¿Uelis techpaleuis tlen kachtopa otechmachtijkej itech Biblia?

1. ¿Kenijki otimomachili ijkuak opeuj timomachtia Biblia?

TLEN kachtopa otechmachtijkej itech Biblia melak yotechpaleui ipan tonemilis. San matikonteneuakan yejuin, ijkuak otiuelkej ika toTajtsin itoka Jehová opeuj iuan touikaj (Is. 42:8). Niman melak otiyolseujkej ijkuak otikmatkej ika akin yomijkej xok tlajyouiyaj (Ecl. 9:10). Niman ijkuak otikmatkej ika toTajtsin kikuepas se xochitlalpan yejuin tlaltikpaktli, xok sa tiknemilijtoyaj tlen ueliskia topan panos ika tlayekapan pampa otikasikamatkej ika uelis nochipa tinemiskej niman xsan 70 noso 80 xiuitl (Sal. 37:29; 90:10).

2. ¿Kenijki tikmatij ika tokniuan akin chikauak intlaneltok ok ueliskia kinpaleuis tlen ouelkej ijkuak opeuj nomachtiaj Biblia? (2 Pedro 1:​12, 13).

² Maski tla yotiuejkaujkej ika tomachtiaj, maka matikilkauakan ika tlen kachtopa otechmachtijkej itech Biblia melak ueyi kijtosneki. Apóstol Pedro okimijkuilouili ika ome icarta tokniuan akin chikauak kipiayaj intlaneltok (xpoua 2 Pedro 1:​12, 13). Pedro kinekiya kinyolchikauas tokniuan pampa ipan tlanechikojli nemiyaj sekimej akin xkuajkualtin niman akin temachtiayaj tlen xmelauak. Yejuamej kinekiyaj ika tokniuan makitlalkauikan Jehová (2 Ped. 2:​1-3). Pampa kinekiya kinpaleuis mamelajkanemikan, okimilnamikti seki tlen yonomachtijkaj.

3. ¿Tleka melak noneki matitlanemilikan itech tlen otiuelkej ijkuak opeuj tomachtiaj Biblia? Xkijto se neskayotl.

³ Ijkuak más chikajtiuj totlaneltok, uelis okseki tiueliskej itech tlen kachtopa otechmachtijkej itech Biblia. Matikonteneuakan yejuin. Se nantli akin melak ueltok tlakualchiua niman ichpoch akin kemach nomachtijtika san noyejua kitekitiltiaj tlen ika tlakualchiuaj. San ika, pampa nantli youejkauj tlakualchiua, uelis nomajmachtis okseki tlakuajli niman sa noyejua kitekitiltia tlen ika tlakualchiuani. Noijki ijkon, akin kemach nomachtijtokej Biblia uelis kinpaleuis seki textos niman seki tlen temachtia Biblia, san ika, akin youejkauj tiktekichiuiliaj Jehová uelis okseki tiueliskej itech tlen kachtopa otechmachtijkej. ¿Tleka? Pampa desde ijkuak otoapolaktijkej kanaj itlaj yonopatlak ipan tonemilis noso kanaj yotikselijkej seki tekitl ipan ikalpan toTajtsin. Tla titlanemiliaj itech tlen otiuelkej ijkuak opeuj tomachtiaj Biblia niman itech tlen aman tikixnamiktokej, uelis okseki tiueliskej. Ipan yejuin tlamachtijli, tikitaskej tlenon uelis nomachtiskej tokniuan akin youejkauj kitekichiuiliaj Jehová itech yeyi tlemach tlen otiuelkej ijkuak opeuj tomachtiaj Biblia.

JEHOVÁ YEJUA AKIN TOTLACHIJCHIUJKAUJ

4. ¿Kenijki yotechpaleui pampa tikmatij ika Jehová okichijchiuj nochi tlen onka?

⁴ Tikmatstokej ika tlaltikpaktli niman nochi tlen ipan onka, yakaj okichijchiuj akin melak kojtik niman tlamachilise. Hebreos 3:4 kijtoua: “Dios yejua okichijchiu nochi tlajtlamach tlen onkaj”. Niman pampa toTajtsin otechchijchiuj, melak kuajli techixmatstok. San ika, xsan yejon, yejua melak techtlasojtla niman kimati tlenon más techpaleuis. Pampa yotikmatkej ika Jehová okichijchiuj nochi tlen onka melak yotechpaleui niman kichiua ika toyojlo matinemikan.

5. ¿Tlenon techmachtia pampa Jehová yejua otlachijchiuj? (Isaías 45:​9-12).

