Xchiua ken iluikaktekitkej

1, 2. a) ¿Tleka tikijtouaj ika iluikaktekitkej xijkon ken tejuamej? b) ¿Tlenon san noijki tikchiuaj niman tikpiyaj ken iluikaktekitkej?

IJKUAK Jehová omitsuajuikak ipan ikalpan, okinek xnemi imiuan ichanejkauan akin kiueyichiuaj. Akin ompa teuamej, melak tetlasojtlaj niman melak tlatlamantikej. Ompa xsan nopouaj tokniuan akin nemij ipan nochi tlaltikpaktli, yej noijki ompa nopouaj nochimej iluikaktekitkej (Dan. 7:​9, 10). Ijkuak tontlanemiliaj itech iluikaktekitkej, kanaj peua tiknemiliaj kenijki melak tlamantikej. Kanaj tiknemiliaj ika yejuamej más yeuejkaui okinchijchiujkej xken tlaltikpakchanejkej (Job 38:​4, 7). Noijki, más kojtikej, chipaujkej niman xtlajtlakolejkej xijkon ken tejuamej (Luc. 9:26).

² Aman tej, maski iluikaktekitkej tlamantikej, onka seki tlen san noijki tikchiuaj niman tikpiyaj. Ijkon ken yejuamej, tejuamej noijki ueli tikinteititiaj ikualneskayouan Jehová niman ueli san toselti tiktlapejpeniaj tlenon tikchiuaskej. Niman xsan yejon, tejuamej noijki tikpiyaj totoka, tlatlamantik ken titlanemiliaj niman tlatlamantik tekitl tlen tikchiuaj ipan ikalpan Jehová. Niman ijkon ken iluikaktekitkej, tejuamej noijki tikmatij ika noneki matechyekana Jehová (1 Ped. 1:12).

3. ¿Tlenon tiueliskej itech iluikaktekitkej?

³ Ken yotikitakej, onka seki tlen san noijki tikchiuaj ken iluikaktekitkej, ika yejon, tlen yejuamej kichiuaj uelis techyolchikauas niman miyek techmachtis. Ipan yejuin tlamachtijli, tikitaskej kenijki uelis tiyolyemankej yeskej ken iluikaktekitkej, titetlasojtlaskej, titlaxikoskej niman tikpaleuiskej tlanechikojli machipaujkaonia.

ILUIKAKTEKITKEJ YOLYEMANKEJ

4. a) ¿Kenijki kiteititiaj iluikaktekitkej ika yolyemankej? b) ¿Tleka iluikaktekitkej xnoueyimatij? (Salmo 89:7).

⁴ Iluikaktekitkej yolyemankej. Maski yejuamej miyek youelkej, melak kojtikej niman melak tlamachilisejkej, kichiuaj nochi tlen Jehová kinnauatia (Sal. 103:20). Yejuamej xkiteijlijtinemij nochi tekitl tlen kichiuaj niman xkitekitiltiaj inkojtilis para makinueyiteneuakan. Niman melak yolpakij ijkuak kichiuaj tlen Jehová kineki, maski sekimej xkeman kimatiskej kenijki intoka (Gén. 32:​24, 29; 2 Rey. 19:35).a Yejuamej xkinokauiliaj makinueyiteneuakan ipampa tlen kichiuaj, pampa kimatij ika san Jehová kinamiki makiueyiteneuakan. ¿Tleka iluikaktekitkej xnoueyimatij? Pampa melak kitlasojtlaj Jehová niman melak kitlakaitaj (xpoua Salmo 89:7).

5. ¿Kenijki okiteititi iluikaktekitketl ika yolyemanki ijkuak okimelajkatlali Juan? (Noijki xkita tlaixkopinajli).

⁵ Matikitakan ipan Biblia kampa nesi ika iluikaktekitkej melak yolyemankej. Kanaj ipan xiuitl 96, se iluikaktekitketl, akin xtikmatij kenijki itoka, okititi apóstol Juan se tlatlachalistli tlen melak temojkatlachialti (Apoc. 1:1). ¿Tlenon okichiuj Juan ijkuak okitak yejon tlatlachalistli? Onotlankuatelkets para kiueyichiuas yejon iluikaktekitketl, san ika, yejua xokinokauili niman ijkin okijli: “Maka ijkon xchiua. Nejua tej, san niitekichiuilijkau Dios, sano ijki ken tejua niman mokniuan […]. Tejua san Dios xmauistili” (Apoc. 19:10). Yejon iluikaktekitketl okiteititi ika melak yolyemanki pampa xokinek yejua makiueyiteneuakan, yejua nimantsin okijli Juan ika nonekiya san Jehová kiueyiteneuas. Niman yejua xokinemili tla más ueyixtoya xken Juan. Maski yejua youejkauj kitekichiuilia Jehová niman melak kojtik xijkon ken Juan, xonoueyimat niman okijli: “San niitekichiuilijkau Dios, sano ijki ken tejua”. Niman maski ononek kimelajkatlalis Juan, yejua xokajuak, yej okiyemankanots. Iluikaktekitketl kanaj okajsikamat ika Juan itech onotlankuatelketska pampa melak okimojkatlachialti tlen okitak.

