¿Itikmatiya?

¿Ipan tlenon yaya eunuco etíope ijkuak Felipe okinisiui?

TLAJTOJLI ika griego “carreta” tlen notekitiltia ipan Biblia uelis notekitiltis para tlatlamantikej carretas (Hech. 8:​28, 29, 38). Nesi ika carreta tlen ipan yaya etíope xkatka kentla yejon carretas tlen kintekitiltiayaj soldados noso tlen kinkuiyaj kampa notlatlaniyaj, yej katka más ueyi. Matikitakan tleka ijkon tikijtouaj.

Tlakatl etíope melak ueyixtoya niman uejka yokistinenka. “Yejua ueyi tekiuaj katka yejuan nemiya ken tesorero ika on miyek tomin kipiyaya on siuatl itoka Candace yejuan tekiuaj katka ipan nochi iueyitlalpan Etiopía” (Hech. 8:27). Ijkuakon, Etiopía melak ueyi katka pampa peuaya kampa aman noixmati Sudán niman ontlamiya itsintlan Egipto. Maski yejuin etíope xnochipa okistinen ipan san noyejua carreta, kanaj ijkuak oyajka Jerusalén miyek tlemach kitkiya. Ipan kachtopa siglo notekitiltiayaj tlatlamantikej carretas, seki carretas tlen notekitiltiayaj tlapachiujtoyaj niman kinpiayaj naui ruedas. Se amoxtli tlen tlajtoua itech libro de Hechos, okijto: “Ipan yejon carretas más kuajli yayaj akin ompa tlejkouayaj, miyek tlemach ueliyaj kitkiyaj niman más uejka ueliyaj ajsiyaj” (Acts—An Exegetical Commentary).

Tlakatl etíope tlaamapoujtoya ijkuak Felipe okinisiui. Hechos 8:30 kijtoua: “Felipe okinisiuij niman okak ika nomachtiaya on amamoxtli de on tiotlajtojketl Isaías”. Seki carretas okinchijchiujkej para ompa teuikaskej niman xueliyaj chikauak notlalouayaj. Pampa etíope yaya ipan se carreta ken yejuin, yejua ueliya tlaamapoujtiaya niman Felipe ouel okajsito.

Tlakatl etíope “okitlajtlanilij Felipe para ma tlejko ipan icarreta, niman ma notlali iuan” (Hech. 8:31). Akin kuikaya carretas tlen notekitiltiayaj ijkuak notlatlaniyaj nonekiya ijkatias. San ika, carreta kampa yaya etíope más ueyi katka pampa hasta okijli Felipe iuan manotlali.

Ipampa tlen kijtoua Hechos capítulo 8 niman ipampa tlen yokinextijkej ixtlamatkej, aman ipan tlaixkopinaltin tlen uajnesij ipan toamatlajkuiloluan xok tiktlaliaj etíope ipan se carreta tlen kitekitiltiayaj soldados noso tlen kitekitiltiayaj ijkuak notlatlaniyaj, aman tiktlaliaj ipan se carreta tlen más ueyi.