Xtlajtlanili toTajtsin mamitsteochiua

ToTajtsin otechtlayokoli itlaj tlen melak kualtsin: okichiuj matiuelikan iuan matonotsakan niman matikijlikan kenon tomachiliaj. Teotlajtoketl David okijli toTajtsin: “¡Pampa tejua titechkaki ipan toueyikatsajtsilis! Nochi tlaltikpaktlakatl uajlau motech” (Salmo 65:2). San ika ¿kenon noneki tiknotsaskej toTajtsin niman ijkon matechkaki niman matechteochiua?

XKIJTO TLEN TIKMACHILIA NIMAN XMOYOLYEMANILI

Salmo 62:8 kijtoua: “Xtlalikan nemoyojlo yejua itech”. Ijkuak tiknotsaskej toTajtsin, uelis tikijliskej nochi tlen tikmachiliaj. ToTajtsin akin nochi ueli kichiua melak kipatiojkaita ijkuak tikijliaj tlen kisa ipan toyojlo.

XTOKAYOTI TOTAJTSIN IJKUAK TIKNOTSAS

Maski toTajtsin miyek ken kixmatij, san se itoka kipiya. “Nejua niJehová. Yejuin notokayo” (Isaías 42:8, Traducción del Nuevo Mundo). Itoka toTajtsin, Jehová, miyekpa uajnesi ipan iTlajtoltsin, kanaj siete mil. Miyekej teotlajtokej okitokayotijkej toTajtsin ijkuak okinotskej. Teotlajtoketl Abrahán okijto: “Jehová, [...] nimitstlajtlanilia, xnechkauili ok manimitsnotsto” (Génesis 18:30, Traducción del Nuevo Mundo). Tejuamej noijki noneki tiktokayotiskej toTajtsin Jehová ijkuak tiknotsaskej.

XNOTSA IKA MOTLAJTOL

Maski san tlen tlajtojli titlajtouaj, toTajtsin kasikamati tlen tiknemiliaj niman tlen tikmachiliaj. ITlajtol toTajtsin kuajli techijlia: “Dios xkichikoita se tlakatl iuan okse, yej kiselia san akinon yejuan kitlakaita niman kuajli nouika maski ualeua san katlejua país” (Hechos 10:34, 35).

San ika, tla tiknekij ika toTajtsin matechteochiua, xsan noneki tiknotsaskej. Ipan okseki tlamachtiltin tikitaskej tlenon más noneki tikchiuaskej.