“Xtlapejpenikan aman akinon nenkitekipanoskej”

1. Tla melauak tiknekij tiyolpakiskej, ¿tlenon noneki tikchiuaskej, niman tleka? (Isaías 48:​17, 18).

TOTAJ iluikakchane melak techtlasojtla niman kineki matiyolpakikan aman niman ika tlayekapan (Ecl. 3:​12, 13). Melak kualtsin ken otechchijchiuj pampa okichiuj melak miyek matiuelikan matikchiuakan. San ika, yejua xotechchijchiuj para san no tejuamej matoyekanakan nion matiuelikan matikitakan tlenon kuajli noso tlenon xkuajli (Ecl. 8:9; Jer. 10:23). Yejua kimatstika ika tla tiknekij melauak tiyolpakiskej, noneki tiktekichiuiliskej niman tiktlakamatiskej (xpoua Isaías 48:​17, 18).

2. ¿Tlenon kineki Satanás matikneltokakan, niman tlenon yokichiuj Jehová para kiteititis ika Satanás san tekajkayaua?

² Satanás kineki matiknemilikan ika uelis tiyolpakiskej tla san no tejuamej titoyekanaj niman tla xtechyekana Jehová (Gén. 3:​4, 5). Jehová yokinkauili tlaltikpakchanejkej san no yejuamej manoyekanakan niman ijkon kiteititis ika Satanás san tekajkayaua. Aman melak kuajli nesi ika tlaltikpaktekiuajkej xuelij tlayekanaj. San ika, Biblia kinteneua miyekej tlakamej niman siuamej akin melak oyolpakkej pampa okitekichiuilijkej Jehová. Niman itech nochimej akin oyolpakkej, Jesús yejua akin más oyolpak. Ipan yejuin tlamachtijli, kachtopa tikitaskej tleka Jesús okitlapejpeni kitekichiuilis Jehová. Sakin tikitaskej tleka san toTaj iluikakchane kimelaua matiktekichiuilikan. Niman sa ika tlami tikilnamikiskej tleka otiktlapejpenijkej tiktekichiuiliskej Jehová.

TLEKA JESÚS OKITLAPEJPENI KITEKICHIUILIS JEHOVÁ

3. ¿Tlenon kinekiya Satanás kimakas Jesús, niman tlenon okitlapejpeni Jesús?

³ Ijkuak Jesús onen ipan tlaltikpaktli, ononek kitlapejpenis akinon kitekichiuilis. Ijkuak kemach yonoapolaktijka, Satanás okijli ika kimakaskia nochi tekiuajyomej tlen onokej ipan tlaltikpaktli tla kiueyichiuaya maski san sejpatsin. Jesús ijkin okinankili: “¡Xuiya Satanás! Pampa ijkuilijtika: ‘Xueyichiua moTajtsin Jehová niman san yejua xtekichiuili’” (Mat. 4:​8-10). ¿Tleka Jesús okitlapejpeni kitekichiuilis Jehová? Matikitakan.

4, 5. ¿Tleka Jesús okitlapejpeni kitekichiuilis Jehová?

⁴ Jesús okitlapejpeni kitekichiuilis iTaj, Jehová, pampa kitlasojtla ika nochi iyojlo (Juan 14:31). Noijki pampa kimatstok ika yejon tlen kuajli (Juan 8:​28, 29; Apoc. 4:11). Jesús noijki kimatstok ika Jehová yejua otechmakak tonemilis, ika melak miyek techtlayokolia niman ika uelis itech titlaneltokaskej (Sal. 33:4; 36:9; Sant. 1:17). Jehová nochipa okijli Jesús tlen melauak, niman nochi tlen Jesús kipiaya iTaj okimakak (Juan 1:14). San ika, Satanás san yokichiuj ika tlaltikpakchanejkej mamikikan. Noijki melak tekajkayaua, tenexikolita niman san itech tlanemilia (Juan 8:44). Jesús kuajli kimixmatstoya Jehová niman Satanás, ika yejon, nion achijtsin xokinemili kixnamikis Jehová ijkon ken Satanás okichiuj (Filip. 2:​5-8).

⁵ Jesús noijki okitlapejpeni kitekichiuilis Jehová pampa kimatstoya nochi tlen kuajli panoskia tla melajkanemiya (Heb. 12:2). Yejua kimatstoya ika ijkon kichipauaskia itoka iTaj niman ueliskia kipopolos tlajtlakojli niman mikilistli tlen Diablo yokichiuj maonia.

TLEKA KIMELAUA MATIKTEKICHIUILIKAN JEHOVÁ

6, 7. a) ¿Tleka miyekej xkitekichiuiliaj Jehová? b) ¿Tleka kinamiki Jehová matikueyichiuakan?

