiaj, uelis kichiuas ika imiuan matitlajtokan akin xtlachiaj.
4. ¿Tlenon techmachtia tlen ipan onochiuj se tokniuj akin itoka Janet?
4 Se tokniuj akin xtlachia itoka Janet oyaj ipan se kajli kampa chantij akin xtlachiaj, niman opeuj tlajtlatoua iuan se ichpochtli. Janet okijli: “Ijkuak Jesús onen ipan tlaltikpaktli, okinpajti sekimej tlaltikpakchanejkej akin xtlachiayaj niman ijkon okiteititi tlen kichiuas ika tlayekapan inpampa akin xtlachiaj”. Kuakon okitakej tlen kijtoua Apocalipsis 21:3, 4, niman Janet okijli kenon iTekiuajyo toTajtsin kichiuas yejuin. Ichpochtli achijtsin otlanemili, sakin okijto: “Xkeman nechijliaya yejuin se akin xtlachia. Miyekej akin ueli tlachiaj kinemiliaj ika akin xtitlachiaj ijkon tinemij pampa otikchiujkej itlaj tlen xkuajli noso ipampa tlen okichiujkej tochanejkauan”. Janet okititlanili ipan Internet kampa kinextiskia amoxtli Temachtia Biblia, niman aman okpa ipan semana nomachtiaj Biblia.
5. Maski xuelis tikinpajtiskej akin xtlachiaj, ¿kenon kinpaleuis ipan innemilis tla tikinpaleuiyaj?
5 Yemelak ika, tejuamej xuelis tikinpajtiskej akin xtlachiaj ken okichiuj Jesús. San ika, kema uelis tikinpaleuiskej. Satanás, akin kiyekantika tlemach ken nochiua ipan yejuin tlaltikpaktli, yokimixtlapacho miyekej tlaltikpakchanejkej, niman noijki akin yemelak xueli tlachiaj. Uelis tikinpaleuiskej nochimej tlaltikpakchanejkej makasikamatikan tlen melauak itech iTlajtol toTajtsin (2 Cor. 4:4). Jesús okinpajti omemej tlakamej akin xtlachiayaj nisiuj itech Jericó pampa “okimiknelij” (Mat. 20:34). Tla tejuamej noijki totekipachouaj inpampa akin xtlachiaj, tikinpaleuiskej makixmatikan Jehová, akin kichiuas matlachiakan niman kinmakas nemilistli tlen xkeman tlamis.