⁵ Tikmatiskej ika Jehová yejua akin otechchijchiuj techpaleuiya matiyolyemankej. Matitlanemilikan itech Job. Yejua okijto seki tlen xmelauak itech Jehová, san itech tlanemilijtoya niman kinekiya kiteititis ika yemelak tlen kijtouaya. San ika, Jehová okilnamikti ika yejua akin más ueyixtika (Job 38:​1-4). Pampa Jehová ijkon okilnamikti Job, okipaleui maka makijto ika Jehová kichiua tlen xkuajli, pampa yejua nochipa kichiua tlen kuajli niman melajki. Sakin teotlajtoketl Isaías okijkuilo yejuin: “Sokitl xkijlia [on konchiketl]: ‘¿Tlinon tikchijchiua’”? (xpoua Isaías 45:​9-12).

6. ¿Tleka melak kuajli tla titlanemiliaj itech toTlachijchiujkauj? (Noijki xkimita tlaixkopinaltin).

⁶ Se tokniuj akin youejkauj kitekichiuilia Jehová uelis san yejua kuajnemilis tlen kita ika kuajli, xok kitas tlen kijtoua Biblia niman xkitlajtlanilis Jehová makipaleui (Job 37:​23, 24). Niman para maka ijkon ipan panos, noneki kixelos tiempo niman tlanemilis itech kenijki toTlachijchiujkauj, Jehová, melak tlamachilise niman ueyixtok (Is. 40:22; 55:​8, 9). Yejuin kipaleuis mayolyemanki niman kuajli makimatsto ika Jehová más kuajli tlanemilia xijkon ken yejua.

7. ¿Tlenon okipaleui Rahela makiseli tlen kemach onopatlak ipan ikalpan toTajtsin?

⁷ Se tokniuj akin chanti Eslovenia niman itoka Rahela, pampa tlanemilia ika Jehová yejua akin otlachijchiuj melak yokipaleui makiseli tlen kemach yokipatlak ikalpan toTajtsin. Rahela kijtoua: “Kemantika ouijtika nikita nikselis tlen yokitlapejpenijkej tokniuan akin tlayekanaj. Ijkuak kemach onikitak se tokniuj akin kipanoltijtoya tlamachtijli kipiaya itentson, xkuajli onikitak, maski yonikitaka video itech informe 8 tlen okis ipan 2023. Kuakon, oniknots Jehová niman okitlajtlanili manechpaleui manikseli yejuin tlen yonopatlaka”. Rahela okasikamat ika toTlachijchiujkauj nochipa kuajli kiyekana ikalpan. Tla tejua mitstekiyomaka tikselis ijkuak ikalpan toTajtsin techijlia ika más kuajli itlaj yokasikamat noso techijlia itlaj matikchiuakan, xxelo tiempo niman xtlanemili itech kenijki melak kojtik niman tlamachilise toTlachijchiujkauj (Rom. 11:​33-36).

TLEKA TOTAJTSIN KITEKAUILIA MATITLAJYOUIKAN

8. ¿Kenijki yotechpaleui tikmatiskej tleka toTajtsin kitekauilia matitlajyouikan?

⁸ ¿Tleka toTajtsin kitekauilia matitlajyouikan? Pampa sekimej xkimatij yejuin, kualanij iuan toTajtsin noso xok kineltokaj ika nemi (Prov. 19:3). San ika, tejuamej yotiuelkej ika toTajtsin xyejua akin kichiua matitlajyouikan, titlajyouiyaj pampa titlajtlakolejkej. Noijki, yotiuelkej ika pampa Jehová yotlamachix, miyekej youel yokixmatkej niman yokimatkej ika yejua kipopolos nochi tlen techtlajyouiltia (2 Ped. 3:​9, 15). Pampa yotikasikamatkej yejuin, yotechyolseui niman yokichiuj más itech matonisiuikan Jehová.

9. ¿Kemanon noneki tomachtiskej tleka Jehová kitekauilia matitlajyouikan?

⁹ Tikmatij ika noneki titlamachiaskej hasta ijkuak Jehová makipopolo nochi tlen techtlajyouiltia. San ika, ijkuak tikpiyaskej tlauejli, techchiuiliskej itlaj tlen xkinamiki noso tla miki se tochanejkauj noso ijkin ipan nochiua akin tikixmatij, ueliskia totlajtoltiskej tleka Jehová xkipopoloua nochi tlen techtlajyouiltia (Hab. 1:​2, 3). Ijkuak ijkon topan nochiujtos, kuajli tla tomachtiaj tleka Jehová kinkauilia matlajyouikan akin kipiyaj kuajli inyojlo (Sal. 34:19).a Noijki, uelis tiknemiliskej ika Jehová yokijto kipopolos nochi tlen techtlajyouiltia.

10. ¿Tlenon yokipaleui Anne ijkuak omik inan?

