Ken uelis tipeuaskej titenojnotsaskej ika amatlajkuiloltin pitentsitsintin

Ipan enero de 2018, ixpan amatlajkuilojli Tlen Tomachtiskej niman tlen Notekitiltis, onotlali kenon uelis tipeuaskej titenojnotsaskej. Niman ikalpan toTajtsin yotechilnamikti ika noneki matonojnotsakan imiuan oksekimej niman maka san matikintemakakan amatlajkuiloltin. Niman videos tlen noteititiaj kampa “Xmomachti melak kuajli xtenojnotsa” techititiaj kenon uelis tipeuaskej titenojnotsaskej san ika Biblia. ¿Yejon kijtosneki ika xuelis tijkuiskej nion se amatlajkuilojli ijkuak titenojnotsaskej techajchan? Ka, xyejon kijtosneki. Amatlajkuiloltin pitentsitsintin uelis techpaleuiskej ijkuak tipeuaskej titenojnotsaskej. Uelis ijkin tikintekitiltiskej:

1. Matitetlajtoltikan tlen uajnestiuj ixpan amatlajkuilojli pitentsin niman matitekauilikan makitlapejpenikan ken tlanankiliskej.

2. Matikteititikan tlaxelojli tlen tlakpak onotlali ipan ika ome página. Tla akin tiknojnotsaj kipiya tiempo, matikpouilikan tlen uajnestiuj ipan amatlajkuilojli pitentsin niman itech yejon matitlajtokan.

3. Matikmakakan yejon amatlajkuilojli akin otiknojnotskej niman matikyolchikauakan matlami makipoua ijkuak yejua uelis.

4. Ijkuak xitiauej, matikijlikan ika ijkuak oksejpa tikontlajpaloskej, tiknankiliskej ika Biblia tlen uajnestiuj kampa kijtoua “Xmotlajtolti”.

Ijkuak oksejpa tikontlajpaloskej, matiknankilikan tlen otikijtojkaj niman matikijlikan itlaj tlen uelis tiknankiliskej ijkuak oksejpa tikonitaskej. Matiktlapejpenikan ipan página tlen tikpiyaj ipan Internet tlen ueliskia tiktlajtoltiskej noso itech amatlajkuilojli tlen uajnestiuj kampa ontlami amatlajkuilojli pitentsin. Sakin, matikitakan tla iuelis tiktekiuiltiskej amatlajkuilojli ¡ToTajtsin techijlia tlen kualtsin! noso okse amatlajkuilojli tlen uelis tiknextiskej ipan Tlen ika titemachtiaj.