⁶ Ipan yejuin tonaltin, miyekej xkitekichiuiliaj Jehová pampa xkixmatij. Xkimatij tlen kualneskayomej kinpiya Jehová niman nochi tlen yokichiuj inpampa. Ijkon katkaj tlaltikpakchanejkej akin apóstol Pablo okinnojnots ne Atenas (Hech. 17:​19, 20, 30, 34).

⁷ Pablo okimijli akin chantiyaj Atenas ika toTajtsin akin melauak “nochimej kinmaka iminnemilis, inmijyo niman nochi tlen onka”. Noijki okimijli ika ipampa, “tikpiyaj tonemilis, titoliniaj niman tiyoltokej”. Niman okintomili ika toTajtsin “san se tlakatl okitekitilti para kinchijchiuas nochimej” tlaltikpakchanejkej. Kuakon, pampa yejua otechchijchiuj, san yejua noneki tikueyichiuaskej (Hech. 17:​25, 26, 28).

8. ¿Tlenon xkeman kichiuaskia Jehová?

⁸ Jehová ueliskia techchiualtis matiktekichiuilikan pampa yejua toTlachijchiujkauj niman san yejua melak ueyixtok. San ika, ¡yejua xkeman ijkon kichiuaskia! Yejua yej kineki ika nochimej tlaltikpakchanejkej makinekikan nochipa iuan nouikaskej (1 Tim. 2:​3, 4). Ika yejon, yejua melak miyek ken yotechititi ika melauak nemi niman ika melak techtlasojtla. Niman Jehová techmachtia para ijkon uelis tikimijliskej oksekimej tlen kualtsin kichiuas inpampa niman kenijki kichiuas yejon (Mat. 10:​11-13; 28:​19, 20). Noijki, yejua yokintlali tlanechikoltin kampa uelis tikueyichiuaskej niman kampa tokniuan tlayekankej uelis techpaleuiskej ika tlasojtlalistli (Hech. 20:28).

9. ¿Kenijki kiteititia Jehová ika melak tetlasojtla?

⁹ Jehová melak tetlasojtla, niman ijkon tikijtouaj pampa tikitaj tlenon kichiua inpampa akin xkinekij kineltokaskej ika nemi. Desde yeuejkaui, miyekej kitlapejpeniaj san no yejuamej noyekanaskej. Maski ijkon, Jehová kinmaka nochi tlen noneki para manemikan niman mayolpakikan pampa yejua melak yolkuajli (Mat. 5:​44, 45; Hech. 14:​16, 17). Jehová kinpaleuiya makinpiyakan inamigos niman inchanejkauan akin melak kintlasojtlaj, niman uelij kinpiyaj inkoneuan, uelij tekitij niman uelij yolpakij ipan innemilis (Sal. 127:3; Ecl. 2:24). Kuajli nesi ika toTaj iluikakchane tinochimej techtlasojtla (Éx. 34:6). Aman matikitakan tleka yotiktlapejpenijkej tiktekichiuiliskej Jehová niman kenijki techteochiua.

TLEKA TIKTLAPEJPENIAJ TIKTEKICHIUILISKEJ JEHOVÁ

10. a) ¿Tleka tiktekichiuiliaj Jehová? (Mateo 22:37). b) ¿Kenijki yomitspaleui pampa Jehová melak teijyouiya? (Salmo 103:​13, 14).

¹⁰ Ijkon ken Jesús, tejuamej tiktekichiuiliaj Jehová pampa tiktlasojtlaj ika nochi toyojlo (xpoua Mateo 22:37). Ijkuak más tikixmatij Jehová, más tikinuelitaj ikualneskayouan. San se matikonteneuakan, Jehová kipiya ijyouilistli. Ijkuak israelitas xokitlakamatkej, yejua okintlajtlanili itech manokuepakan niman maka sa makichiuakan tlen xkuajli (Jer. 18:11). Jehová kilnamiktok ika tejuamej san titlalpoktin (xpoua Salmo 103:​13, 14). ¿Xmelak ika más tikneki tiktekichiuilis Jehová ijkuak tontlanemilia itech kenijki melak teijyouiya niman itech okseki ikualneskayouan?

11. ¿Tleka tiktekichiuiliaj toTaj iluikakchane?

¹¹ Noijki tiktekichiuiliaj Jehová pampa tikmatstokej ika yejon tlen kuajli (Mat. 4:10). Noijki, pampa tikmatstokej tlen kualtsin panoua ijkuak timelajkanemij itech toTajtsin: titlapaleuiyaj manochipaua itoka Jehová, tikteititiaj ika Satanás se tlakajkayaujketl niman tikyolpaktiaj toTaj Jehová. Niman tla aman tiktlapejpeniaj tiktekichiuiliskej Jehová, uelis nochipa tiktekichiuiliskej ipan xochitlalpan (Juan 17:3).

