Tikchiuas tlen kuajli: Itlaj tlen tinochimej noneki ipan titlanemiliskej

Tla tejua tiknekiskia tias kampa xkeman tiauj, ¿tlenon tikchiuaskia?

1. 1. Tikchiuaskia tlen san tejua tiknemilia ika kuajli.

2. 2. Tiaskia ipan ojtli kampa oksekimej yauej.

3. 3. Timoyekanaskia ika GPS noso se mapa, noso tiktlajtoltiskia se moamigo akin kuajli kixmati ojtli.

Tla tejua tiktlapejpenia tikchiuas ijkon ken otikijtokej ipan kachtopa punto niman ika ome, uelis kanaj tajsis. San ika, xtajsis kampa tejua tiknekiya. San ika, tla tiktlapejpenia on ika yeyi, kuajli xmatsto ika kema tajsis kampa tiknekiya tias.

Uelis tikijtoskej ika tonemilis yeskia kentla ijkuak kanaj tiknekij tiaskej, tinochimej tiknekij tiknextiskej ojtli tlen techuikas kampa tiknekij: tiyolpakiskej. Niman para ompa tajsiskej, noneki tikitaskej tlenon tiktlapejpeniskej, niman para yejon noneki itlaj tlen kuajli techyekanas.

Maski seki tlen tiktlapejpeniaj ipan tonemilis xmás ueyi kijtosneki, seki kema. Ijkuak itlaj tiktlapejpeniaj, tikteititiaj tlen tikneltokaj noso tlen tiknemiliaj ika kuajli noso xkuajli. Nochi tlen tikchiuaj uelis techijtlakos noso techpaleuis tejuamej niman akin tikintlasojtlaj. Kemantika, noneki tiktlapejpeniskej tlenon tikchiuaskej itech yejuin:

• Sexo niman namiktilistli

• Xtitekajkayauas, tekitl niman tomin

• Ken tikimiskaltis mokoneuan

• Ken timouika iuan oksekimej

¿Kenon uelis kuajli tikmatstos ika tlen tiktlapejpenis itech yejuin kichiuas xyolpaki tejua niman mofamilia?

Tinochimej noneki totlajtoltiskej yejuin: “¿Tlenon nechpaleuis niktlapejpenis tlen kuajli?”.

Ipan yejuin revista tikitas tleka uelis tikneltokas ika Biblia mitspaleuis xmati tlen kuajli, niman kenon nochi yejon uelis mitspaleuis ipan monemilis.