“Xnisiuikan Dios niman yejua mechnisiuis” (Santiago 4:8).
¿Techkaki toTajtsin ijkuak tiknotsaj?
¿Yotimotlajtoltijka tla toTajtsin mitskaki ijkuak tiknotsa? Miyekej noijki ijkon yonotlajtoltijkaj. Miyekej yokitlajtlanilijkej toTajtsin makinpaleui ijkuak kipiyaj tlauejli. San ika, ok najmanaj. ¿Kijtosneki yejon ika toTajtsin xtechkaki? Ka, xijkon. Biblia techijlia ika toTajtsin techkaki ijkuak tiknotsaj ken noneki. Matikitakan tlen kijtoua Biblia.
TOTAJTSIN KEMA TECHKAKI
“[¡]Pampa tejua titechkaki ipan toueyikatsajtzilis! Nochi tlaltikpaktlakatl uajlau motech” (Salmo 65:2).
Miyekej kinotsaj toTajtsin pampa yejon kichiua kuajli manomachilikan, maski kinemiliaj ika toTajtsin xkinkaki. San ika, tiknotsas toTajtsin xsan kichiuas kuajli xmomachili ijkuak tikpiyas tlauejli. Biblia kuajli techijlia ika toTajtsin Jehováa “nisiu nemi iminuan on yejuan kinotsaj, yejuan kinotsaj melauak ikan nochi inyojlo. Yejua kiminmaka tlinon kitlajtlaniliaj on yejuan kitlakaitaj” (Salmo 145:18, 19).
Kuakon, uelis kuajli tikmatstoskej ika Jehová kinkaki ijkuak kinotsaj akin kiueyichiuaj. Ika tlasojtlalistli, yejua techijlia: “Nemejuamej nenmoueyikatsajtsiliskej, niman nenuajlaskej notech niman nejua nemechnankilis” (Jeremías 29:12).
TOTAJTSIN KINEKI XNOTSA
“Maka kaman xkajkauakan ika nenkichiuaj oración” (Romanos 12:12).
Biblia techyolchikaua nochipa matiknotsakan toTajtsin. Kuajli nesi ika Jehová kineki matiknotsakan (Mateo 26:41; Efesios 6:18).
¿Tleka toTajtsin kineki xnotsa? Xnemili yejuin: nochimej tajtin kuelitaj ijkuak inkoneuan kintlajtlaniliaj makinpaleuikan. Kanaj tajtli ikimati tlenon kipoloua noso tlenon kimachilia ikoneuj, san ika, ijkuak kikaki tlen kijlia ikoneuj, tajtli kimachilia ika ikoneuj itech tlaneltoka niman ika kitlasojtla. Noijki ijkon, ijkuak tiknotsaj Jehová tikititiaj ika itech titlaneltokaj niman ika tiknekij tiknisiuiskej (Proverbios 15:8; Santiago 4:8).
TOTAJTSIN KEMA KINEKI MITSPALEUIS
“Xmaktilikan Dios nochi on tlajtlamach yejuan mechyolpajsolou[a] pampa yejua kineki mechpaleuis” (1 Pedro 5:7).
ToTajtsin kineki matiknotsakan pampa techtlasojtla niman kineki kuajli matinemikan. Kimatstika tlen tikixnamikij niman kineki techpaleuis.
Tekiuaj David nochipa okitlajtlanili Jehová makipaleui niman nochipa okijli tlen kinemiliaya niman kimachiliaya (Salmo 23:1-6). Niman toTajtsin melak kitlasojtlaya David niman nochipa kikakiya (Hechos 13:22). ToTajtsin noijki techkaki pampa kinektok techpaleuis.
“NIKTLAJSOJTLA TOTEKO PAMPA YEJUA OKAK NOUEYIKATSAJTSILIS”
Yejuin tlajtoltin tikinnextiaj ipan Biblia niman akin okijkuilo kuajli kimatstoya ika toTajtsin kikakiya, niman yejon melak okipaleui. Nomachiliaya más nisiuj itech toTajtsin niman yejon okipaleui makixiko tlen xkuajli okixnamik ipan inemilis (Salmo 116:1-9).
Tla kuajli tikneltokaj ika toTajtsin techkaki, nochipa tiknotsaskej. Matikitakan tlen ipan onochiuj Pedro, akin chanti norte de España. Ikoneuj omik ijkuak kipiaya 19 xiuitl. Ijkuak ijkon opanok, Pedro okijli toTajtsin kenon nomachiliaya niman miyekpa okitlajtlanili makiyolseui niman makipaleui. ¿Tlenon opanok? Pedro kijtoua: “Jehová onechnankili. ToTajtsin okintekitilti tokniuan akin imiuan tosentlaliaj, niman ijkon yejuamej onechyolchikaujkej nejua niman nosiuatsin”.
Miyekpa, toTajtsin technankilia ijkuak toamigos techyolchikauaj niman techpaleuiyaj.
Maski Pedro xok keman okitak ikoneuj, melak okinpaleui kinotsaskej toTajtsin. Isiuatsin, akin itoka María del Carmen, kilnamiki: “Ijkuak niknotsaya toTajtsin onechpaleui manikixnamiki yejuin tlen melak ouijtika. Nikmatstoya ika Jehová nechasikamatiya, pampa ijkuak niknotsaya niyolseuiya”.
Biblia niman tlen kijtouaj miyekej, techmachtia ika toTajtsin kema techkaki ijkuak tiknotsaj. San ika, xnochipa tenankilia. Kuakon, ¿tleka toTajtsin kemantika tenankilia niman kemantika ka?
a ToTajtsin itoka Jehová (Éxodo 15:3).