Tlenon techmachtia tlen okijto Jacob ijkuak yemikiskia (parte 1)

1, 2. Ijkuak yemikiskia Jacob, ¿tlenon okichiuj, niman tleka? (Noijki xkita tlaixkopinajli).

YOPANOK kanaj 17 xiuitl ika Jacob nemiya Canaán niman oyaj Egipto imiuan ichanejkauan (Gén. 47:28). Ijkuak oajsik Egipto, melak oyolpak pampa oksejpa okitak ikoneuj, José, akin melak kitlasojtlaya, niman nochimej ichanejkauan oksejpa san sekan nemiyaj. San ika, aman Jacob kimati ika yemikis, ika yejon, kimijlia nochimej ikoneuan makitatij pampa kineki itlaj kimijlis (Gén. 49:28).

² Ipan yejon tonaltin, ijkuak tajtli yemikiskia, kinsentlaliaya nochimej ichanejkauan niman ijkon kimijlis tlenon nonekiya kichiuaskej tla yomik (Is. 38:1). Kemantika, ijkuakon kimijliaya akinon kitekitlalis makinyekana.

3. Ijkon ken kijtoua Génesis 49:​1, 2, ¿tlenon okimijli Jacob ikoneuan?

³ (Xpoua Génesis 49:​1, 2). Ijkuak Jacob okinsentlali ikoneuan, xokimijli tlen miyekej tajtin kimijliayaj inkoneuan. Jacob teotlajtojketl katka, niman Jehová okitekitilti para makijto tlen inpan panoskia ikoneuan niman inchanejkauan. Kuakon, Jacob okimijto teotlajtoltin ijkuak okinsentlali inkoneuan.

4. ¿Tlenon tikitaskej ipan yejuin tlamachtijli? (Noijki xkita recuadro “Ichanejkauan Jacob”).

⁴ Ipan yejuin tlamachtijli tikitaskej tlenon okimijli Jacob nauimej ikoneuan: Rubén, Simeón, Leví niman Judá. Ipan okse tlamachtijli, tikitaskej tlenon okimijli on oksekimej chikueyimej itelpokauan. Jacob okijto tlenon inpan panoskia ikoneuan niman inuejkakoneuan, akin sakin nochiuaskiaj kalpan Israel. Ijkuak tikitstiaskej tlen ipan opanok kalpan Israel, tikitaskej ika melauak onochiuj tlen okijto Jacob. Niman techmachtis kenijki uelis más tikyolpaktiskej toTaj iluikakchane, Jehová.

RUBÉN

5. ¿Kanaj tlenon kichiaya Rubén makijli itaj?

⁵ Jacob kachtopa otlajto iuan Rubén niman okijli: “Tejua Rubén, tinoyenkuiyokoneu” (Gén. 49:3). Pampa Rubén yenkuiyotl katka, kanaj kichiaya kiselis okpatipan más itech tlen kiseliskiaj ikniuan. Kanaj noijki kichiaya ika Jacob makijli ika aman yejua kinyekanaskia nochimej ichanejkauan niman sakin ikoneuan nopanoltilijtiaskiaj yejon tekitl.

6. ¿Tleka Rubén xok kinamikiya kiselis tlen kiseliaya se yenkuiyotl? (Génesis 49:​3, 4).

⁶ San ika, Rubén xok kinamikiya kiselis tlen kiseliaya se yenkuiyotl (1 Crón. 5:1). ¿Tleka? Pampa sakin ika Raquel omik, Rubén onotekak iuan Bilhá, itlakpasiuauj itaj. Bilhá katka itlakeual Raquel, isiuauj Jacob akin más okitlasojtlak (Gén. 35:​19, 22). ¿Tleka Rubén onotekak iuan Bilhá? Inan Rubén katka Lea, okse isiuauj Jacob. Pampa Raquel yomikka, kanaj Rubén okinemili ika tla notekaya iuan Bilhá, Jacob kitlauelitaskia Bilhá niman más kitlasojtlaskia inan, Lea. Noso kanaj Rubén kuelitaya Bilhá niman xouel onotelti para iuan notekas. Xtikmatij tleka ijkon okichiuj Rubén, san ika, Jehová niman Jacob sajnoye xokuelitakej tlen okichiuj (xpoua Génesis 49:​3, 4).