12, 13. ¿Tlenon tiuelij itech Jane niman Pam?

¹² Desde tipipitikej, uelis melak tiktlasojtlaskej Jehová, niman yejon tlasojtlalistli xtlamis maski mapano miyek xiujtin. Matikitakan tlen inpan opanok omemej ikniujtin akin intoka Jane niman Pam.a Ijkuak iteixpantijkauan Jehová okimijlijkej intajuan tla kinekiyaj nomachtiskej Biblia, yejuamej xokinekkej, san ika, okimijlijkej Jane niman Pam ika kinkauiliskiaj manomachtikan tla imiuan yayaj teopan itlamiyan semana. Jane kipiaya 11 xiuitl niman Pam kipiaya 10 xiuitl ijkuak opeujkej nomachtiaj Biblia. Jane kijtoua: “Tlen onechmachtijkej iteixpantijkauan Jehová itech Biblia onechpaleui maka manikchiua ken akin imiuan ninomachtiaya. Nejua xoniknotlalili drogas nion xoniauilnen”.

¹³ Ijkuak oichpochtiakej, opeuj tenojnotsaj. Seki xiuitl sakin, onochiujkej precursoras niman noijki kintlajpiayaj intajuan akin youeuentsintiakaj. Jane kijtoua: “Yonikitak ika Jehová nochipa kintlajpiya iamigos pampa ‘kimixmatstikaj yejuan melauak iyaxkauan’, ijkon ken kijtoua 2 Timoteo 2:19”. Kema, Jehová kintlajpiya akin kitlasojtlaj niman kitekichiuiliaj.

14. ¿Kenijki uelis titlapaleuiskej manochipaua itoka Jehová? (Noijki xkimita tlaixkopinaltin).

¹⁴ Tejuamej tiknekij titlapaleuiskej kuajli manochipaua itoka Jehová. Xontlanemili itech yejuin. Tejua tikpiya se motlasojkaikniuj akin melak kuajli tenotsa, teajsikamati niman kuelita kitemakas tlen kipiya. San ika, se tonajli tijkaki ika yakaj kijtoua ika akin iuan timouika melak xkuajli tlen kitechiuilia niman tekajkayauani. ¿Tlenon tikchiuaskia? ¿Xmelak ika tikijtoskia ika xmelauak tlen kijtouilia? Noijki ijkon, ijkuak yakaj tijkakij ika kijtoua tlen xmelauak itech Jehová, nimantsin tikijliaj ika xmelauak tlen kijtouilijtok niman tikijliaj tlen melauak (Sal. 34:1; Is. 43:10). Ika tlen tikijtouaj niman ika tlen tikchiuaj, tikteititiaj ika tiknekij tiktekichiuiliskej Jehová ika nochi toyojlo.

15. ¿Katlejua tlateochiualistin okinseli Pablo pampa okitlapejpeni kitekichiuilis Jehová? (Filipenses 3:​7, 8).

¹⁵ Tejuamej tiknektokej tikpatlaskej tlen tiknekiyaj tikchiuaskej ipan tonemilis para tikyolpaktiskej Jehová niman para más tiktekichiuiliskej. Apóstol Pablo ijkon okichiuj, yejua katka se judío akin melak ueyixtoya, san ika, okinek kikauas yejon para kichiuas ken Cristo niman kitekichiuilis Jehová (Gál. 1:14). Pablo okinseli miyek tlateochiualistin pampa ijkon okichiuj: melak oyolpak niman tekiuajtis iuan Cristo ne iluikak. Pablo xonoyolkuep pampa okitlapejpeni kitekichiuilis Jehová, niman tejuamej noijki xtoyolkuepaskej (xpoua Filipenses 3:​7, 8).

16. ¿Tlenon techmachtia tlen okichiuj Julia? (Noijki xkimita tlaixkopinaltin).