¹⁰ Ijkuak tikasikamatij tleka toTajtsin kitekauilia matitlajyouikan, techpaleuiya matitlaxikokan. Anne, akin chanti ne isla de Mayotte, tlen nokaua océano Índico, kijtoua: “Xiuejkaui, nonan omik, yejon okichiuj melak maninoyolkoko. San ika, melak yonechpaleui pampa nikilnamiki ika Jehová xyejua akin techtlajyouiltia. Jehová kineki kipopolos nochi tlen kichiua matitlajyouikan niman kinyolitis akin tikintlasojtlaj. Ijkuak nitlanemilia itech nochi yejuin, hasta nechmojkatlachialtia ken niyolseui”.

11. Pampa yotikmatkej tleka toTajtsin kitekauilia matitlajyouikan, ¿Kenijki yejon techpaleuiya matiknekikan matitenojnotstokan?

¹¹ Ijkuak tikasikamatij tleka toTajtsin kitekauilia matitlajyouikan, noijki techpaleuiyaj matiknekikan matitenojnotstokan. Tikmatij ika Jehová yotlamachix pampa kineki ika akin noyolkuepaj, mamakisakan. Sakin ika Pedro otlajto itech yejuin tlen yotikonteneujkej, okijto ika noneki kuajli matiknemilikan tlenon tikchiuaskej para ijkon tichipaujkanemiskej niman tikueyichiuaskej toTajtsin (2 Ped. 3:11). Niman ijkuak titenojnotsaj tikueyichiujtokej toTajtsin. Ijkon ken Jehová, tejuamej noijki tikintlasojtlaj akin tikinnojnotsaj niman tiknekij ika manemikan ipan yenkuik tlaltikpaktli. Jehová tlamachixtika niman ijkon akin nemij kampa titenojnotsa noijki makiueyichiuakan. Melak xyolpaki pampa ueli tikpaleuiya Jehová niman pampa tikinpaleuiya akin tikinnojnotsa, makixmatikan toTajtsin achto ika tlapopoliuis (1 Cor. 3:9).

YETINEMIJ ITLAMIYAN TONALTIN

12. Ijkuak tikitaj ika yenochiujtika tlen yokijtojka Biblia itech itlamiyan tonaltin, ¿kenijki techpaleuiya yejon?

¹² Biblia kuajli kijtoua kenijki yeskiaj tlaltikpakchanejkej itlamiyan tonaltin (2 Tim. 3:​1-5). Ijkuak tikitaj tlen xkuajli kichiuaj tlaltikpakchanejkej, kuajli nesi ika yenochiujtika tlen yokijtojka Biblia. Niman ijkuak tikitaj kenijki más xkuajli tlen kichiuaj tlaltikpakchanejkej, yejon techpaleuiya más matikneltokakan ika Biblia kijtoua tlen melauak (2 Tim. 3:​13-15).

13. ¿Tlenon noneki matotlajtoltikan? (Lucas 12:​15-21).

¹³ Ijkuak tikasikamatij ika yetinemij itlamiyan tonaltin noijki techpaleuiya matikchiuakan tlen más noneki niman kuajli matiktekitiltikan totiempo. Jesús okijto itlaj tlen techpaleuis kuajli matiktekitiltikan totiempo niman yejuin tiknextiaj ipan Lucas 12:​15-21 (xpoua). ¿Tleka noijtoua ika yejon tlakatl akin kipiaya tomin xtlamachilise katka? Pampa yejua kichiujtoya tlen xnoneki. Yejon tlakatl kisentlalijtoya “miyek tlemach pero ixpan toTajtsin” xtlaj kipiaya. Niman ¿tleka nonekiya kuajli makitekitilti itiempo? Pampa toTajtsin okijli ika yejon yeuajli mikiskia. ¿Tlenon techmachtia yejuin? Ika pampa sa achijtsin poliui ijkuak yetlapopoliuis, melak noneki matotlajtoltikan yejuin: “¿Tlen yonikijto nikchiuas kiteititia ika kuajli niktekitiltia notiempo? ¿Tlenon nikinyolchikaua nokoneuan makichiuakan? ¿Ken niktekitiltia nokojtilis, notiempo niman notomintsin kiteititia ika sa nikneki miyek tlemach nikpiyas noso nikneki niktekichiuilis toTajtsin?”.

14. ¿Kenijki techpaleuiya tlen ipan onochiuj Miki matikilnamikikan ika yetinemij sa itlamiyan tonaltin?

