Matitonejnemiltikan ika totlaneltok

1. ¿Tlenon kiyolpaktiaya Pablo?

XOK ueyi poliuiya para kimiktiskej apóstol Pablo. San ika, ijkuak Pablo kilnamikiya tlen okitlapejpenijka ipan inemilis, melak yolpakiya. Yejua okijto: “Yonitlan itekiu Dios niman nochipa onikejeu on tlaneltoktli” (2 Tim. 4:​6-8). Pablo okitlapejpeni chikauak kitekichiuilis Jehová ipan nochi inemilis, ika yejon, kuajli kimatstoya ika Jehová yolpakiya ipampa nochi tlen yokichiujka. Ijkon ken Pablo, tejuamej tiknekij tiktlapejpeniskej tlen kuajli ipan tonemilis niman ijkon tikyolpaktiskej Jehová. San ika ¿kenijki uelis tikchiuaskej yejuin?

2. ¿Tlenon kijtosneki timonejnemiltis ika motlaneltok?

² Sejpatipan, Pablo ijkin okijto itech niman intech tokniuan: “[Titonejnemiltiaj] itechkopa totlaneltok niman xitechkopa on tlen tikitaj” (2 Cor. 5:7). ¿Tlenon okijtosnek Pablo? Kemantika, ijkuak Biblia kijtoua ika yakaj nonejnemiltia, xkiteneujtika ijkuak yakaj nejnemi, yej kiteneujtika tlenon kichiua ipan inemilis. Kuakon, ijkuak noijtoua ika yakaj nonejnemiltia ika tlen kita, kijtosneki ika san tlanemilia itech tlen kita, tlen kikaki niman tlen kimachilia ijkuak kinemilia tlenon kichiuas. San ika, ijkuak yakaj nonejnemiltia ika itlaneltok, kachtopa kita tlenon kinemilia Jehová ijkuak itlaj kitlapejpenis. Niman tlen kichiua kiteititia ika kimatstika ika toTajtsin kiteochiuas niman ika melak kipaleuis tla kitlakamati tlen kijtoua ipan iTlajtol (Sal. 119:66; Heb. 11:6).

3. ¿Kenijki techpaleuiya tla nochipa titonejnemiltiaj ika totlaneltok? (2 Corintios 4:18).

³ Kema, kemantika tlen tikchiuaj tiktlapejpeniaj ipampa tlen tikitaj, tlen tikakij niman tlen tikmachiliaj. San ika, ijkuak nonekis tiktlapejpeniskej tlen melak ueyi kijtosneki, xnoneki san yejon tikitaskej pampa ueliskia xkuajli tonkisaskej. ¿Tleka? Pampa kemantika tlen tikitaj noso tlen tikakij, xmelauak. Kuakon tla san titonejnemiltiaj ika tlen tikitaj, ueliskia xtikchiuaskej tlen Jehová technauatia (Ecl. 11:9; Mat. 24:​37-39). San ika, tla titonejnemiltiaj ika totlaneltok, tlen tiktlapejpeniskej kiyolpaktis Jehová (Efes. 5:10). Tla tikchiuaj tlen toTajtsin kineki, tiyolseuiskej niman melak tiyolpakiskej (Sal. 16:​8, 9; Is. 48:​17, 18). Niman tla nochipa titonejnemiltiaj ika totlaneltok, uelis nochipa tinemiskej (xpoua 2 Corintios 4:18).

4. ¿Kenijki uelis tikmatiskej tla titonejnemiltiaj ika tlen tikitaj noso tla titonejnemiltiaj ika totlaneltok?

⁴ ¿Kenijki uelis tikmatiskej tla titonejnemiltiaj ika tlen tikitaj noso tla titonejnemiltiaj ika totlaneltok? San noneki ijkin titotlajtoltiskej: “¿Itech tlenon nitlanemilia ijkuak noneki itlaj niktlapejpenis? ¿San nitlanemilia itech tlen nikita noso nitlanemilia itech tlen Jehová nechijlia?”. Ipan yejuin tlamachtijli tikitaskej kenijki uelis titlaneltokaskej itech tlen Jehová technauatia ijkuak tiktlapejpeniskej se tekitl, ijkuak tiktlapejpeniskej akin iuan titonamiktiskej niman ijkuak itlaj technauatis ikalpan toTajtsin. Tikitaskej itech tlenon noneki titlanemiliskej para uelis tiktlapejpeniskej tlen más kuajli.