7. ¿Tlenon ipan opanok Rubén niman iuejkachanejkauan? (Noijki xkita recuadro “Teotlajtojli tlen okijto Jacob ijkuak yemikiskia”).

⁷ Jacob okijli Rubén: “Tejua xok takatstias”. Niman ijkon opanok. Xkanaj nesi tla se iuejkakoneuj Rubén onochiuj tekiuaj, teopixki noso teotlajtojketl. San ika, Jacob ok okitak Rubén ken ikoneuj, niman sakin iuejkakoneuan Rubén onochiujkej se tribu ipan kalpan Israel (Jos. 12:6). Rubén yokiteititijka ika kinpiaya kualtsitsintin kualneskayomej, niman nesi ika xok keman oksejpa oauilnen (Gén. 37: 20-22; 42:37).

8. ¿Tlenon tiuelij itech tlen ipan onochiuj Rubén?

⁸ ¿Tlenon tiuelij? Matitokojtilikan toteltiskej ijkuak itlaj tikileuiyaj niman maka matiauilnemikan. Ijkuak tikpiyaskej se tetlatlatalistli, kachtopa matiknemilikan kenijki tlen tikchiuaskej uelis kiyolkokos Jehová, tochanejkauan niman oksekimej. Noijki, maka matikilkauakan tlen kijtoua Biblia: “Tlen kitôkas sen tlakatl, sano yejua kipixkas” (Gál. 6:7). Noijki, tlen ipan onochiuj Rubén techititia ika Jehová melak teiknelia. Maski yejua xkipopolos tlajyouilistli tlen tikpiyaskej ipampa tlen xkuajli otikchiujkej, kema techteochiuas tla titoyolkuepaj noso tla titokojtiliaj tikchiuaskej tlen kuajli.

SIMEÓN NIMAN LEVÍ

9. ¿Tleka Jacob okimijli Simeón niman Leví ika xokuelitak tlen okichiujkej? (Génesis 49:​5-7).

⁹ (Xpoua Génesis 49:​5-7). Sakin, Jacob okinnots Simeón niman Leví. Tlen Jacob okimijli, okiteititi ika xokuelitak tlen okichiujkej. Seki xiuitl achto, Siquem, se tlakatl akin chantiya Canaán, okinajnauilti Dina, ichpoch Jacob. Nochimej ikoneuan Jacob melak okualankej pampa ijkon okichiuilijkej imikniuj. San ika, Simeón niman Leví xokiteltijkej intlauel. Ikoneuan Jacob okinkajkayaujkej Siquem niman nochimej tlakamej akin chantiyaj Canaán niman okimijlijkej ika imiuan yolseujtoskej tla kinochiuiliayaj circuncisión, niman yejuamej okinekkej kinochiuiliskej circuncisión. San ika, ijkuak ok nokokojtoyaj, Simeón niman Leví “oyajkej ipan on ueyikalpan niman ika iminespada okinmiktijkej nochimej on tlakamej pampa xouelkej oteixnamikej” (Gén. 34:​25-29).

10. ¿Kenijki onochiuj teotlajtojli tlen Jacob okimijli Simeón niman Leví? (Noijki xkita recuadro “Teotlajtojli tlen okijto Jacob ijkuak yemikiskia”).

¹⁰ Jacob melak okikualani ika Simeón niman Leví otemiktijkej. Okimijli ika chajchayaujtoskiaj ipan nochi kalpan Israel. Niman yejon onochiuj 200 xiuitl sakin, ijkuak kalpan Israel okalak ipan Tlajli tlen Jehová yokimijlijka kinmakas. Ikoneuan Simeón okinmakakej tlaltin tlen chajchayaujtoyaj ipan tlajli tlen okinmakakej ikoneuan Judá (Jos. 19:1). Niman ikoneuan Leví okinmakakej 48 kalpamej tlen chajchayaujtoyaj ipan nochi kalpan Israel (Jos. 21:41).

11. ¿Tlenon kuajli okichiujkej iuejkakoneuan Simeón niman Leví?