¹⁴ Tla titlanemiliaj itech tlen techititia ika yetinemij ipan itlamiyan tonaltin, techpaleuis matikmatikan tlenon tiktlapejpeniskej ipan tonemilis. Niman yejon tlen okichiuj se tokniuj akin itoka Miki. Yejua kijtoua: “Ijkuak onikis escuela, melak niknekiya nias universidad niman ijkon ninomachtis intech yolkamej. San ika, noijki niknekiya niprecursora yes niman nias kampa más nonekij tenojnotskej. Sekimej tokniuan akin kipiayaj chikauak intlaneltok, onechijlikej kuajli maniknemili tla ninomachtiskia se carrera niman noijki ueliskia niprecursora yes noso nias oksekan nontlapaleuis. Noijki onechijlijkej ika sa achijtsin poliui ijkuak yetlapopoliuis niman ika ipan xochitlalpan uelis ninomachtis intech yolkamej. Kuakon, oniktlapejpeni ninomachtis itlaj tlen manechpaleui manikpiya se tekitl. Niman pampa ijkon onikchiuj, ouel onikpix se tekitl tlen onechpaleui maniprecursora niman sakin ouel oniaj Ecuador onitenojnotsato”. Aman Miki iuan iueuentsin tlapaleuijtokej ipan circuito ipan yejon país.

15. ¿Tlenon tiuelij itech Santiago? (Noijki xkimita tlaixkopinaltin).

¹⁵ Maka matajmanakan tla tlaltikpakchanejkej xtechkakij ijkuak tikinnojnotsaj. Matikilnamikikan ika uelis nopatlaskej. Matitlanemilikan itech Santiago, itlakpaikniuj Jesús. Yejua okitak kenijki onoskalti, kenijki onochiuj Mesías niman okitak ika xakaj ijkon temachtiaya ken yejua. Maski ijkon, Santiago xnimantsin itech otlaneltokak Jesús. ¿Hasta kemanon itech otlaneltokak? Hasta ijkuak oyoliuj. Desde ijkuakon Santiago melak otlaneltokak niman chikauak okitekichiuili Jehová (Juan 7:5; Gál. 2:9).b Kuakon, maka matiknemilikan ika tochanejkauan xkeman kinekiskej nomachtiskej san pampa amantsin xtechkakij, nion maka matikajkauakan matikimitatij akin ok xkinekij nomachtiskej. Kuakon, melak noneki matitenojnotsakan pampa yetinemij ipan itlamiyan tonaltin. Tlen aman tikimijliaj uelis kichiuas ika sakin makinekikan manomachtikan, noso hasta uelis nomachtiskej sakin ika peuas ueyi tlajyouilistli.c

MÁS MATIUELTIAKAN ITECH TLEN JEHOVÁ TECHMACHTIA

16. ¿Kenijki yomitspaleuijkej tlamachtiltin tlen techmaka Jehová? (Noijki xkita recuadro “Xtekitilti tlen yotiuel ika xkinpaleui oksekimej”).

¹⁶ Seki tlamachtiltin tlen techmaka ikalpan toTajtsin, nochijchiuaj para tlaltikpakchanejkej akin xmiyek kimatij itech Biblia. San matikonteneuakan yejuin, tlamachtijli tlen kitemaka se tokniuj itlamiyan semana, seki tlamachtiltin niman videos tlen onka ipan jw.org, niman revistas tlen tiktemakaj okinchijchiujkej para akin xiteixpantijkauan Jehová. San ika, tinochimej techpaleuiya yejon tlamachtiltin, pampa kichiua más matiktlasojtlakan Jehová, más matitlaneltokakan itech iTlajtol niman techpaleuiya más kuajli matitemachtikan tlen Biblia kijtoua (Sal. 19:7).

17. ¿Kemanon uelis techpaleuis tlen kachtopa opeuj tomachtiaj itech Biblia?

¹⁷ Akin youejkauj tiktekichiuilijtokej Jehová melak tiyolpakij ijkuak ikalpan toTajtsin techijlia ika más kuajli yokasikamat itlaj tlen tikneltokayaj. San ika, noijki melak tiktlasojkamatij tlen otechmachtijkej ijkuak opeuj tomachtiaj Biblia, pampa yejon otechpaleui matikixmatikan Jehová. Ken yotikitakej, tlen kachtopa otomachtijkej itech Biblia ok uelis techpaleuis. Ijkuak ikalpan toTajtsin techijlia itlaj matikchiuakan niman tiknemiliaj ika tlen tejuamej tikijtouaj niman tikchiuaj más kuajli, noneki matiyolyemankej niman matikilnamikikan ika toTlachijchiujkauj, Jehová, melak tlamachilise niman kojtik niman yejua akin kiyekana ikalpan. Ijkuak tejuamej noso yakaj akin tikixmatij kixnamiki tlen ouijtika, noneki titlamachiaskej niman titlanemiliskej itech tleka Jehová kitekauilia matitlajyouikan. Niman ijkuak tikitaskej kenijki tiktekitiltiskej totiempo niman tlen tikpiyaj, matikilnamikikan ika yetinemij itlamiyan tonaltin niman ika sa achijtsin poliui ijkuak yetlapopoliuis. Más matiueltiakan itech tlen Jehová techmachtia para tiktlapejpeniskej tlen kuajli niman nochipa timelajkanemiskej.