IJKUAK TIKTLAPEJPENISKEJ SE TEKITL

5. Ijkuak tiktlapejpeniskej se tekitl, ¿san noneki tikitaskej kech techtlaxtlauiliskej?

⁵ Tinochimej tiknekiskiaj tikpiyaskej se tekitl niman ijkon tikpiyaskej tlen ika titopanoltiskej niman matechpaleui matikinmakakan tochanejkauan tlen noneki (Ecl. 7:12; 1 Tim. 5:8). Kemantika, kampa sekimej tekitij más ueyi kintlaxtlauiliaj niman kinmajxilia para ika kintlakualtiskej inchanejkauan niman hasta ueli kejyeuaj seki intomintsin. San ika, kampa sekimej tekitij xmás ueyi kintlaxtlauiliaj niman san kinmajxilia para ika nopanoltijtiuej ipan yejon tonajli. Ika yejon, ijkuak tikitaj kanon titekitiskej, tikitaj kech tomin tiktlaniskej. San ika, tla yakaj san yejon kita, kijtosneki ika nonejnemiltia ika tlen kita.

6. ¿Kenijki tikteititiaj ika titonejnemiltiaj ika totlaneltok ijkuak tiktlapejpeniaj se tekitl? (Hebreos 13:5).

⁶ Tla titonejnemiltiaj ika totlaneltok, tikitaskej tla tekitl tlen tiknekij tikseliskej xkijtlakos ken touikaj iuan Jehová. Matitotlajtoltikan: “¿Ipan yejon tekitl nonekis nikchiuas tlen Jehová kitlauelita? ¿Xok más nias tlanechikoltin, xok más ninomachtis niman xok más nitenojnotsas pampa nonekis ninemis ipan notekiyo? ¿Yejon tekitl kichiuas uejkaujtipan manikinkaujteua nochanejkauan?” (Prov. 6:​16-19; Filip. 1:10). Tla ijkuak ijkin otimotlajtolti otikijto kema, más kuajli yes tla xtikselia yejon tekitl maski tla melak ouijtika tiknextis okse tekitl. Tlen tiktlapejpeniaj noneki kiteititis ika kuajli tikmatstokej ika Jehová nochipa techmakas tlen techpoloua pampa titonejnemiltiaj ika totlaneltok (Mat. 6:33; xpoua Hebreos 13:5).

7, 8. ¿Kenijki okiteititi se tokniuj akin chanti Sudamérica ika nonejnemiltia ika itlaneltok? (Noijki xkita tlaixkopinajli).

⁷ Tokniuj Javier,a akin chanti Sudamérica, kuajli kimatstok ika melak noneki matitonejnemiltikan ika totlaneltok. Yejua kijtoua: “Kampa nitekitiya kitejtemojtoyaj yakaj para kimakaskej se ueyi tekitl. Nejua oniktlajtlan manechmakakan yejon tekitl pampa ompa ueliskia niktlanis okpatipan más itech tlen niktlaniya niman melak nechyolpaktiskia tla nejua nechtlapejpeniayaj”. San ika, Javier kinekiya tekitis ken precursor. Yejua kijtoua: “Onechijlijkej tlen tonajli ueliskia nikonitas akin tlayekana kampa nitekitiya niman ijkon kitas tla ueliskia nechmakas yejon ueyi tekitl. Achto niaskia, onikchiuili teoyotl Jehová pampa nikmatstoya ika yejua kimati tlenon más kuajli yeskia. Nejua niknekiya nikpiyas yejon tekitl, san ika, xnikseliskia tla xnechkauiliskia más maniktekichiuili Jehová”.

⁸ Javier kijtoua: “Ijkuak onikitato akin ompa tlayekana, onechijli ika miyekpa nonekiskia más nitekitis. San kualtsin onikijli ika xniueliskia pampa nejua niktekichiuiliaya toTajtsin”. Javier xokiseli yejon tekitl, niman ome semana sakin onochiuj precursor. Niman, san no ipan yejon xiuitl, okinexti se tekitl kampa san seki tonaltin tekitiskia. Yejua kijtoua: “Jehová okinkak noteoyouan niman onechmakak se tekitl tlen nechkauiliaya manikchiua notekiyo ken precursor. Melak niyolpaki pampa nikpiya se tekitl tlen nechpaleuiya más maniktekichiuili Jehová niman manikinpaleui nokniuan”.

