¿Tleka notlauelitalo?

Nochiuiyan melak notlauelitalo. ¿Tleka ijkon panoua? Kachtopa noneki tikasikamatiskej tlenon kijtosneki titetlauelitas, tleka sekimej peua tetlauelitaj niman kenon peua notlauelitaj.

¿Tlenon kijtosneki titetlauelitas?

Akin tetlauelita xkuajli kimita oksekimej, xkuajli imiuan nouika niman hasta xkimitasneki.

¿TLEKA SEKIMEJ PEUAJ TETLAUELITAJ?

Miyekej kintlauelitaj oksekimej ipampa tlen kichiuaj niman oksekimej ipampa ken kimixmatij. Kanaj kinemiliaj ika yejuamej kichiuaj tlen xkuajli noso ika yejuamej xkeman nopatlaskej. Kanaj kinemiliaj ika yejuamej xuejueyixtokej noso ika yejuamej akin kipeualtiaj tlauejli. Niman oksekimej tetlauelitaj pampa yakaj yokinchiuilijka tlen xkuajli noso pampa melak yotlajyouijkej.

¿KENON PEUA NOTLAUELITALO?

Kemantika sekimej kitlauelitaj yakaj akin nion xkixmatij. San matikonnemilikan yejuin, yakaj uelis peuas kitlauelitas yakaj san pampa ifamilia noso iamigos xkuajli tlajtouaj itech. Kuakon, ijkuak miyekej peuaj kijtouaj tlen xkuajli itech yakaj, miyekej noijki peuaj kitlauelitaj.

Yejuin techpaleuiya matikasikamatikan ika san totoka uelis yakaj peuas tiktlauelitaskej. San ika, ¿tlenon techpaleuis maka sa matitetlauelitakan? Kachtopa noneki tikasikamatiskej tlenon kichiua matitetlauelitakan. Matikitakan tlen Biblia techijlia.

BIBLIA TECHIJLIA TLENON KICHIUA MATITETLAUELITAKAN

Se recuadro kampa nesi kenon peua notlauelitalo. 1. Noijtoua tlen xmelauak ijkuak miyekej kinchiualtiaj oksekimej ipan redes sociales, televisión niman ipan okseki tlemach. 2. Ijkuak xkimixmatij akin oksekan ualeuaj, kenon onoskaltijkej noso tlenon kineltokaj. 3. Timomojtis tikpatlas noso tikpolos itlaj niman tikixnamikis itlaj tlen xkeman tikixnamikiya. 4. Ijkuak se tetlauelita xkuajli kimita oksekimej, techikoita niman kichiua tlen xkuajli.

TETLAUELITALISTLI XOPEUJ NIKAN IPAN TLALTIKPAKTLI. Biblia kijtoua ika se ángel yejua akin opeuj tetlauelita. Yejon ángel noixmati ken Satanás noso Diablo. Ijkuak opeuj teixnamiki, onokuep se temiktijketl. Pampa “yejua tlakajkayaua niman yejua imintataj on yejuan tlakajkayauaj”, yokichiuj mapano miyek tlen xkuajli niman yokichiuj ika miyekej manotlauelitakan (Juan 8:44; 1 Juan 3:11, 12). Biblia kijtoua ika Satanás melak tetlauelita, xteiknelia niman melak tlauelmiki (Job 2:7; Apocalipsis 12:9, 12, 17).

TITETLAUELITAJ PAMPA TITLAJTLAKOLEJKEJ. Kachtopa tlakatl akin onen ipan tlaltikpaktli, Adán, okichiuj ijkon ken Satanás, ika yejon, tejuamej titlajtlakolejkej (Romanos 5:12). Caín, ikoneuj Adán akin más ueyi katka, kitlauelitaya ikniuj, Abel, niman hasta okimikti (1 Juan 3:12). Melauak, tejuamej titetlasojtlaj niman titeikneliaj. San ika, pampa titlajtlakolejkej, kemantika titenexikolitaj niman toueyimatij, niman yejon kichiua matitetlauelitakan (2 Timoteo 3:1-5).

IJKUAK XTITEIJYOUIYAJ, TITETLAUELITAJ. Ipan tlaltikpaktli onka miyek tlen xkuajli, ika yejon, miyekej notlauelitaj. Diablo “ipan ima kimpiya nochimej on tlakamej de in tlaltikpaktli”, yejua ika, miyekej techikoitaj, teuijuikaltiaj, temojmojtiaj, tetlajyouiltiaj niman xteijyouiyaj (1 Juan 5:19).

Biblia xsan techijlia tlenon kichiua matitetlauelitakan noijki techijlia kenon uelis noyektlalis.