¹¹ Iuejkakoneuan Simeón niman Leví xokichiujkej ijkon ken yejuin omemej ikniujtin. Miyekej levitas kuajli okiueyichiujkej Jehová. Ijkuak Jehová okimakak Tlanauatijli Moisés ipan tepetl Sinaí, miyekej israelitas opeujkej kiueyichiuaj se uakaxkonetl tlachijchiujtli ika oro. San ika, levitas xijkon okichiujkej, yejuamej okipaleuijkej Moisés maka sa manochiua yejon tlajtlakojli (Éx. 32:​26-29). Jehová okinmakak tlakamej levitas se kualtsin tekitl: tekitiyaj ken teopixkej (Éx. 40:​12-15; Núm. 3:​11, 12). Niman tlakamej itech itribu Simeón oteixnamikkej imiuan tlakamej itech itribu Judá ijkuak kinotlatkitijtoyaj Tlajli tlen Jehová yokimijlijka kinmakas, niman ijkon okichiujkej tlen Jehová kinekiya (Juec. 1:​3, 17).

12. ¿Tlenon tiuelij itech tlen okichiujkej Simeón niman Leví?

¹² ¿Tlenon tiuelij? Noneki tikteltiskej totlauel. ¿Xmelak ika techkualania ijkuak techchiuiliaj tlen xkuajli noso ijkuak kichiuiliaj tlen xkuajli yakaj akin tiktlasojtlaj? (Sal. 4:4). San ika, matikilnamikikan ika xtikyolpaktiskej Jehová tla nimantsin titlaueltlajtojtiuetsij noso itlaj tiktechiuilijtiuetsij (Sant. 1:20). Tla se tokniuj noso maski xtokniuj techchiuilia tlen xkuajli, tejuamej titokojtiliaj tikchiuaskej ken Biblia techijlia. Ijkuak ijkon tikchiuaj, xtikijtouaj niman xtikchiuaj tlen uelis teyolkokos (Rom. 12:​17, 19; 1 Ped. 3:9). Niman onka okse tlen tiuelij. Tla motajuan kichiuaj tlen xkuelita Jehová, xkilnamiki ika tejua xnoneki noijki ijkon tikchiuas. Maka xnemili ika xuelis tikchiuas tlen kuajli niman ika Jehová xmitsselia. Yejua mitspaleuis xchiua tlen kuajli niman mitsteochiuas tla ijkon tikchiua.

JUDÁ

13. ¿Kanaj tleka Judá kimojtiaya tlen kijliskiaj?

¹³ Aman Jacob kinotsaskia Judá. Kanaj Judá kimojtiaya tlen kijliskia itaj pampa yokikakka tlen yokimijlijka ikniuan akin más yeuejueyimej. Yejua noijki miyekpa onopopolo. Ijkuak Simeón niman Leví okinmiktitoj Siquem niman nochimej tlakamej akin chantiyaj Canaán, yejua noijki teuan otlakijkixtito (Gén. 34:27). Noijki otlapaleui ijkuak okinemakakej José ken tlakeuajli niman teuan okikajkayauj itaj (Gén. 37:​31-33). Sakin, onotekak iuan isiuamon, Tamar, pampa okinemili ika katka se “siuaauilnenki” (Gén. 38:​15-18).

14. ¿Tlenon okijlijkej Judá, niman tlenon kuajli yokichiujka? (Génesis 49:​8, 9).

¹⁴ San ika, Jehová okichiuj ika Jacob makiueyiteneua Judá niman makijto ika iuejkakoneuan inpan nochiuaskia tlen kuajli (xpoua Génesis 49:​8, 9). Judá yokiteititijka ika kinekiya kitlajpiyas itaj akin youeuentsintiaka. Noijki okikneli ikniuj, Benjamín, niman okinek kimanauis (Gén. 44:​18, 30-34).

15. ¿Kenijki onochiuj teotlajtojli tlen okijto Jacob itech Judá?