9. ¿Tlenon tiueli itech Trésor?

⁹ ¿Tlenon uelis tikchiuaskej tla tikitaj ika tekitl tlen tikpiyaj xtechkauilia matitonejnemiltikan ika totlaneltok? Matikitakan tlen ipan opanok tokniuj Trésor, akin chanti Congo. Yejua kijtoua: “Onechmakakej se tekitl tlen nochipa oniknek nikpiyas. Aman yexpatipan más opeuj niktlani tomintsin niman melak nechtlakaitayaj”. San ika, Trésor miyekpa xiaya tlanechikoltin pampa nonekiya más tiempo nokauas ipan itekiyo. Noijki kichiualtiayaj matekajkayaua niman ijkon kiyanaskej tlen xkuajli nochiuaya kampa tekitiya. Yejua kinekiya kikauas yejon tekitl, san ika, kimojtiaya tla xkinextiaya okse tekitl. ¿Tlenon okipaleui? Yejua kijtoua: “Tlen kijtoua Habacuc 3:​17-19 onechpaleui manikita ika maski xok niktlaniskia tlen niktlaniya ipan yejon tekitl, Jehová nechtlajpiyaskia. Kuakon onikauj notekiyo”. Yejua noijki kijtoua: “Miyekej akin intech titekitij kinemiliaj ika tla melak ueyi techtlaxtlauiliaj, tiknektoskej san tlenon tikchiuaskej, hasta tiknektoskej titekitiskej ipan yejon tiempo tlen tikuiskiaj para tinemiskej imiuan tochanejkauan noso para tikueyichiuaskej toTajtsin. Melak nipaki pampa oniktlapejpeni xnikijtlakos ken ninouika iuan Jehová niman imiuan nochanejkauan. Se xiuitl sakin, Jehová onechpaleui maniknexti se tekitl tlen nechpaleuiya manikkoua tlen ika ninopanoltis niman manikpiya tiempo para kuajli niktekichiuilis. Ijkuak tiktlapejpeniaj kachtopa tiktekichiuiliskej Jehová, kanaj kemantika xmás tikpiyaskej tomintsin, san ika, yejua nochipa techtlajpiyas”. Kema, tla tikneltokaj ika tlen techijlia Jehová techpaleuiya niman ika kichiuas tlen yotechijli, titonejnemiltiskej ika totlaneltok niman yejua techteochiuas.

IJKUAK TIKTLAPEJPENISKEJ AKIN IUAN TITONAMIKTISKEJ

10. ¿Kenijki ueliskia kiteititis yakaj ika xnonejnemiltia ika itlaneltok ijkuak kitlapejpenis akinon iuan nonamiktis?

¹⁰ Namiktilistli se itetlayokolil Jehová, ika yejon, timiyekej tiknekij titonamiktiskej. Kanaj ijkuak se tokniuj siuatl peua yakaj kuelita, kita kenijki kichiua yejon tokniuj, kenijki tlachia niman kenijki kixmatij. Noijki kita tla yejon tokniuj uelis kimakas tlen noneki, tla kinpiya ichanejkauan akin nonekis kintlajpiyas niman tla yolpaki ijkuak iuan nemi.b Maski yejuin kema noneki makita, yejua ueliskia xnonejnemiltis ika itlaneltok tla san yejon kita.

11. ¿Kenijki tikteititiaj ika titonejnemiltiaj ika totlaneltok ijkuak tiktlapejpeniskej iuan akinon titonamiktiskej? (1 Corintios 7:39).