6. ¿Kenijki uelis tiyolyemankej yeskej ken iluikaktekitkej?

⁶ ¿Kenijki uelis tiyolyemankej yeskej ken iluikaktekitkej? Tla xtikteijlijtinemij nochi tlen tikchiuaj ipan ikalpan Jehová niman tla xtikteititisnekij ika melak tiuelij tikchiuaj se tekitl (1 Cor. 4:7). Noijki, xnoneki tiknemiliskej ika más tiuejueyixtokej san pampa más yotiuejkaujkej tiktekichiuiliaj Jehová noso pampa tikpiyaj se tekitl ipan tlanechikojli. Ijkuak más tikpiyaskej tekitl ipan tlanechikojli, más noneki tikmachiliskej ika xtiuejueyixtokej (Luc. 9:48). Ijkon ken iluikaktekitkej, tejuamej tiknekij tikintekichiuiliskej oksekimej niman xtiknekij makinemilikan ika tejuamej más tiuejueyixtokej.

7. ¿Kenijki uelis tikteititiskej ika tiyolyemankej ijkuak titemelajkatlaliaj?

⁷ Noijki, uelis tikteititiskej ika tiyolyemankej ijkuak nonekis tiknotsaskej noso tikmelajkatlaliskej se tokniuj noso se tokoneuj. Maski kanaj kemantika nonekis timelajkatlajtoskej ijkuak yakaj tiknotsaskej, noneki san kualtsin titlajtoskej niman tikitaskej maka tikyolkokoskej, ijkon ken iluikaktekitketl okichiuj ijkuak okimelajkatlali Juan. Tla xtitoueyimatij, titemelajkatlaliskej ika Biblia, ika tetlakaitalistli niman ika tlasojtlalistli (Col. 4:6).

ILUIKAKTEKITKEJ KINTLASOJTLAJ TLALTIKPAKCHANEJKEJ

8. a) Ijkon ken kijtoua Lucas 15:​10, ¿kenijki kiteititiaj iluikaktekitkej ika kintlasojtlaj tlaltikpakchanejkej? b) ¿Tlen tekitl kichiuaj ipan tenojnotsalistli? (Noijki xkita tlaixkopinajli).

⁸ Iluikaktekitkej najmanaj inpampa tlaltikpakchanejkej niman kintlasojtlaj. Ika yejon, yejuamej melak pakij ijkuak se tlajtlakole noyolkuepa, kijtosneki, ijkuak se iborreguito Jehová akin yopoliujka oksejpa itech nokuepa. Noijki melak yolpakij ijkuak se tlaltikpakchane kixmati tlen melauak niman peua nopatla niman ijkon uelis kitekichiuilis toTajtsin (xpoua Lucas 15:10). Iluikaktekitkej noijki melak tepaleuiyaj ipan tenojnotsalistli (Apoc. 14:6). Maski yejuamej xtenojnotsaj ijkon ken tejuamej titenojnotsaj, kema techyekanaj niman ijkon matikinnextikan akin kinekij kixmatiskej Jehová. San ika, matikilnamikikan ika Jehová noijki kitekitiltia iespíritu santo ipan totenojnotsalis. Kuakon, xuelis tikmatiskej kemanon techpaleuiya se iluikaktekitketl matiknextikan se tlaltikpakchane (Hech. 16:​6, 7). Maski ijkon, tikmatstokej ika Jehová sajnoye kintekitiltia iiluikaktekitkauan, kuakon, ijkuak titenojnotsaj, uelis kuajli tikmatstoskej ika yejuamej ompa touan nemiskej para techpaleuiskej. (Xkita recuadro “Jehová okinnankili inteoyouan”).b

9. ¿Kenijki uelis titetlasojtlaskej ijkon ken iluikaktekitkej?