¹⁶ Tla nochipa tikitaj kenijki uelis más tiktekichiuiliskej Jehová, yejua techteochiuas aman niman ika tlayekapan. Matikitakan tlenon okichiuj tokniuj Julia. Ijkuak pitentsin katka, tlakuikaya ipan teopan. Yejua melak kualtsin tlakuikaya niman se tonajli se akin tlakuikaya ópera okikak niman opeuj kimajmachtia kenijki más kualtsin tlakuikas. Nion xouejkauj ijkuak miyekej opeuj kixmatij niman opeuj tlakuika kampa tlakuikaj akin melak kimixmatstoyaj. Ijkuak yejua nomachtijtoya ipan se escuela de música tlen melak kixmatstoyaj, se akin iuan nomachtiaya okinojnots itech toTajtsin niman okijli ika toTajtsin itoka Jehová. Xuejkaujtipan, Julia opeuj nomachtia Biblia okpatipan ipan se semana. Sakin, okitlapejpeni kitekichiuilis Jehová niman xokitlapejpeni tlakuikaketl yes. Ouijtika okitak ijkon kichiuas. Yejua kijtoua: “Miyekej nechijliayaj ika san niknenpolojtoya ken kualtsin nitlakuikaya, san ika, nejua niknekiya niktekichiuilis Jehová”. Yopanok 30 xiuitl ika Julia ijkon okichiuj, ¿tlenon kinemilia aman? Julia kijtoua: “Melak niyolpaki, niman kuajli nikmatstika ika Jehová nechmakas nochi tlen noyoltsin kineki ika tlayekapan” (Sal. 145:16).

MAKA XKAJKAUA IKA TIKTEKICHIUILIA JEHOVÁ

17. a) ¿Tlenon noneki kichiuaskej akin ok xkitekichiuiliaj Jehová, niman tleka? b) ¿Tlenon kimatstokej akin yokitlapejpenijkej kitekichiuiliskej toTajtsin?

¹⁷ Sa achijtsin poliui ijkuak tlapopoliuis. Apóstol Pablo ijkin okijkuilo: “Semi saniman uajlas on yejuan ika onkaj uajlas, niman yejua xnouejkauas” (Heb. 10:37). Yejon kijtosneki ika xok onka ueyi tiempo para tlaltikpakchanejkej makitlapejpenikan tla kitekichiuiliskej Jehová (1 Cor. 7:29). Niman akin yotiktlapejpenijkej tiktekichiuiliskej Jehová, tikmatstokej ika maski tikixnamikiskej tlen xkuajli, san panos.

18. ¿Tlenon kinekij Jehová niman Jesús matikchiuakan?

¹⁸ Jesús okinyolchikauj tlaltikpakchanejkej manochiuakan inomachtijkauan niman nochipa makitokakan (Mat. 16:24). Kuakon, tla yotiuejkaujkej tiktekichiuiliaj Jehová, nochipa ijkon matikchiujtokan. Kema, noneki tokojtiliskej niman ijkon xkeman tijkauaskej ika tiktekichiuiliaj Jehová, niman yejon kemantika ouijtika. Maski ijkon, ¿xmelak ika hasta ipan yejuin tonaltin ueli tiyolpakij niman Jehová techteochiua pampa tiktekichiuiliaj? (Sal. 35:27).

19. ¿Tlenon tiuelij itech Gene?

¹⁹ Miyekej kinemiliaj ika xuelis tiyolpakis tla tiktekichiuilia Jehová. Tla titelpochtli, ¿tiknemilia ika itlaj tikmopolouilijtika pampa tiktekichiuilia toTajtsin? Se telpochtli akin itoka Gene kijtoua: “Niknemiliaya ika akin tiiteixpantijkauan Jehová miyek xtechkauiliaj matikchiuakan. Niknemiliaya ika nejua san niaya tlanechikoltin niman nontenojnotsaya, san ika, telpokamej akin imiuan oninoskalti yayaj iluimej, kistinemiyaj imiuan ichpokamej noso noyolpaktiayaj ika videojuegos kampa nouisokilo”. ¿Tlenon opanok pampa Gene ijkon tlanemiliaya? Yejua kijtoua: “Opeuj nikchiua seki tlen xkuajli ijkon ken sekimej telpokamej. Se tiempo onechyolpakti ijkon nikchiuas, san ika, nikmachiliaya ika xmelauak niyolpakiya. Ika yejon, opeuj niknemilia tlenon kijtoua Biblia niman kenijki tonkisas tla tiktlakamati tlen ompa noteneua. Kuakon, oniktlapejpeni niktekichiuilis Jehová ika nochi noyojlo. Nikmachilia ika desde ijkuakon, Jehová yokinnankili nochi noteoyouan”.

20. ¿Tlenon tiknekij tikchiuaskej?

²⁰ Se salmista ijkin okitlakuikili Jehová: “Sanoyej kipiyaj paktli on yejuan tejua yotikintlapejpenij para ma chantitij mochan, ipan motiopan” (Sal. 65:4). Ijkon ken Josué, ika nochi toyojlo ijkin matikijtokan: “Nofamilia niman nejua tiktekipanoskej toTEKO” (Jos. 24:15).