¹¹ Jehová melak yolpaki ijkuak kita ika tokniuan tlakamej niman siuamej kichiuaj tlen yejua kimijlia ijkuak kitlapejpeniaj iuan akinon nonamiktiskej. Ken ipan 1 Corintios 7:​36, kimijlia ika noneki nochiaskej hasta ijkuak yopeuj más kuajli tlanemiliaj niman xsan kinemilijtokej yakaj iuan notekaskej. Jehová noijki kimijlia ika noneki kitaskej yakaj akin makinpiya kualneskayomej tlen noneki kinpiyas se kuajli teueuentsin noso se kuajli tesiuauj (Prov. 31:​10-13, 26-28; Efes. 5:33; 1 Tim. 5:8). Niman tla peua kinnotsa yakaj akin xkitekichiuilia Jehová, yejuamej xkiseliaj pampa kimatij ika san noneki nonamiktiskej “iuan se yejuan kineltoka toTEKO”, ijkon ken kijtoua 1 Corintios 7:39 (xpoua). Yejuamej kichiuaj nochi tlen Jehová kimijlia pampa kimatstokej ika yejua kinpaleuis ika inyojlo manemikan (Sal. 55:22).

12. ¿Tlenon tiueli itech Rosa?

¹² Matikitakan tlen ipan opanok tokniuj Rosa, se precursora akin chanti Colombia. Kampa tekitiya okixmat se tlakatl akin xiteixpantijkauj Jehová niman yejon tlakatl opeuj kuelita Rosa niman Rosa noijki opeuj kuelita. Yejua kijtoua: “Nesiya ika melak kuajli tlen kichiuaya. Melak tepaleuiaya kampa chantiya niman melak notlajpiaya. Melak nikuelitaya kenijki nechnotsaya. Nochipa oniknek ninonamiktis iuan yakaj ijkon ken yejua, san ika, yejua xkitekichiuiliaya Jehová”. Yejua noijki kijtoua: “Ouijtika onikitak nikijlis ika xniknekiya iuan nikistinemis pampa melak nechyoltilanaya. Ijkuak ijkon panotoya, nejua san noselti ninomachiliaya niman niknekiya ninonamiktis, san ika, xniknextiaya nion se tokniuj akin ueliskia iuan ninonamiktis”. Rosa xsan otlanemili itech tlen ueliya kitaya, yejua okinemili ika tla peuaya kistinemi iuan yejon tlakatl, kijtlakoskia ken nouika iuan Jehová. Kuakon xok okinots yejon tlakatl niman okitak kenijki uelis más kitekichiuilis Jehová. Sakin, okinotskej ipan Tlamachtijli tlen kiseliaj Akin Tenojnotsaj itech iTekiuajyo toTajtsin, niman aman yejua precursora especial. Yejua kijtoua: “Jehová yokichiuj ika noyoltsin melak mapaki”. Ijkuak itlaj melak techyoltilana, ouijtika tikitaj tikchiuaskej tlen Jehová kineki, san ika, nochipa kuajli tonkisaj ijkuak titokauiliaj matechyekana Jehová.

IJKUAK ITLAJ TECHNAUATIS IKALPAN TOTAJTSIN

13. ¿Kenijki yakaj ueliskia kiteititis ika nonejnemiltia san ika tlen kita ijkuak ikalpan toTajtsin itlaj technauatia?

¹³ Ikalpan Jehová miyekpa technauatia tlen techpaleuiya matiktekichiuilikan Jehová. Kemantika techijlia intechkopa tlayekankej, tlayekankej ipan circuito, sucursal noso Grupo akin Tlayekana. San ika ¿tlenon tikchiuaskiaj tla kemantika xtikajsikamatij tlen technauatiaj? ¿Tiknemiliskiaj ika xtechpaleuis tlen technauatiaj? ¿San tikitaskiaj tlen xkuajli kichiuaj akin technauatijtokej yejon? Tla ijkon tikchiuaskiaj, tikteititijtoskiaj ika titonejnemiltiaj san ika tlen tikitaj.

14. ¿Tlenon techpaleuis matitonejnemiltikan ika totlaneltok ijkuak ikalpan Jehová itlaj technauatis? (Hebreos 13:17).

¹⁴ Ijkuak titonejnemiltiaj ika totlaneltok, tikneltokaj ika Jehová kiyekantika ikalpan niman ika kuajli kimatstika tlen tikixnamiktokej. Ika yejon, nimantsin titetlakamatij niman ika toyojlo tikchiuaj (xpoua Hebreos 13:17). Tikmatstokej ika tla titetlakamatij, titlapaleuiskej ika ipan totlanechikol tinochimej kuajli matitouikakan (Efes. 4:​2, 3). Niman maski tokniuan akin technauatiaj tlajtlakolejkej, tikmatstokej ika Jehová techteochiuas pampa titetlakamatij (1 Sam. 15:22). Niman tikneltokaj ika tla yejua kita ika noneki itlaj nopatlas, kipatlas ijkuak kitas ika yenoneki (Miq. 7:7).