⁹ ¿Kenijki uelis titetlasojtlaskej ijkon ken iluikaktekitkej? Ijkuak yakaj oksejpa kiseliaj ipan tlanechikojli, matiyolpakikan ijkon ken iluikaktekitkej. Kuajli matikselikan niman matikititikan ika tiktlasojtlaj (Luc. 15:​4-7; 2 Cor. 2:​6-8). Niman tla titokojtiliaj chikauak titenojnotsaskej, tikchiujtoskej ken iluikaktekitkej (Ecl. 11:6). Noijki iluikaktekitkej techpaleuiyaj ijkuak titenojnotsaj, niman tejuamej noijki uelis tikinpaleuiskej tokniuan matenojnotsakan. ¿Uelis tontenojnotsaskej iuan yakaj akin kemach peujtika tenojnotsa noso uelis tikpaleuiskej matenojnotsa se tokniuj akin yeueuentsin noso akin kualo?

10. ¿Tlenon tiuelij itech tlen ipan opanok Sara?

¹⁰ ¿Niman tla aman xok ueli titenojnotsaj ijkon ken tikuelitaskiaj? Uelis tikpatlaskej ken titenojnotsayaj niman ijkon ok titopaleuijtoskej imiuan iluikaktekitkej ipan tenojnotsalistli. Matikitakan tlen ipan opanok tokniuj Sarac akin chanti India. Ijkuak yekipiaya kanaj 20 xiuitl ken precursora, okajsik se kokolistli niman nochipa nemiya ipan itlapech pampa xok ueliya nokuiteuaya. Yejua melak onajman pampa ijkon ipan nochiujtoya. San ika, yejua nochipa kiamapouaya iBiblia niman tokniuan melak okipaleuijkej niman okititijkej ika kitlasojtlayaj, niman yejon okipaleui oksejpa mayolpaki. Noijki, yejua okipatlak ken tenojnotsaya. Yejua xueliya tenojnotsaya ika cartas pampa ikokolis nion xkikauiliaya mayeuato, kuakon san tenojnotsaya ipan teléfono. Yejua opeuj komonnotsa akin komontaya, niman yejuamej kijliayaj kanaj akinomej kuelitaskiaj nomachtiskej Biblia. San ipan seki metstin, Sara yekinmachtijtoya 70 tlaltikpakchanejkej. ¡Melak miyekej katkaj, nion xnajxiliaya para uelis nochimej kinmachtis! Ika yejon, okimijli tokniuan sekimej makinmachtikan. Aman miyekej yopeuj yauej tlanechikoltin. Kuajli tikmatij ika iluikaktekitkej melak yolpakij pampa uelij nopaleuiyaj imiuan tokniuan akin melak nokojtiliaj tenojnotsaskej ijkon ken Sara.

ILUIKAKTEKITKEJ TLAXIKOUAJ

11. ¿Tleka tikijtouaj ika iluikaktekitkej techititiaj kenijki uelis titlaxikoskej?

¹¹ Iluikaktekitkej akin melajkanemij kuajli techititiaj kenijki uelis titlaxikoskej. Miyek xiuitl yononek kixikoskej kitaskej tlen melak xkuajli. Okitakej kenijki Satanás niman miyekej iluikaktekitkej akin kitekichiuiliayaj toTajtsin opeuj kixnamikij Jehová (Gén. 3:1; 6:​1, 2; Jud. 6). Biblia kijtoua ika se iluikaktekitketl onouisok iuan se demonio akin melak kojtik katka (Dan. 10:13). Noijki, desde ijkuak nemiyaj Adán niman Eva, iluikaktekitkej yokitakej ika san achijtsitsintin yokitlapejpenijkej kitekichiuiliskej Jehová. Maski ijkon, yejuamej melajkanemij niman kuajli kitekichiuilijtokej toTajtsin ika pakilistli. Yejuamej kimatstokej ika xok ueyi poliui ijkuak toTajtsin kikixtis nochi tlen xkuajli panoua.

12. ¿Tlenon techpaleuis matitlaxikokan?

¹² ¿Kenijki uelis titlaxikoskej ijkon ken iluikaktekitkej? Kanaj tejuamej noijki tikitaj tlen xkuajli nochiua noso kanaj sekimej techtlaueltokaj, san ika, ijkon ken iluikaktekitkej, tejuamej noijki kuajli tikmatij ika xok ueyi poliui ijkuak toTajtsin kipopolos nochi tlen xkuajli. Kuakon, ijkon ken iluikaktekitkej akin melajkanemij, noijki maka “ma tisiauikan para tikchiuaskej on tlen kuajli” (Gál. 6:9). Noijki, Jehová yotechijli ika techpaleuis matitlaxikokan (1 Cor. 10:13). Uelis tiktlajtlaniliskej matechmaka iespíritu santo pampa yejon techpaleuis matipakikan niman maka matitosiaujkauakan (Gál. 5:22; Col. 1:11). ¿Tlenon uelis tikchiuas tla mitstlaueltokaj? Xtlaneltoka itech Jehová niman maka xmomojti. Yejua nochipa mouan nemis niman mitskojtilis (Heb. 13:6).

