Tlen notlajtoltiaj akin kitaj revistas
¿Akinomej on ángeles tlapejpeniltin akin noteneuaj ipan 1 Timoteo 5:21?
Apóstol Pablo ijkin okitlajkuilouili tlayekanketl Timoteo: “Nimitstlatkitia ixpan Dios niman toTEKO JesuCristo, niman imixpan on yektitokej ángeles tlapejpeniltin, xkintlakamati in tlanauatiltin. Maka san sekimej tikinpaleuis, nion maka yakaj tikchikoitas” (1 Tim. 5:21). ¿Akinomej on ángeles tlapejpeniltin?
Ipan yejuin tlaxelojli, Pablo xkinteneujtoya on 144,000 akin yaskej iluikak. ¿Tleka ijkon tikijtouaj? Pampa ijkuak Pablo okitlajkuilouili Timoteo, ne iluikak xenemiyaj apóstoles nion oksekimej tlapejpeniltin. Kuakon, on 144,000 xyejuamej on ángeles tlapejpeniltin (1 Cor. 15:50-54; 1 Tes. 4:13-17; 1 Juan 3:2).
Noijki, xkinteneujtika on ángeles akin xokitlakamatkej toTajtsin ijkuak opanok Apachiuilistli. Ijkon tikijtouaj pampa yejuamej okitlakamatkej Satanás, onochiujkej demonios niman onochiujkej itlauelikniuan Jesús (Gén. 6:2; Luc. 8:30, 31; 2 Ped. 2:4). Ika tlayekapan, Jesús kintsakuas 1,000 xiuitl niman sakin kinpopolos (Jud. 6; Apoc. 20:1-3, 10).
Ipan 1 Timoteo 5:21 kijtoua ika on ángeles tlapejpeniltin nemij iuan toTajtsin niman iuan Jesús. Kuakon, uelis tikijtoskej ika ipan yejon tlaxelojli noteneujtokej iluikaktekitkej akin melajkanemij niman kipaleuiya toTajtsin niman Jesús.
Melak miyekej nemij iluikaktekitkej akin melajkanemij (Heb. 12:22, 23). Niman xnochimej san noijki tekitl kichiuaj (Apoc. 14:17, 18). San seki matikonteneuakan. Sejpatsin, Jehová okinauati se iluikaktekitketl makinmikti 185,000 soldados asirios (2 Rey. 19:35). Jesús noijki okijto: “Nikinuajtitlanis noángeles para kinuajsentlaliskej niman kinkixtiskej intsajlan on tlakamej yejuan nikinmandaroua, nochimej on yejuan kichiuaj para oksekimej ma tlajtlakokan, niman on yejuan kichiuaj on tlen xkuajli” (Mat. 13:39-41). Niman kanaj sekimej iluikaktekitkej “kinsentlaliskej nochimej on yejuan Dios yokintlapejpenij” para yaskej iluikak (Mat. 24:31). Niman oksekimej ángeles yokinnauatijkej para matechtlajpiyakan, ijkon ken kijtoua Salmo 91:11 (Mat. 18:10; uelis tikitas Mateo 4:11 niman Lucas 22:43).
Kuakon, on ángeles tlapejpeniltin akin noteneuaj ipan 1 Timoteo 5:21 kanaj katkaj sekimej iluikaktekitkej akin kinpaleuijtoyaj tlanechikoltin. Ipan yejuin tlaxelojli Pablo tlajtojtoya itech tlayekankej niman kimijlijtoya nochimej tokniuan makintlakaitakan tlayekankej. Noijki, okimijli tlayekankej maka matechikoitakan ijkuak kichiuaskej intekiyo niman kuajli makinemilikan achto itlaj kitlapejpeniskej. ToTajtsin okichiuj ika Pablo makijkuilo yejuin pampa kineki matikmatikan ika tlayekankej tekititokej “ixpan Dios niman toTEKO JesuCristo, niman imixpan on yektitokej ángeles tlapejpeniltin”. Yejuin kijtosneki ika yejuamej kitstokej kenon tlayekankej kichiujtokej intekiyo ipan tlanechikoltin. Kuakon, uelis tikijtoskej ika nemij sekimej ángeles akin techtlajpiyaj, kitaj ken notenojnotsas niman kijliaj Jehová nochi tlen kitaj (Mat. 18:10; Apoc. 14:6).