15, 16. ¿Tlenon okipaleui Kevin manonejnemilti ika itlaneltok? (Noijki xkita tlaixkopinajli).

¹⁵ Tlen inpan opanok tokniuan akin chantij Perú techmachtia ika melak kuajli tla tikneltokaj ika tlen technauatia ikalpan Jehová melak techpaleuiya. Ne Perú, tlajtouaj español, san ika, sekimej tlajtouaj okseki tlajtoltin, ken tlajtojli quechua. Miyek xiujtin, tokniuan kintejtemojtinemiyaj akin tlajtouaj quechua kampa tenojnotsayaj. San ika, tokniuan okimijlijkej ika xok ueliskia kintejtemoskej tlaltikpakchanejkej ijkon ken kichiuayaj pampa tekiuajkej okinpatlakej seki tlanauatiltin (Rom. 13:1). Kuakon miyekej tokniuan opeuj notlajtoltiaj tla ken aman kinnauatiayaj, kinpaleuiskia makinnextikan akin tlajtouaj quechua. Maski ijkon, tokniuan otetlakamatkej, niman Jehová okiteochiuj tlen kichiuayaj para kinnextiskej akin tlajtouaj yejon tlajtojli.

¹⁶ Kevin, se tlayekanketl akin nemi ipan tlanechikojli ika tlajtojli quechua, noijki kinemiliaya ika xmás tepaleuiskia ken aman kintejtemoskiaj akin tlajtouaj quechua. Yejua kijtoua: “Ninotlajtoltiaya ‘Niman aman, ¿kenijki tikinnextiskej akin tlajtouaj quechua?’”. ¿Tlenon okichiuj Kevin? Yejua kijtoua: “Onitlanemili itech tlen kijtoua Proverbios 3:5. Noijki onitlanemili itech tlen okichiuj Moisés. Jehová okijli makinkixti israelitas itech Egipto niman makinuika ipan mar Rojo, kampa nesiya ika xueliskia makisaskej itech egipcios. Maski ijkon, Moisés otetlakamat, niman Jehová okiteochiuj Moisés pampa okichiuj se milagro tlen melak otemojkatlachialti” (Éx. 14:​1, 2, 9-11, 21, 22). Kevin okichiuj ken tokniuan okinnauatijkej, ¿kenijki okisato? Yejua kijtoua: “Melak temojkatlachialti ken Jehová otechteochiuj. Ijkuak xnopatlaya ken tikintejtemouayaj akin tlajtouaj quechua, melak nonekiya tinejnemiskej niman kemantika san setsin noso san ometsin tikinnextiayaj, san ika, aman tiauej kampa más miyekej nemij. Aman más miyekej uelij tikinnojnotsaj, ueli oksejpa tikonmontaj niman miyekej tikinmachtiaj. Niman más miyekej yopeujkej yauej tlanechikoltin”. Kuajli nesi ika ijkuak titonejnemiltiaj ika totlaneltokil, Jehová nochipa techteochiua.

17. ¿Tlenon otiuel ipan yejuin tlamachtijli?

¹⁷ Yotikitakej yeyi tlemach kampa uelis tikchiuaskej tlen Jehová kineki matikchiuakan. San ika, yejuin noneki nochipa tikchiuaskej, ken ijkuak tiktlapejpeniskej ika tlenon titoyolpaktiskej, hasta kanon titomachtiskej niman kenijki tikimiskaltiskej tokoneuan. Ijkuak itlaj nonekis tiktlapejpeniskej, xsan noneki titlanemiliskej itech tlen ueli tikitaj, yej noneki titlanemiliskej itech tlen Jehová technauatia niman ika yejua techijlia ika techtlajpiyas. Noijki noneki tikitaskej tla tlen tiknekij tiktlapejpeniskej xkijtlakos ken iuan titouikaj Jehová. Tla ijkon tikchiuaj, “tikistinemiskej nochipa ika itokayo toTajtsin Jehová, xkeman tijkauaskej” (Miq. 4:​5, TNM).