ILUIKAKTEKITKEJ KIPALEUIYAJ TLANECHIKOJLI MACHIPAUJKAONIA

13. Ijkon ken kijtoua Mateo 13:​47-49, ¿tlen tekitl yokinmakakej iluikaktekitkej ipan yejuin itlamiyan tonaltin?

¹³ Jehová yokinmakak iluikaktekitkej se kualtsin tekitl ipan yejuin itlamiyan tonaltin (xpoua Mateo 13:​47-49). Miyekej tlaltikpakchanejkej kinektokej kikakiskej on kuajli tlajtojli. Miyekej nopatlaj niman ijkon kichiuaskej ken Cristo, san ika, sekimej xkinekij nopatlaskej. Iluikaktekitkej kinxelouaj “akin xkuajkualtin itech akin kuajkualtin”. Pampa ijkon kichiuaj, kipaleuiyaj tlanechikojli machipaujkaonia. San ika, yejon xkijtosneki ika tla yakaj xok touan nosentlalia, xok keman uelis uajnokuepas ipan tlanechikojli; nion xkijtosneki ika aman xok onias tlauejli ipan tlanechikojli. Aman tej, uelis kuajli tikmatstoskej ika iluikaktekitkej chikauak tekitij para tlapaleuiskej machipaujkaoniakan tlanechikoltin.

14, 15. ¿Kenijki uelis tikpaleuiskej tlanechikojli machipaujkaonia ijkon ken kichiuaj iluikaktekitkej? (Noijki xkimita tlaixkopinaltin).

¹⁴ ¿Kenijki uelis titlapaleuiskej machipaujkaonia tlanechikojli ijkon ken kichiuaj iluikaktekitkej? Noneki titokojtiliskej nochipa kuajli titouikaskej iuan Jehová. Ijkon tikchiuaj ijkuak tikintlapejpeniaj toamigos akin kitlasojtlaj Jehová niman ijkuak xtikchiuaj itlaj tlen uelis kijtlakos ken titouikaj iuan Jehová. Tla ijkin tikchiuaj, tikpaleuiskej tlanechikojli machipaujkaonia (Sal. 101:3). Noijki uelis tikinpaleuiskej tokniuan mamelajkanemikan itech Jehová. Matikonijtokan yejuin, ¿tlenon noneki tikchiuaskej tla tikmatij ika se tokniuj kichiujtika se ueyi tlajtlakojli? Pampa tiktlasojtlaj tokniuj, noneki tikijliskej matlajto imiuan tlayekankej. Tla ximiuan tlajtoua, noneki tejuamej tikimijliskej tlayekankej. Tiknekij ika yejon tokniuj akin xok chikaujtok itlaneltok nimantsin makipaleuikan (Sant. 5:​14, 15).

¹⁵ Teajman ika sekimej akin kichiuaj se ueyi tlajtlakojli noneki kinkixtiskej itech tlanechikojli. Ijkuak ijkon panoua, xok imiuan titosentlaliaj (1 Cor. 5:​9-13).d Yejuin kichiua ika tlanechikojli machipaujkaonia. Niman ijkuak xtitouikaj imiuan akin yokinkixtijkej itech tlanechikojli, tikimititijtokej ika tikintlasojtlaj, pampa yejon uelis kichiuas makitakan ika noneki nokuepaskej itech Jehová. Niman ijkuak oksejpa kinseliaj ipan tlanechikojli, melak tiyolpakij ijkon ken Jehová niman iluikaktekitkej (Luc. 15:7).

16. ¿Kenijki uelis tikchiuaskej ken iluikaktekitkej?

¹⁶ ¡Melak kualtsin ika Jehová techkauilia matitekitikan imiuan iluikaktekitkej niman intech matiuelikan! Matitokojtilikan matiyolyemankej ijkon ken yejuamej, matikintlasojtlakan tlaltikpakchanejkej, matitlaxikokan niman matitlapaleuikan machipaujkaonia tlanechikojli. Tla tikchiuaj ken iluikaktekitkej akin melajkanemij, uelis titopouaskej itech ichanejkauan Jehová akin nochipa kiueyichiuaskej.