¹⁵ Jacob okijto ika Judá kinyekanaskia ikniuan, san ika, yejon teotlajtojli xnimantsin nochiuaskia. Kanaj 200 xiuitl sakin, ikoneuan Judá oyakatstiajkej ijkuak israelitas okiskej Egipto niman oyajkej ipan tlaluaktli para ajsiskej ipan Tlajli tlen Jehová yokimijlika kinmakas (Núm. 10:14). Seki xiujtin sakin, tlakamej itech itribu Judá yejuamej akin kachtopa okimixnamikitoj cananeos niman ijkon kinotlatkitiskej tlajli tlen yokimijlijkaj kinmakaskej (Juec. 1:​1, 2). Miyekej tekiuajkej katkaj itech itribu Judá niman David yejua akin kachtopa okitlapejpenijkej ken tekiuaj. San ika, xsan yejon opanok.

16. ¿Kenijki onochiuj teotlajtojli tlen tiknextiaj ipan Génesis 49:10? (Noijki xkita recuadro “Teotlajtojli tlen okijto Jacob ijkuak yemikiskia”).

¹⁶ Jacob okiteajsikamachilti ika se iuejkakoneuj Judá tekiuajtiskia niman ika itekiuajyo xsan panoskia (xpoua Génesis 49:10). Niman Jesucristo yejua on tekiuaj. Se iluikaktekitketl ijkin okijto itech Jesús: “ToTajtsin Jehová kichiuas manemi ken Rey kampa itaj David tlanauatia” (Luc. 1:​32, 33). Niman Jesús noijki kixmatij ken “León” akin ualeua itech itribu Judá (Apoc. 5:5).

17. ¿Kenijki uelis tikixkopinaskej Jehová?

¹⁷ ¿Tlenon tiuelij? Jehová nochipa san kita tlen kuajli kichiuaj itekipanojkauan. Yejua okiteochiuj Judá maski miyekpa onopopolo. Kanaj ikniuan Judá omojkatlachixkej niman notlajtoltiayaj tleka Jehová kiteochiujtoya. Xtikmatij tla ijkon otlanemilijkej, san ika, kema tikmatij ika Jehová okiteochiuj Judá pampa okitak tlen kuajli kichiuaya. ¿Kenijki uelis tikixkopinaskej Jehová? San matikitakan tlen kuajli kichiuaj tokniuan. Ijkuak se tokniuj kiselis se tekitl ipan ikalpan toTajtsin, kanaj uelis tiknemiliskej ika xkinamiki kiselis yejon tekitl. San ika, noneki tikilnamikiskej ika Jehová yolpaki ipampa tlen kuajli kichiua yejon tokniuj.

18. ¿Tleka noneki titlamachiaskej?

¹⁸ Tlen ipan onochiuj Judá noijki techmachtia ika noneki titlamachiaskej. Jehová nochipa kichiua tlen kijtoua, san ika, xnochipa kichiua ken tejuamej tiknekiskiaj niman ijkuak tiknekiskiaj. Itribu Judá xnimantsin opeuj kiyekana ikalpan toTajtsin. San ika, yejuamej okintlakamatkej akin Jehová yokintlalijka para makiyekanakan ikalpan, ken Moisés, Josué niman tekiuaj Saúl. Yejuamej ualeuayaj itech iuejkakoneuan Leví, Efraín niman Benjamín. Tejuamej noijki ijkon matikchiuakan, matikintlakamatikan akin Jehová yokintlali para makiyekanakan ikalpan (Heb. 6:12).

19. ¿Tlenon yotiuelkej itech Jehová?

¹⁹ ¿Tlenon yotiuelkej itech tlen Jacob okimijli on kachtopa nauimej ikoneuan ijkuak yemikiskia? Kachtopa, ika toTajtsin xkita “on tlen tlakamej kitaj” (1 Sam. 16:7). Ika ome, ika yejua melak teijyouiya niman tetlapojpoluiya. Yejua xkineki matikchiuakan tlen xkuajli, san ika, xkichia ika maka keman matitopopolokan. Yejua hasta kinteochiua akin yokichiujkaj tlen melak xkuajli, san ika, yonoyolkuepkej niman nokojtiliaj kichiuaskej tlen kuajli. Ipan okse tlamachtijli tikitaskej tlenon okimijli Jacob oksekimej ikoneuan.