Tikchiuas tlen kuajli: Tlen miyekej kinyekana

Miyekej kimatstokej ika onka seki tlemach tlen kuajli niman seki tlen xkuajli. Nochimej kimatstokej ika xkuajli ijkuak yakaj tenajnauiltia, ijkuak yakaj temiktia niman ijkuak yakaj kinnajnauiltia kokonej. Niman noijki, nochimej kuajli kitaj ijkuak yakaj kuajli tenotsa, teasikamati niman kichiua tlen kuajli. San ika ¿tlenon kinemiliaj itech sexo, tla kijtoskej tlen melauak noso ka, noso kenon kimiskaltiskej inkoneuan? Miyekej kinemiliaj ika kuajli maski san tlenon tiktlapejpenis tikchiuas. Ika yejon, miyekej san kichiuaj tlen yejuamej kinemiliaj ika kuajli noso tlen oksekimej kinemiliaj ika kuajli. San ika ¿nochipa kuajli tla tikchiuaj yejuin?

TLEN CADA SE KINEMILIA IKA KUAJLI

Miyekpa, ijkuak itlaj tiktlapejpeniaj tikchiuaskej, techyekana totlamachilis, yejua techijlia tlen kuajli niman tlen xkuajli (Romanos 2:​14, 15). Hasta kokonej kimatstokej ijkuak nochiua itlaj tlen xkinamiki, niman xkuajli nomachiliaj tla kichiuaj itlaj tlen xkuajli. Ijkuak tiuejueyixtiuej peua tikchiuaj ijkon ken tofamilia, ken akin imiuan tomachtiaj, ken tomaestros, ken kampa tiualeuaj niman tlen techmachtiaj ipan toreligión. Kuakon, ijkuak itlaj tiktlapejpeniaj tikchiuaskej, totlamachilis techijlia tla otikchiujkej ijkon ken yotechmachtijkej.

Totlamachilis uelis techpaleuis matiteasikamatikan, matitetlasojkamachilikan, matikchiuakan tlen kuajli niman matiteiknelikan. Noijki uelis techteltis maka matikchiuakan itlaj tlen uelis kinyolkokos akin tikintlasojtlaj, noso uelis kichiuas ika matipinauikan niman techtlajtlakolmakas.

¿Kuajli tla nochipa tikchiuaj tlen san tejuamej tiknemiliaj ika kuajli? Ijkuak telpochtli katka, Garrick okijto ika kichiuaskia ken yejua kuelitaskia. San ika, sakin okasikamat ika tla san yejua noyekanaskia, xtlaj ika kipaleuiskia. Yejua okijto ika xyolpakiya pampa opeuj auilnemi, tlauani, teuisoki niman opeuj kitekitiltia drogas.

TLEN OKSEKIMEJ KINEMILIAJ IKA KUAJLI

Maski totlamachilis techyekana, miyekpa tiktlapejpeniaj tikchiuaskej tlen oksekimej kinemiliaj ika kuajli. Tla ijkon tikchiuaj, miyek tiueliskej intech oksekimej niman itech tlen yejuamej kimatij. Ijkuak tikchiuaj tlen tochanejkauan, toamigos niman tlen oksekimej kinemiliaj ika kuajli, yejuamej peuaj techtlakaitaj.

¿Kuajli tla nochipa tikchiuaj tlen oksekimej kinemiliaj ika kuajli? Ijkuak ichpochtli katka, Priscila kichiuaya ijkon ken iamigos. Yejuamej xkitayaj tla xkuajli ijkuak yakaj noteka iuan yakaj maski xiuan nonamiktia. San ika, Priscila okitak ika xkiyolpaktiaya kichiuas tlen oksekimej kinemiliayaj ika kuajli. Yejua kijtoua: “Xniyolpakiya pampa nikchiuaya tlen oksekimej kichiuayaj. Oniktlapejpeni tlen xkuajli niman melak oninotlajyouilti”.

¿ONKA ITLAJ TLEN TECHPALEUIS MÁS KUAJLI MATIKTLAPEJPENIKAN TLEN TIKCHIUASKEJ?

Melauak ika ijkuak nonekis itlaj tiktlapejpeniskej, nonekis tikitaskej tlen tejuamej tiknemiliaj niman tlen oksekimej kinemiliaj. San ika, tla san ika yejon toyekanaj, xnochipa kuajli tonkisaskej. Kemantika, xueli tikitaj ika tlen tiktlapejpeniaj tikchiuaskej uelis techijtlakos noso kimijtlakos oksekimej (Proverbios 14:12). Noijki, maski tiknemiliaj ika kuajli tlen tikneltokaj noso tlen yotechmachtijkej, kanaj yejon xmelauak. Niman xtikmatij tla tlen tikneltokaj noso kineltokaj oksekimej uelis nopatlas. Miyekpa ijkon panoua. Miyek tlen yeuejkaui xkuajli kitayaj, aman kema kuajli kitaj. Niman onka seki tlemach tlen yeuejkaui kuajli noitaya, san ika, aman xkuajli noita.

¿Onka itlaj tlen uelis techyekanas niman ijkon tikmatiskej tlenon kuajli niman tlenon xkuajli? ¿Onka itlaj tlen techpaleuis matiktlapejpenikan tlen kuajli niman ijkon xtoyolkuepaskej ika tlen otikchiujkej?

Kema onka itlaj tlen techpaleuis nochipa matiktlapejpenikan tlen kuajli maski san kanon matiualeuakan noso maski san kanon matichantikan. Ipan okse tlamachtijli tikitaskej tlenon yejon tlen techpaleuis matiktlapejpenikan tlen kuajli ipan tonemilis.